އެމް.އެން.ޔޫ ސްކޫލް އޮފް މެޑިސިންގެ ފުރަތަމަ ބެޗުގެ ދަރިވަރުންގެ ޝަރަފުގައި އެފެކަލްޓީގެ ގޮފި ކޮންސޯޓިއަމް އޮފް މެޑިކަލް ސްޓޫޑަންޓްޒް- މެޑިކޯސްއާއި ޖޫނިއާ ބެޗުތަކުގެ ދަރިވަރުން ގުޅިގެން ޚާއްސަ ރަސްމިއްޔާތެއް ބާއްވައިފިއެވެ.
މިރަސްމިއްޔާތު ބާއްވާފައިވަނީ މިދިޔަ ހުކުރުދުވަހުގެ ރޭ 20:00ގައި ދަރުމަވަންތަ ހަސްފަތާލުގެ 14 ވަނަ ފަންގިފިލާގައެވެ.
މި ރަސްމިއްޔާތުގައި ސްކޫލް އޮފް މެޑިސިންގެ ޑީން، ޑރ. ޝީޒާ އަލީ އާއި، އެމް.އެން.ޔޫ.އެސް.ޔޫގެ ހިންގާ ކޮމިޓީގެ މެމްބަރުންނާއި އެމް.އެން.ޔޫ.އެސް.ޔޫގެ ކުރީގެ ބައެއް ރައީސުންގެ އިތުރުން ސްކޫލް އޮފް މެޑިސިންގެ ގިނަ އަދަދެއްގެ ދަރިވަރުން ބައިވެރިވެފައިވެއެވެ.
މެޑިކޯސްގެ ފަރާތުން ފުރަތަމަ ބެޗްގެ ދަރިވަރުންނަށް ވަނީ ހާއްސަ އައިޓަމްއެއްގެ ގޮތުން ވީޑިއޯއެއް ހުށަހަޅައިދީފައެވެ. އަދި އެ ބެޗުގެ ހުރިހާ ދަރިވަރުންނަށް މެޑިކޯސްއިން ވަނީ ހަނދާނީ ހަދިޔާއެއްވެސް އަރުވާފައެވެ. މި ހަފްލާގައި ބެޗް 1 ގެ ފަރާތުން މުޙައްމަދު އަނޫފް ޝަހީމް ވަނީ ސްކޫލް އޮފް މެޑިސިންގެ ދަރިވަރުންނަށް ވަރަށް ހާއްސަ ނަސޭހަތުގެ ބަސްކޮޅެއް ހިއްސާކުރައްވާފައެވެ. އަދި ހަމަ އެފަދައިން ބެޗް 2ގެ ފަރާތުން ފާޠިމަތު މާހާ އާދިލް ވަނީ ސްކޫލް އޮފް މެޑިސިންގެ ހުރިހާ ދަރިވަރުންގެ ނަމުގައި ބެޗް 1 އަށް ޝުކުރުއަދާކުރައްވާ ހަފްލާގެ ބައިވެރިންނާ މުހާތަބުކުރައްވާފައެވެ. ހަފްލާ ނިމިގެންގޮސްފައިވަނީ ސްކޫލް އޮފް މެޑިސިންގެ ޑީން، ޑރ. ޝީޒާ އަލީގެ ވާހަފުޅުންނެވެ.
އެމް.އެން.ޔޫގައި މެޑިސިން ކިޔަވައިދިނުން ފެށިފައިވަނީ 2018 ވަނަ އަހަރުގެ އޮކްޓޯބަރު މަހުގައެވެ. އެ އަހަރު ސްކޫލް އޮފް މެޑިސިންގައި މުޅިން އަލަށް ކިޔަވަންފެށި ބެޗް 1 ގެ ދަރިވަރުންގެ 5 އަހަރުގެ ކިޔެވުމުގެ މަރުހަލާ ނިމި އެ ދަރިވަރުން މިހާރު ދަނީ އިންދިރާ ގާންދީ މެމޯރިއަލް ހޮސްޕިޓަލުގައި އިންޓާންޝިޕްގެ މަރުހަލާ ފުރިހަމަ ކުރަމުންނެވެ.
