ފޯރިގަދަ މެޗަކަށް ފަހު އެސް.އެން އާ ސީ.އެފް.އެސް ސެމީއަށް!

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ދެވަނަ އަށް އެންމެ ބޮޑު ކުޅިވަރު ހަރަކާތް، 12 ވަނަ ވެސްޓްރޭޑް އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯލް މުބާރާތުގެ ފިރިހެން ޑިވިޝަނުގެ ސެމީ ފައިނަލަށް ސްކޫލް އޮފް ނާސިންގ (އެސް.އެން) އާއި ސެންޓަރ ފޯރ ފައުންޑޭޝަން ސްޓަޑީޒް (ސީ.އެފް.އެސް) ދަތުރުކޮށްފިއެވެ.

މިރޭގެ މެޗުތައް ފެށިގެން ދިޔައީ އެމް.އެން.ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) އާއި ފެކަލްޓީ އޮފް ހޮސްޕިޓާލިޓީ އެންޑް ޓުއަރިޒްމް ސްޓަޑީސް (އެފް.އެޗް.ޓީ.އެސް) ބައްދަލުކުރި މެޗާއެކުގައެވެ. މި މެޗުގެ ފުރަތަމަ ސެޓު ފެށުނު އިރު އެފް.އެޗް.ޓީ.އެސް އިސް ލީޑް ނަގާފައިވަނިކޮށް އެމް.އެން.ޔޫ.ބީ.އެސް އިން ނަތީޖާ ބަދަލުކޮށްލާ 21-25 އިން ކާމިޔާބުކޮށްފައިވާއިރު ދެވަނަ ސެޓް ވެސް 25-14 އިން ވަނީ ކާމިޔާބުކޮށްފައެވެ.

މެޗުގެ މޮޅު ކުޅުންތެރިއަކަށް ހޮވިފައިވަނީ އެމް.އެން.ޔޫ.ބީ.އެސްގެ ކެޕްޓަން، ޖާޒީ ނަންބަރު ،19 އިބްރާހިމް ރަޒީނެވެ.

މުބާރާތުގެ ފިރިހެން ޑިވިޝަނުގެ މިރޭގެ ދެވަނަ މެޗުގައި ސެންޓަރ ފޯރ ފައުންޑޭޝަން ސްޓަޑީޒް (ސީ.އެފް.އެސް) އިން ވަނީ 2-0 ސެޓުން ފެކަލްޓީ އޮފް ޝަރިއްޢާ އެންޑް ލޯ (އެފް.އެސް.އެލް)ގެ މައްޗަށް ކުރި ހޯދާފައެވެ.

ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ސެޓު ސީ.އެފް.އެސް އިން 25-23 އިން ކާމިޔާބުކޮށްފައިވާއިރު ދެވަނަ ސެޓު 25-13 އިން ވަނީ ކާމިޔާބުކޮށްފައެވެ.

މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ ސީ.އެފް.އެސްގެ ޖާޒީ ނަންބަރު 2، އަޙްމަދު އަހުނަފް ޙުސެއިންއެވެ.

ފިރިހެން ޑިވިޝަނުގެ ތިންވަނަ މެޗުގައި ސްކޫލް އޮފް މެޑިސިން (އެސް.އެމް) އިން ނުކުތީ ފެކަލްޓީ އޮފް އެންޖިނިއަރިންގ، ސައިންސް އެންޑް ޓެކްނޮލޮޖީ (ފެސްޓް) އާ ދެކޮޅަށެވެ. ވާދަވެރި ކުޅުމެއް މި މެޗުގައި ފެނުނު ނަމަވެސް، ސީދާ ދެ ސެޓުން މި މެޗު ފެސްޓުން ވަނީ ފަސޭހަ ކަމާއެކު ކާމިޔާބު ކޮށްފަ އެވެ.
މި މެޗުގެ ސެޓުތައް ދިޔައީ، 10-25 އަދި 16-25 އިންނެވެ.

މެޗުގެ މޮޅު ކުޅުންތެރިއަކަށް ހޮވިފައިވަނީ ފެސްޓުގެ ޖާޒީ ނަންބަރު 5، އަސީލް ޢަބްދުﷲ ރަޝީދެވެ.

ފިރިހެން ޑިވިޝަނުގެ މިރޭގެ ފަހު މެޗުގައި ފެކަލްޓީ އޮފް ހެލްތު ސައިންސަސް އާއި ސްކޫލް އޮފް ނާސިންގ ބައްދަލުކޮށްފައިވާއިރު، މި މެޗު އެއް ސެޓު ދެ ސެޓުން ކާމިޔާބުކުރީ އެސް.އެން އިން ނެވެ.

މެޗުގެ ސެޓުތައް ދިޔައީ، 28-26، 20-25 އަދި 13-15 އިންނެވެ.

މެޗުގެ މޮޅު ކުޅުންތެރިއަކަށް ހޮވިފައިވަނީ ސްކޫލް އޮފް ނާސިންގެ ޖާޒީ ނަންބަރު 21 އަލީ އާނިމެވެ.

މި އަހަރުގެ މުބާރާތުގެ މެއިން ސްޕޮންސަރަކީ ވެސްޓްރޭޑެވެ. މީގެ އިތުރުން ޑިޖިޓަލް ސްޕޮންސަރުގެ ގޮތުގައި ދިރާގު ހިމެނެ އެވެ.