ދިވެހިރާއްޖޭގެ ޤައުމީ ޔުނިވަރސިޓީގެ ސެންޓަރ ފޯ ފައުންޑޭޝަން ސްޓަޑީޒްގެ ދަރިވަރުންގެ ގޮފި ”ތަރަހަ“ އާއި ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީގެ ގޮފި ”އެސްޓާ“ ގުޅިގެން، މި ގޮފިތަކާ އަލަށް ގުޅުނު ލީޑަރުންނަށް މަރުޙަބާ ކިޔުމަށް ބޭއްވި ”ދަ ގްރޭންޑް ވެލްކަމް“ ވަރަށް ފޯރިއާއެކު 7 މާރޗް 2026 ވީ ހޮނިހިރު ދުވަހުގެ ރޭ ނިންމާލައިފިއެވެ.
މި ޚާއްޞަ ޙަފުލާ ކުރިއަށް ގެންގޮސްފައިވަނީ ބޮލީވުޑް ތީމަށެވެ. މި ރޭގެ އެންމެ ފާހަގަކޮށްލެވޭ އެއް ހަރަކާތަކީ މިއަދުގެ ޒުވާނުންގެ ތެރޭގައި ފާހަގަކޮއްލެވޭ މަޝްހޫރު ލަވަކިޔުންތެރިޔާ ޒަފާފް ރަމީޒް (ޒެޕޯ) ގެ ޚާއްޞަ ހުށަހެޅުމެކެވެ. ޒެޕޯގެ މި ހުށަހެޅުންތަކާއެކު ޙަފުލާގެ ފޯރި ވަނީ އިތުރަށް ގަދަވެފައެވެ.
މި ޙަފުލާގައި ތަރަހަ އާއި އެސްޓާގެ އައު ލީޑަރުންގެ އިތުރުން، އެމް.އެން.ޔޫ.އެސް.ޔޫ ގެ ބައެއް އިސް މެންބަރުންނާއި، އެ ދެ ގޮފީގެ ކުރީގެ މެންބަރުންވެސް ބައިވެރިވެފައިވެއެވެ.
މި ރޭގެ ހަރަކާތްތައް ފެށިގެން ދިޔައީ ހުރިހާ ލީޑަރުންގެ ތަޢާރަފަކުންނެވެ. އޭގެ ފަހުން ތަފާތު މަޖާ ކުޅިވަރުތައް ކުރިއަށް ގެންގޮސްފައި ވެއެވެ. މީގެ ތެރޭގައި ހަރަކާތުން ދައްކައިގެން ބޮލީވުޑްގެ ކުރީގެ މަޝްހޫރު ލަވަތައް ދިމާކުރުމުގެ ކުޑަ ގޭމެއް ވެސް ކުރިއަށް ގެންދެވުނެވެ.
ޙަފުލާ ނިންމާލުމުގެ ކުރިން، ބޮލީވުޑް ތީމަށް ޚާއްޞަކޮށް ތައްޔާރުކޮށްފައިވާ ބެކްގްރައުންޑެއްގައި ހުރިހާ ބައިވެރިން ފޮޓޯ ނަގާފައިވެއެވެ. އަދި މި އުފާވެރި ބައްދަލުވުން ނިންމާލާފައިވަނީ ހުރިހާ ބައިވެރިންނަށް ތައްޔާރުކުރެވުނު ކުޑަ ޕިއްޒާ ޕާޓީއަކަށް ފަހުގައެވެ.
ގޮފިތަކުގެ މެދުގައި މިފަދަ ޙަފުލާއެއް ބޭއްވުމުގެ މައިގަނޑު މަޤްޞަދަކީ ގޮފިތަކާ އަލަށް ގުޅުނު ލީޑަރުންގެ މެދުގައި އެކުވެރިކަން އާލާކޮށް، މަސައްކަތުގެ މާޙައުލަށް އެކުދިން އަހުލުވެރިކުރުވުމެވެ.
