ދިވެހިރާއްޖޭގެ ޤައުމީ ޔުނިވަރސިޓީގައި މެޑިކަލް ލެބޯރެޓަރީ ޕްރޮފެޝަނަލުންގެ ހަފްތާ ފާހަގަކޮށް ނިންމުމުގެ ގޮތުން ކުރިއަށް ގެންދިޔަ ”ބީއެމްއެލްއެސް ނައިޓް“ 30 އޭޕްރީލްގައި ބާއްވައިފިއެވެ.
ލެބް ހަފްތާ ފާހަގަކުރުމަށް މި އަހަރުވެސް ޔުނިވަރސިޓީގެ، މެޑިކަލް ލެބޯރެޓަރީ ސައިންސްގެ ދާއިރާއިން މަތީ ތަޢުލީމު ހާޞިލުކުރަމުންދާ ދަރިވަރުން ވަނީ ގިނަ ހަރަކާތްތަކެއް ކުރިއަށް ގެންގޮސްފައެވެ. އެގޮތުން ލައިވް ކަލްޗަރ ބެކްޓީރިޔާ އަގަރް ކޮމްޕެޓިޝަން އާއި ބީއެމްއެލް ހަރަކާތްތަކުގެ ލޯގޯ ފަރުމާކުރުމުގެ މުބާރާތެއް ކުރިއަށް ގެންގޮސްފައިވެއެވެ.
ރޭ ކުރިއަށްގެންދިޔަ ބީއެމްއެލްއެސް ނައިޓްގައި ވަނީ އެކި ހަރަކާތްތަކުން ވަނަވަނަޔަށް ދިޔަ ދަރިވަރުންގެ އަގުވަޒަންކޮށް، އެވޯޑު ހަވާލުކޮށްފައެވެ.
ބީއެމްއެލްއެސް ނައިޓް އާއި ލެބް ހަފްތާގެ ހަރަކާތްތަކާ ބެހޭގޮތުން، ހަރަކާތްތައް އިންތިޒާމުކުރުމުގައި ހީލާރސްގެ މެމްބަރުންގެ އިތުރުން މިހަރަކާތުގައި އިސްކޮށް ހަރަކާތްތެރިވި ކުދިންގެ ތެރެއިން، ބެޗެލަރ އޮފް މެޑިކަލް ލެބޯރެޓަރީ ސައިންސްގެ ދަރިވަރު ފާޠިމަތު ޝައީނާ ޝަދީދު ބުނެފައިވަނީ ހުރިހާ ހަރަކާތްތަކެއްވެސް ކުރިއަށް ދިޔައީ ވަރަށް ފުރިހަމައަށްކަމަށާއި، ދަރިވަރުންނަށް އިތުރު އެތައް ކަމެއް އުނގެނެންވެސް ފުރުޞަތު ލިބުނުކަމަށެވެ.
”ލެބް ހަފްތާއަކީ ބޮޑު ކާމިޔާބީއެއް. ހުރިހާ ހަރަކާތްތަކެއްވެސް ވަރަށް ފުރިހަމަ އަދި އަޅުގަނޑުމެންނަށް ރަނގަޅު ވަގުތުކޮޅެއް ހޭދަކުރެވުނު. އަޅުގަނޑުމެންނަށް އެތައް ކަމެއް ދަސްވެގެންދިޔަ އަދި ޓީމްވޯކްވެސް ރަނގަޅުވެގެން ގޮސް، މި ތަޖުރިބާތަކުން އެތައް ކަމެއް ހާޞިލުވި.“ ޝައީނާ ބުނެފައިވެއެވެ.
ކޮންމެ އަހަރެއްގެވެސް ލެބް ހަފްތާ ނިންމާލުމުގެ ގޮތުން ބީއެމްއެލްއެސް ނައިޓް ހަރަކާތް ކުރިއަށް ގެންދެއެވެ. މިއީ ދަރިވަރުންނަށް މަޖާ އަދި އުފާވެރި މާޙައުލެއްގައި، ހަރަކާތްތައް ނިންމުމުގެ އުފާ ފާހަގަކުރުމަށް ކުރިއަށް ގެންދެވޭ ހަރަކާތެއްކަންވެސް ފާހަގަކޮށްލެވެއެވެ.
