1445 ވަނަ އަހަރުގެ ރަމަޟާން މަހާ ދިމާކޮށް މެޑިކޯސް އިން އިސްނަގައިގެން އެމް.އެން.ޔޫ.އެސް.ޔޫއާ ގުޅިގެން ކުރިޔަށްގެންދާ ”އެމް.އެން.ޔޫ.އެސް.ޔޫ-މެޑިކޯސް ހިދާޔަތު ސުވާލު މުބާރާތް 1445“ ގެ ގުރުނެގުން ބާއްވައިފިއެވެ.
މިރަސްމިއްޔާތު ކުރިޔަށް ގެންގޮސްފައިވަނީ ސްކޫލް އޮފް މެޑިސިންގެ ކެމްޕަސް ކަމުގައިވާ ދަރުމަވަންތަ ހަސްފަތާލުގެ 14 ވަނަ ފަންގިފިލާގައެވެ. މިރަސްމިއްޔާތުގައި މުބާރާތުގެ ހިންގާ ކޮމިޓީގެ މެމްބަރުންގެ އިތުރުން ޓީމުތަކުގެ މެނޭޖަރުން ބައިވެރިވެފައިވެއެވެ. އަދި މުބާރާތުގެ ގަވާއިދާއި، މުބާރާތް ކުރިޔަށްދާނެ ގޮތާއި މުބާރާތުގެ ތާވަލާ ބެހޭ މުހިންމު މައުލޫމާތުތަށް ވަނީ ޓީމުތަކުގެ މެނޭޖަރުންނާ ހިއްސާކުރެވިފައެވެ.
މުބާރާތުގައި ޖުމްލަ 6 ޓީމެއް ބައިވެރިވެފައިވާއިރު، މިމުބާރާތް ކުރިޔަށް ގެންދިޔުމަށް ހަމަޖެހިފައިވަނީ 2 ގްރޫޕަކަށް ބަހާލައިގެންނެވެ. އެގޮތުން ގުރުލުމަށްފަހު ގްރޫޕް-އޭގެ ޓީމުތަކުގެ ގޮތުގައި ކަނޑައެޅިފައިވަނީ އެމް.އެން.ޔޫ ބިޒްނަސް ސްކޫލް، ފެކަލްޓީ އޮފް ހެލްތު ސައިންސަސް އަދި ފެކަލްޓީ އޮފް ހޮސްޕިޓަލިޓީ އެންޑް ޓޫރިޒަމް ސްޓަޑީޒް އެވެ. އަދި ގްރޫޕް-ބީގެ ޓީމުތަކުގެ ގޮތުގައި ކަނޑައެޅިފައިވަނީ ފެކަލްޓީ އޮފް އެޑިއުކޭޝަން، ސްކޫލް އޮފް މެޑިސިން އަދި ފެކަލްޓީ އޮފް އާރޓްސްއެވެ. ގްރޫޕް-އޭ ގެ މެޗު ފެށުމަށް ހަމަޖެހިފައިވަނީ ހުކުރު ދުވަހުގެ ހަވީރު 16:00ގައެވެ. އަދި ގްރޫޕް-ބީގެ މެޗް ކުރިޔަށް ގެންދިޔުމަށް ހަމަޖެހިފައިވަނީ ހުކުރު ދުވަހުގެރޭ 21:00ގައެވެ. މުބާރާތުގެ ފައިނަލަށް ދަތުރުކުރާނީ ކޮންމެ ގްރޫޕަކުންވެސް އެންމެ މަތިން ޕޮއިންޓް ހޯދާ ޓީމެކެވެ.
މިމުބާރާތަކީ މިއަހަރުގެ ރަމަޟާންމަހާ ދިމާކޮށް މުޅިން އަލަށް ތަޢާރަފުކުރެވުނު މުބާރާތެކެވެ. މެޑިކޯސްގެ އަމާޒަކީ މިމުބާރާތަކީ ކާމިޔާބު އަދި ތަފާތު މުބާރާތަކަށް ހަދާ، ކުރިޔަށް އޮތް އަހަރުތަކުގައިވެސް މިމުބާރާތް ކުރިޔަށް ގެންދިޔުމެވެ. މިމުބާރާތަށް ވަނީ ފެކަލްޓީތަކުގެ ފަރާތުން ބޮޑު ތަރުހީބެއް ލިބިފައެވެ.
