ފެކަލްޓީ އޮފް އެޑިއުކޭޝަން ސްޓޫޑެންޓް އެސޯސިއޭޝަން (ފެސާ) އިން ކޮންމެ އަހަރަކު ވެސް ބާއްވަމުން އަންނަ ”ހަވާސް ޝޯވ“ ކާމިޔާބުކަމާއެކު ނިންމާލައިފިއެވެ.
މި ޝޯވ ކުރިޔަށް ގެންގޮސްފައިވަނީ 3 އޮކްޓޯބަރު 2025 ވީ ހުކުރު ދުވަހުގެ ރޭ އެފްއީ އޮޑިޓޯރިއަމްގައެވެ. މި ޝޯވ ގައި އެފް.އީގެ އިތުރުން 5 ފެކަލްޓީއަކުން ވަނީ 19 އައިޓަމް ހުށަހަޅާފައެވެ. މީގެ އިތުރުން އެމް.އެން.ޔޫ.އެސް.ޔޫ ބޮޑުބެރު ގްރޫޕު އަދި ޑާންސް ގޮރޫޕުން ވެސް ވަނީ 3 އައިޓަމެއް ހުށައަޅާފައެވެ.
ކޮންމެ އަހަރަކުވެސް ވަކި ތީމަކަށް ކުރިއަށް ގެންދާ މި ޝޯވްގެ މިއަހަރުގެ ތީމަކީ ”ފޯކްލޯ އެންޑް މިތްސް އޯލް އަރައުންޑް ދި ވަރލްޑް“ އެވެ.
ހަވާސް ޝޯވ އަކީ ފެކަލްޓީ އޮފް އެޑިއުކޭޝަންގެ ދަރިވަރުންގެ ހުނަރުތައް ދައްކާލުމާއި، ދަރިވަރުންގެ މެދުގައި ގުޅުން ބަދަހިކުރުމަށް ފުރުޞަތު ފަހިކޮށްދިނުމުގެ މަގުޞަދުގައި ފެސާއިން ސިލްސިލާކޮށް ބާއްވަމުން އަންނަ ހަރަކާތެކެވެ. އެހެނިހެން ފެކަލްޓީކަތަކަށް ވެސް ފުރުޞަތު ހުޅުވާލައިގެން ކުރިއަށް ގެންދާ މި ހަރަކާތަކީ އަބަދުވެސް ދަރިވަރުންގެ ބޮޑު ތަރުހީބެއް ލިބެމުން އަންނަ ހަރަކާތެކެވެ.
މި ހަރަކާތް މިހާ ކާމިޔާބުކަމާއިއެކު ކުރިޔަށް ގެންދެވުނީ މި ހަރަކާތް ރާވާ ހިންގުމުގެ އެންމެހާ އަމަލީ މަސައްކަތްތަކުގައި ބައިވެރިވި ފެސާ އިސްވާރުންގެ ފުރިހަމަ އެއްބާރުލުމުގެ ސަބަބުންނެވެ. ފެސާގެ އިސްވާރުންގެ ފަރާތުން މި ހަރަކާތް ކުރިޔަށް ގެންދިޔުމަށް ލިބުނު އެއްބާރުލުމާއި އެހީތެރިކަން ކުރިޔަށް ހުރި ހަރަކާތްތަކުގައި ވެސް ލިބިގެންދާނެ ކަމަށް ފެސާއިން އުއްމީދުކުރެއެވެ.
