ދިވެހި ރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ ގޮފިތަކުގެ ހިންގާ ކޮމެޓީތަކުގެ މަޤާމުތަކާ ހަވާލުވި މެމްބަރުން ވާންވީ، ރަނގަޅު މަސައްކަތްތަކެއް ކޮށްދޭ ބަޔަކަށް ކަމަށް، ސޮސައިޓީ ފޯރ ޝަރީޢާ އެންޑް ލޯ (އެސް.އެސް.އެލް)ގެ ރައީސް އިސްމާޢީލް ރަޒީން އިމްރާން ވިދާޅުވެއްޖެ އެވެ.
ރަޒީން މިފަދައިން ވިދާޅުވީ، އެމް.އެން.ޔޫ.އެސްޔޫ.ގެ ގޮފިތަކުގެ ހިންގާ ކޮމެޓީ އަށް އިންތިޚާބުވި މެމްބަރުންނަށް މަޤާމުގެ މަސްއޫލިއްޔަތު ހަވާލުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ރަޒީން ވިދާޅުވީ އައު ދައުރަކަށް އިންތިޚާބުވި ހިންގާ ކޮމެޓީގެ އެންމެހައި މެމްބަރުންގެ ޢަމާޒަކީ، މި ދައުރު ކާމިޔާބު ކަމާއެކު ނިންމާލުން ކަމަށެވެ. އެކަން ފާހަގަކުރައްވައި ރަޒީން ވިދާޅުވީ، އެކަމުގެ ފުރިހަމަ ޔަޤީންކަން ވެސް އަރުވާ ކަމަށެވެ. ހަމަ އެހެންމެ، ދެން އަންނަން އޮތް ދައުރުގައި މަޤާމުތަކާ ހަވާލުވާނެ މެމްބަރުންނަށް ފަސޭހަވާނެ މަގުން، ކަންކަން ތަރުތީބު ކޮށްލާނެ ކަމުގައި ވެސް ރަޒީން ވިދާޅުވި އެވެ.
ރަޒީންގެ ވާހަކައިގައި ވަނީ، އެމް.އެން.ޔޫ.އެސް.ޔޫ އިން ކުރަމުން އަންނަ މަސައްކަތްތަށް ވެސް ފާހަގަ ކުރައްވައިފަ އެވެ. އެގޮތުން، އެމް.އެން.ޔޫ.އެސް.ޔޫ.ގެ މެމްބަރުންގެ އަތުން ފީއެއްގެ ގޮތުގައި ނަގަމުން އަންނަ 50 ރުފިޔާ ނެގުމުގެ ހަޤީޤީ މާނަ އާއި ބޭނުން ރަޒީން ވަނީ ވިދާޅުވެފަ އެވެ.
އެގޮތުން އެއީ، ބެރުވެރިންނަށް ވާން ބޭނުންވެފައި ތިބި ކުދިން ބެރުވެރިންނަށް ހަދައި ދިނުމާއި، މޮޅެތި ނެށުންތެރިންނަށް ވާން ބޭނުންވާ ކުދިން މޮޅެތި ނެށުންތެރިންނަށް ހަދައި ދިނުމުގެ އިތުރުން ވާހަކަ ދެއްކުމުގެ ފަންނުގައި ކުރިއަށް ދާން ބޭނުންވެފައި ތިބި ކުދިން، މޮޅެތި ވާހަކަ ދެއްކުންތެރިންނަށް ހެދުން ފަދަ ކަންކަމަށް ހޭދަކުރެވޭ 50 ރުފިޔާ ކަމުގައި ރަޒީން ވަނީ ވިދާޅުވެފަ އެވެ.
”އާދެ! މިއަދު ތިޔަ ބެލެނިވެރިން ވެސް ތިޔަ ދަރިވަރުން ވެސް އުފައްދާނެ ސުވާލަކީ ފީ ދައްކާއިރު، މިއީ ކީއްކުރާ ފަންސާސް ރުފިޔާއެއްހޭ؟ ދަންނަވަންތޯ! މިއީ ބެރުވެރިންނަށް ވާން ބޭނުންވެފައި ތިބި ކުދިން ބެރުވެރިންނަށް ހަދައިދޭން، މޮޅެތި ނެށުންތެރިންނަށް ވާން ބޭނުންވެފައި ތިބި ކުދިން، ނެށުންތެރިންނަށް ހަދައިދޭން، ނަރުހުންނަށް ވާން ބޭނުންވެފައި ތިބި ކުދިން ނަރުހުންނަށް ހަދައިދޭން، ވާހަކަ ދެއްކުމުގެ ފަންނަށް ޝައުޤު ހުންނަ ކުދިން މޮޅެތި ވާހަކަ ދެއްކުންތެރިންނަށް ހަދައިދޭން، މި އެންމެން ބިނާ ކުރުމަށް ހޭދަކުރެވޭ ފަންސާސް ރުފިޔާ މިއީ. މިއީ އަގު ހުރި ފަންސާސް ރުފިޔާއޭ. މިއީ ބޭކާރު ފަންސާސް ރުފިޔާއެއް ނޫން،“ އެސްއެސްއެލްގެ ރައީސް ރަޒީން ވިދާޅުވި އެވެ.
މީގެ އިތުރުން ރަޒީން ވަނީ، ކުދިންގެ ޙައްޤުގައި ބެލެނިވެރިން ކުރަމުން އަންނަ މަސައްކަތް ފާހަގަކުރައްވައި، ބެލެނިވެރިންނަށް ޚާއްސަ ޝުކުރެއް އަދާ ކުރައްވައިފަ އެވެ. އަދި އެއީ ޤައުމުގެ މުސްތަޤުބަލު ބިނާ ކުރުމަށް ކުރެވެމުން އަންނަ ވަރަށް އަގު ހުރި މަސައްކަތެއް ކަމަށް ވެސް ވިދާޅުވެފަ އެވެ.
އިތުރަށް ރަޒީން ވިދާޅުވީ ހިންގާ ކޮމެޓީގެ މެމްބަރުންގެ ގޮތުގައި ތިއްބަވައިގެން ކުރަމުން އަންނަ މަސައްކަތަކީ، މާދަމާ ހަމައެކަނި ހަނދާނުގައި ހުންނާނެ މަސައްކަތެއް ނޫން ކަމަށެވެ. އޭގެ ބަދަލުގައި އެއީ، މުސްތަޤުބަލުގައި އަންނަން ތިބި ކުދިން، އެ މަސައްކަތްތަކުގެ ވާހަކަ ދައްކާނެ މަސައްކަތްތަކެއް ކަމަށް ވެސް ރަޒީން ވަނީ ވިދާޅުވެފަ އެވެ.
