އެމް.އެން.ޔޫ.އެސް.ޔޫ- މެޑިކޯސް ހިދާޔަތު ސުވާލު މުބާރާތް 1445ގެ ގްރޫޕް-ބީގެ ޓީމުތަކުގެ މެދުގައި ކުޅެވުނު މެޗުން މޮޅުވެ، ސްކޫލް އޮފް މެޑިސިންއިން ފައިނަލް މެޗުގެ ދެވަނަ ޖާގަ ކަށަވަރު ކޮށްފިއެވެ.
މިމެޗުގައި ބައްދަލުކޮށްފައިވަނީ ފެކަލްޓީ އޮފް އެޑިއުކޭޝަން، ސްކޫލް އޮފް މެޑިސިން އަދި ފެކަލްޓީ އޮފް އާޓްސްއެވެ. މިއީ މުބާރާތުގެ ގްރޫޕް-ބީ ގައި ހިމެނޭ ތިން ޓީމެވެ. މެޗުގެ ފުރަތަމަ ދެބުރު ނިމުނު އިރު 30 ޕޮއިންޓާއެކު ކުރީގާ އޮތީ ފެކަލްޓީ އޮފް އެޑިއުކޭޝަންގެ ޓީމެވެ. އަދި ދެވަނައިގާ އޮތީ ސްކޫލް އޮފް މެޑިސިންގެ ޓީމެވެ. ދެވަނަ ބުރަށްފަހު ފެކަލްޓީ އޮފް އާރޓްސްގެ ޓީމު ވަނީ މުބާރާތާ ވަކިވެފައެވެ.
މިނަތީޖާއާއެކު ހާލަތު ރައުންޑުގައި ވާދަކޮށްފައިވަނީ ސްކޫލް އޮފް މެޑިސިންއާއި ފެކަލްޓީ އޮފް އެޑިއުކޭޝަންގެ ޓީމެވެ. މިބުރުގެ ހާލަތު ސުވާލުތަށް ނިމުނު އިރު، ދެޓީމުންވެސް ވަނީ ހުރިހާ ސުވާލަކަށް ރަނގަޅު ޖަވާބުދީފައެވެ. އެއަށްފަހު ނަތީޖާ ނެރުމަށްޓަކާ ބޯނަސް ރައުންޑެއް ކުރިޔަށް ގެންދެވުނެވެ. ބޯނަސް ރައުންޑަށްފަހު 2 ޕޮއިންޓްގެ ތަފާތަކުން ހާލަތު ރައުންޑް ކާމިޔާބުކޮށް، ފައިނަލަށް ދަތުރުކޮށްފައިވަނީ ސްކޫލް އޮފް މެޑިސިންގެ ޓީމެވެ.
މިމުބާރާތުގެ ފައިނަލް މެޗް ބޭއްވުމަށް ހަމަޖެހިފައިވަނީ މިރޭ 21:15ގައި އެފް.އީ އޮޑިޓޯރިއަމްގައެވެ. ފައިނަލް މެޗުގައި ސްކޫލް އޮފް މެޑިސިންގެ ޓީމާ ވާދަކުރާނީ ފުރަތަމަ މެޗު ކާމިޔާބުކުރި، ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒަމް ސްޓަޑީޒްގެ ޓީމެވެ. މިއީ ފަހުގެ ތާރީޚެއްގައި މިފަދަ މުބާރާތެއް އެމް.އެން.ޔޫގައި ބޭއްވިގެންދާ ފުރަތަމަ ފަހަރެވެ.
