ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ފަރާތުން އިންތިޒާމުކޮށްގެން ބާއްވާ ”އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2023″ގެ ގުރުއަތު ނެގުމުގެ ރަސްމިއްޔާތު ބާއްވައިފިއެވެ.
ސެޕްޓެންބަރު 16 ވީ ހޮނިހިރުދުވަހުގެރޭ ބޭއްވި މި ރަސްމިއްޔާތުގައި މުބާރާތުގެ އަންހެން އަދި ފިރިހެން ޑިވިޝަނުގެ ޓީމުތައް ބަހާލާފައިވަނީ ކޮންމެ ޑިވިޝަނެއްގައިވެސް 4 ގްރޫޕް ހިމެނޭ ގޮތަށެވެ. ފިރިހެން ޑިވިޝަނުގައި ޖުމްލަ 18 ޓީމު ހިމެނޭއިރު، މި ޑިވިޝަނުގެ ގްރޫޕް އޭ އަދި ބީ ގައި 5 ޓީމު އަދި ގްރޫޕް ސީ އަދި ޑީ ގައި އޮންނާނީ 4 ޓީމެވެ. އަދި އަންހެން ޑިވިޝަނުގައި ޖުމްލަ 13 ޓީމު ހިމެނޭއިރު، މި ޑިވިޝަނުގެ ގްރޫޕް އޭ ގައި 4 ޓީމު އަދި ބާކީ ތިން ގްރޫޕްގައި އޮންނާނީ 3 ޓީމެވެ. ޖުމްލަ 31 ޓީމާއެކު މިއީ މި މުބާރާތުގައި އެންމެ ގިނަ ޓީމު ވާދަކުރާ ފަހަރުކަން ފާހަގަކޮށްލެވެއެވެ. މުބާރާތުގެ ގުރުއަތު ނަގާފައިވަނީ މިދިޔައަހަރުގެ މުބާރާތުގެ ސެމީ ފައިނަލުގައި ކުޅުނު 4 ޓީމު ސީޑުކޮށްގެންނެވެ. އެގޮތުން މި 4 ޓީމު ބަހާލާފައިވަނީ 4 ގްރޫޕަށްދާ ގޮތަށެވެ.
މުބާރާތުގެ ގްރޫޕް ސްޓޭޖުގެ ޓީމުތައް ބެހިފައިވާގޮތް ތިރީގައި އެވަނީއެވެ.
އަންހެން ޑިވިޝަން:
ގްރޫޕް އޭ: އެމް.އައި ކޮލެޖު، އެމް.އެން.ޔޫ ބިޒްނަސް ސްކޫލް، ސައިރިކް ކޮލެޖު، ފެކަލްޓީ އޮފް އާރޓްސް
ގްރޫޕް ބީ: ސެންޓަރ ފޯ ފައުންޑޭޝަން ސްޓަޑީޒް، ވިލާ ކޮލެޖު، ފެކަލްޓީ އޮފް ޝަރީޢާ އެންޑް ލޯ
ގްރޫޕް ސީ: ފެކަލްޓީ އޮފް ހެލްތު ސައިންސަސް، ސްކޫލް އޮފް ނާރސިންގ، މޯލްޑިވްސް ބިޒްނަސް ސްކޫލް
ގްރޫޕް ޑީ: ކްލިކް ކޮލެޖު، ފެކަލްޓީ އޮފް އެޑިއުކޭޝަން، ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް
ފިރިހެން ޑިވިޝަން:
ގްރޫޕް އޭ: ސްކޫލް އޮފް މެޑިސިން، ކްލިކް ކޮލެޖު، ސެންޓަރ ފޯ ފައުންޑޭޝަން ސްޓަޑީޒް، މޯލްޑިވްސް ބިޒްނަސް ސްކޫލް، އިސްލާމިކް ޔުނިވަރސިޓީ އޮފް މޯލްޑިވްސް
ގްރޫޕް ބީ: ފެކަލްޓީ އޮފް އެޑިއުކޭޝަން، އެމް.އެން.ޔޫ ބިޒްނަސް ސްކޫލް، ވިލާ ކޮލެޖު، ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް، މޯލްޑިވްސް ޕޮލިޓެކްނިކް
ގްރޫޕް ސީ: އެމް.އައި ކޮލެޖު، ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީ، ފެކަލްޓީ އޮފް ޝަރީޢާ އެންޑް ލޯ، ފެކަލްޓީ އޮފް އާރޓްސް
ގްރޫޕް ޑީ: ސައިރިކްސް ކޮލެޖު، ފެކަލްޓީ އޮފް ހެލްތު ސައިންސަސް، ސްކޫލް އޮފް ނާރސިންގ، މެޕްސް ކޮލެޖު
މުބާރާތުގެ ޑިޖިޓަލް ޕާޓްނަރެއްގެ ގޮތުގައި ހަމަޖައްސާފައިވަނީ ދިރާގުކަމަށްވާއިރު މުބާރާތުގެ ކޭޓަރިންގ ޕާޓްނަރަކީ ޑާރވިން ރެސްޓޯރެންޓެވެ. ސޯޝަލް މީޑިއާ ޕާޓްނަރަކީ ދަނޑުމަތި އެމް.ވީ ކަމަށްވާއިރު ސްޕޯޓްސް ޕާޓްނަރަކީ ސްޓްރައިކް ޒޯނެވެ. މުބާރާތުގެ ސަޕޯޓިންގ ޕާޓްނަރެއްގެ ގޮތުގައި ފުޓްރަބް ބައި ރާއްޖެ ސްޕާ ހަމަޖެހިފައިވާއިރު ސްޕޮންސަރުންގެ ތެރޭގައި އެމް.ޔޫ ސްޓޯރު އަދި މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) ހިމެނެއެވެ.
އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ މަތީ ތަޢުލީމު ދާއިރާގައި ބޭއްވިގެންދާ އެންމެ ބޮޑު ކުޅިވަރު މުބާރާތެވެ. އަދި އެމް.އެން.ޔޫ.އެސް.ޔޫގެ އެންމެ ބޮޑު އަދި އެންމެ ޝަރަފުވެރި ހަރަކާތްވެސްމެއެވެ. ސިލްސިލާގޮތެއްގައި ބޭއްވިގެންދާ މި މުބާރާތުގެ 9 ވަނަ ޢަދަދު މިއަހަރު ބޭއްވުމަށް ހަމަޖެހިފައިވާއިރު، 2013 ން ފެށިގެން 2019 އާ ހަމައަށް މެދުކެނޑުމެއްނެތި މި މުބާރާތް ވަނީ ކޮންމެ އަހަރަކުވެސް ކުރިއަށް ގެންދެވިފައެވެ. އަދި ކޮވިޑް-19ގެ ޢާލަމީ ވަބާއާއެކު 2 އަހަރުގެ މެދުކެނޑުމަކަށްފަހު މި މުބާރާތް އަލުން ކުރިއަށް ގެންދެވުނީ މިދިޔަ އަހަރެވެ. މިދިޔަ އަހަރުގެ މުބާރާތުގެ އަންހެން ޑިވިޝަންގެ ޗެމްޕިއަނަކީ އެމް.އެން.ޔޫ ބިޒްނަސް ސްކޫލްކަމަށްވާއިރު ފިރިހެން ޑިވިޝަންގެ ޗެމްޕިއަނަކީ މެޕްސް ކޮލެޖެވެ.
