މޯލްޑިވްސް ސްޕޭސް ރިސާޗް އޯގަނައިޒޭޝަން (އެމް.އާރް.އެސް.އޯ) އަދި މެޑިކޯސް ގުޅިގެން ސްކޫލް އޮފް މެޑިސިންގެ ދަރިވަރުންނަށް އަމާޒުކޮށްގެން ”ސްޕޭސް މެޑިސިން“ އާ ގުޅުންހުރި ޚާއްސަ ސެޝަނެއް ކުރިޔަށް ގެންގޮސްފިއެވެ.
މި ސެޝަން ކުރިއަށް ގޮސްފައިވަނީ މިދިޔަ އާދިއްތަ ދުވަހުގެރޭ 20:00 އިން 22:00 އަށް، ދަރުމަވަންތަ ހޮސްޕިޓަލުގެ 14 ވަނަ ފަންގިފިލާގައެވެ. މިސެޝަން ނަންގަވާދެއްވާފައިވަނީ މިދާއިރާގެ ތަޖުރިބާކާރެއް ކަމުގައިވާ ޑރ.އާޔާ ހެޝާމްއެވެ.
މި ސެޝަންގައި އެމް.އާރް.އެސް.އޯ ގެ އިސް ބޭފުޅުންވަނީ ބައިވެރިވެވަޑައިގެންފައެވެ. އަދި ސްކޫލް އޮފް މެޑިސިންގެ 45 ދަރިވަރުންނާއި އައިޖީއެމްއެޗްގެ ބައެއް ބޭފުޅުންވެސް މި ސެޝަންގައި ބައިވެރިވެވަޑައިގެންފާވެއެވެ.
ސެޝަން ފެށިގެންގޮސްފައިވަނީ އެމް.އާރް.އެސް.އޯގެ ރައީސްގެ ވާހަކަފުޅުންނެވެ. އަދި އެއަށްފަހު ސްޕޭސް މެޑިސިން ދާއިރާގެ ތަޖުރިބާކާރު، އިޖިޕްޓުގެ ޑޮކްޓަރެއް ކަމުގައިވާ ޑރ. އާޔާ ހެޝާމް ވަނީ ސެޝަންގެ ބައިވެރިންނަށް ސްޕޭސް މެޑިސިންއާ ބެހޭ ވަރަށް ތާފާތު އަދި އަގުހުރި މައުލޫމާތުކޮޅެއް ހިއްސާ ކުރައްވާފައެވެ. ސެޝަން ނިންމާލުމުގެ ކުރިން ޑރ. އާޔާ ހިޝާމް ވަނީ ބައިވެރިންގެ ގިނަ ސުވާލުތަކަކަށް ޖަވާބުދެއްވަވާފައެވެ.
ފާއިތުވި އަހަރުތަކުގައިވެސް މެޑިކޯސް އިން ވަނީ މިފަދަ ޖަމިއްޔާތަކާއި ގުޅިގެން އިތުރު ހަރަކާތްތައް ހިންގުމަށް ހާއްސަ ސަމާލުކަމެއް ދީފައެވެ. މިގޮތުން މިޝަން ފޯ މައިގްރެންޓް ވޯކާޒް މޯލްޑިވްސް އާއި މޯލްޑިވްސް ކެންސާ ސޮސައިޓީ ފަދަ ޖަމިއްޔާތަކާއެކު މެޑިކޯސް އިން ދަނީ ވަރަށް ގިނަ ހަރަކާތްތައް ރާވާ ހިންގަމުންނެވެ. މިއީ މެޑިކޯސް އިން މޯލްޑިވްސް ސްޕޭސް އެންޑް ރިސާޗް އޯގަނައިޒޭޝަން (އެމް.އާރް.އެސް.އޯ) އާ އެކު މިފަދަ ހަރަކާތެއް ބޭއްވި ފުރަތަމަ ފަހަރެވެ.
