ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ)ގެ ލ. ގަން ކެމްޕަހުގައި ޤާއިމުކޮށްފައިވާ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ގޮފި ”އަހުރަ“އިގެ ހިންގާ ކޮމިޓީ އާއި ބައްދަލުކުރެއްވުމަށާއި، ދިވެހިރާއްޖޭގެ ޖުމްހޫރިއްޔާގެ މިނިސްޓްރީ އޮފް ހޯމް އެފެއާރޒްގެ ދަށުން ހިންގާ ޔޫތު ލީޑަރސް ނެޓްވޯރކް (ވައި.އެލް.އެން)ގެ ފަރާތުން ބާއްވާ ”ޖުމްހޫރިއްޔަތާއި ޒުވާނުން“ ފޯރަމްގެ އިންތިޒާމް ކޮމިޓީގެ މެންބަރުންގެ ގޮތުގައި ބައިވެރިވެލެއްވުމަށް، އެމް.އެން.ޔޫ.އެސް.ޔޫގެ ޓީމެއް ލާމު އަތޮޅަށް ކުރައްވާ ދަތުރުފުޅުގައި، ”އަހުރަ“އިގެ ފަރާތުން ބޭއްވި މާހެފުމެއްގައި އެމް.އެން.ޔޫ.އެސް.ޔޫގެ ޓީމް ބައިވެރިވެވަޑައިގެންފިއެވެ. މި ޓީމުގައި ހިމެނެނީ އެމް.އެން.ޔޫ.އެސް.ޔޫގެ ރައީސް އަރުޝަދު އަޝްރަފް، ނައިބު ރައީސް (އަމަލީ) ޙަސަން ޝާހު، ޚަޒާންދާރު ޢަބްދުﷲ ޝަހުނީޒް، ސެކްރެޓަރީ އަނާ އަޙްމަދު، މީޑިއާ ކޯޑިނޭޓަރ މުޙައްމަދު ޝާން ޢާމިރު، އެމް.އެން.ޔޫ.އެސް.ޔޫގެ އެޑްވައިޒަރީ ބޯޑުގެ މެންބަރު ޙުސައިން ޢަލީ އަދި އެމް.އެން.ޔޫ.އެސް.ޔޫ އިން ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްގައި ޤާއިމް ކުރެވިފައިވާ ގޮފި ”ސޮސައިޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒް (ޝެޓްސް)ގެ ރައީސާ ޙައްވާ ޔުޝްފާ ނަދީމެވެ.
06 މެއި 2018ވީ އާދިއްތަ ދުވަހުގެ ރޭ 08:30ގައި ގަން ކެމްޕަސްގައި ބޭއްވުނު މި މާހެފުމުގައި އެމް.އެން.ޔޫގެ ދަރިވަރުން ތަމްސީލުކުރާ ކައުންސިލް މެންބަރު އަދި އެމް.އެން.ޔޫ.އެސް.ޔޫގެ ކުރީގެ ރައީސް އަދި އެމް.އެން.ޔޫ.އެސް.ޔޫ ޝަރަފްވެރިކަމާއި ޢިއްޒަތްތެރިކަމުގެ ނިޝާނުގެ ވެރިޔާ އަލީ ރަޝީދު އަޙްމަދު ވެސް ބައިވެރިވެލެއްވިއެވެ. މީގެ އިތުރުން މިހަފްލާގައި ޔޫތު ލީޑާރސް ނެޓްވޯކްގެ 2 މެންބަރުން ކަމަށްވާ ސައިރިކްސް ކޮލެޖް ސްޓޫޑެންޓް އެންޑް އެލުމްނައި އެސޯސިއޭޝަން (ސީސާ)ގެ ރައީސް މުޙައްމަދު ނަބީހް އަދި އެވިޑް ކޮލެޖް ސްޓޫޑެންޓްސް ކައުންސިލްގެ އެކްޓިވިޓީ ކޯޑިނޭޓަރ ފާތިމަތު ރިޝްތާ ސުޖާ ވެސް ވަނީ ބައިވެރިވެލައްވާފައެވެ.
މާހެފުމުގައި ގަން ކެމްޕަހުގެ ގިނަ ދަރިވަރުންތަކެއް ބައިވެރިވިއިރު، މާހެފުން ނިންމުމަށްފަހު އެމް.އެން.ޔޫ.އެސް.ޔޫގެ ފަރާތުން ގަން ކެމްޕަހުގެ ދަރިވަރުންނާއި ބައްދަލުކުރެއްވިއެވެ.