ސްޓޫޑެންޓް ޔޫނިއަން އޮފް އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް.އެސް.ޔޫ) އާއި ހޭންޑްބޯލް އެސޯސިއޭޝަން އޮފް ދަ މޯލްޑިވްސްއާ ގުޅިގެން ބާއްވާ އައި.ޔޫ.އެމް.އެސް.ޔޫ ހޭންޑްބޯލް ފިއެސްޓާ 2023 ގެ އަންހެން ޑިވިޝަނުގައި ކުޅުނު ފުރަތަމަ މެޗުގައި ވިލާކޮލެޖް ސްޓޫޑެންޓް އެސޯސިއޭޝަން (ވީ.ސީ.އެސް.އޭ)ގެ މައްޗަށް ބޮޑު ތަފާތަކުން ކުރިހޯދާ ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ އަންހެން ޓީމުން މުބާރާތުގެ ފެށުން ރަނގަޅު ކޮށްފިއެވެ.
އޮގަސްޓް 23 ވީ ބުދަދުވަހު ހަވީރު 05:00 ގައި ނޭޝަނަލް ހޭންޑްބޯލް ކޯޓުގައި ކުޅުނު މި މެޗު އެމް.އެން.ޔޫ އިން ކާމިޔާބު ކުރީ 21 – 4 ގެ ނަތީޖާއަކުންނެވެ. މި މެޗުގެ އެންމެ މޮޅު ކުޅުންތެރިޔަކަށް ހޮވިފައިވަނީ އެމް.އެން.ޔޫ ޓީމުގެ ޖަރޒީ ނަންބަރު 8 އާމިނަތު އިބާ އިބްރާހީމެވެ.
މި މުބާރާތުގައި އެމް.އެން.ޔޫގެ ފިރިހެން ޓީމުން ކުޅޭ ފުރަތަމަ މެޗު އޮންނާނީ އޮގަސްޓު 26 ވާ ހޮނިހިރުދުވަހުގެ ހަވީރު 04:15 ގައެވެ. މި މެޗުގައި އެމް.އެން.ޔޫ އިން ބައްދަލުކުރާނީ މެޕްސް ކޮލެޖާ ދެކޮޅަށެވެ.
އައި.ޔޫ.އެމް.އެސް.ޔޫ ހޭންޑްބޯލް ފިއެސްޓާ 2023 ގެ އަންހެން އަދި ފިރިހެން ޑިވިޝަނުގައި އެމް.އެން.ޔޫ އިން ވަނީ ބައިވެރިވެފައެވެ. މި މުބާރާތުގެ މިދިޔަ އަހަރުގެ އަންހެން ޗެމްޕިއަނަކީ އެމް.އެން.ޔޫ އެވެ.
