ދުނިޔޭގެ ސިއްޙަތު ދުވަހުގެ މުނާސަބަތުގައި މެޑިކޯސް، ނިއަރެސް އަދި ހީލަރސް ގުޅިގެން ކުރިޔަށް ގެންދާ ހަރަކާތްތަކުގެ ތެރެއިން، ”އެމް.އެން.ޔޫ.އެސް.ޔޫ ދުޅަހެޔޮ ޢީދު“ މިއަދު ހަވީރު ފަށަން ތައްޔާރުވެއްޖެއެވެ.
މިހަރަކާތް ބޭއްވުމަށް ހަމަޖެހިފައިވަނީ މާލޭ ހެންވޭރު އާޓިފިޝަލް ބީޗުގައި ހަވީރު 16:00 އިން 18:00 އަށެވެ. މިހަރަކާތުގެ ތެރެއިން ހެލްތް ސްކްރީނިން ސްޓޯލްތަކެއް ކުރިޔަށް ގެންދިޔުމަށް ވަނީ ނިންމާފައެވެ. އެގޮތުން ބަރުދަނާއި އިސްކޮޅު ބެލުމާއި، ލޭގެ ޕްރެޝަރ އަދި ހަކުރު ހުރި މިންވަރު ބެލުމުގެ ޚިދުމަތް ދިނުމަށް ވަނީ ހަމަޖެހިފައެވެ. މީގެ އިތުރުން ކެންސަރ ސޮސައިޓީ އޮފް މޯލްޑިވްސްގެ ފަރާތުން މައުލޫމާތު ދިނުމުގެ ޚާއްސަ ސްޓޯލެއް ކުރިޔަށް ގެންދިޔުމަށް ހަމަޖެހިފައިވެއެވެ. މީގެ އިތުރުންވެސް ފެކަލްޓީ އޮފް ހެލްތް ސައިންސަސްގައި ބެޗަލަރ އޮފް ފިޒިއޮތެރަޕީ ކިޔަވާ ދަރިވަރުންގެ ޚާއްސަ ސްޓޯލެއްވެސް މިހަރަކާތުގެ ތެރެއިން ކުރިޔަށް ގެންދިޔުމަށް ވަނީ ނިންމާފައިވެއެވެ.
ހަމަމިއާއެކު މިހަރަކާތުގެ ތެރެއިން ކުޑަ ކުދިންނަށް ޚާއްސަ ކުޅިވަރު ސްޓޯލްތަކެއް ކުރިޔަށް ގެންދިޔުމަށް ވަނީ ހަމަޖެހިފައެވެ. މި ސްޓޯލްތަށް ކުރިޔަށް ގެންދިޔުމަށް ހަމަޖެހިފައިވަނީ ދަރިވަރުންގެ ޔޫނިއަންގެ އެކިއެކި ގޮފިތަކުގެ ފަރާތުންނެވެ. އެގޮތުން ބީއެސްއެސްއޭ، ޝަޓްސް، ސިއާ، ތަރަހަ، މެޑިކޯސް އަދި ނިއަރެސްގެ ފަރާތުން ކުޅިވަރު ސްޓޯލްތަށް ކުރިޔަށް ގެންދިޔުމަށް ވަނީ ނިންމާފައެވެ.
އަދި މިހަރަކާތުގެ ތެރެއިން ކުޑަކުދިންގެ ހުނަރު ދައްކާލުމުގެ ފުރުސަތު ދިނުމަށްވެސް ވަނީ ނިންމާފައެވެ. އަދި އެމް.އެން.ޔޫ.އެސް.ޔޫ ބޮޑުބެރުގުރޫޕުގެ ހުށައެޅުންތައް ވެސް ފެނިގެންދާނެއެވެ.
ދުނިޔޭގެ ސިއްހަތު ދުވަސް ފާހަގަކުރުމުގެ ގޮތުން، މެޑިކޯސް، ނިއަރެސް އަދި ހީލަރސް ގުޅިގެން ކޮންމެ އަހަރަކުވެސް ސިލްސިލާ ގޮތެއްގައި ދަނީ ހަރަކާތްތައް ކުރިޔަށް ގެންދަމުންނެވެ. އެގޮތުން މިއަހަރުވެސް އިތުރު ހަރަކާތްތައް ވަނީ ކުރިޔަށް ރޭވިފައެވެ. މިއީ ތިން ގޮފި ގުޅިގެން ދުނިޔޭގެ ސިއްހަތު ދުވަސް ފާހަގަކުރާ ތިންވަނަ އަހަރެވެ.
