ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ދެވަނަ އަށް އެންމެ ބޮޑު ހަރަކާތް، 12 ވަނަ ވެސްޓްރޭޑް އެމް.އެން.ޔޫ.އެސް.ޔޫ އިންޓަ ފެކަލްޓީ ވޮލީބޯޅަ މުބާރާތުގެ ފައިނަލުގައި ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އާއި ބައްދަލުކޮށް ސްކޫލް އޮފް ނާރސިން (އެސް.އެން) އިން މެޗު ކާމިޔާބުކޮށް މުބާރާތުގެ ޗެމްޕިއަންކަން ހޯދައިފިއެވެ.
ބުރާސްފަތި ދުވަހުގެ ރޭ ކުޅުނު ފިރިހެން ޑިވިޝަންގެ ފައިނަލް މެޗު އެސް.އެން އިން ކާމިޔާބުކުރީ ތިން ސެޓު އެއް ސެޓުންނެވެ. މެޗުގެ ފުރަތަމަ ސެޓު ފެށިއިރުު ވަރަށް ހަމަހަމަ ކުޅުމެއް ފެނިގެންދިޔަ ނަމަވެސް، ސެޓުގެ މެދާހަމައިން، އެސް.އެން އިން އަވަސް ކުޅުމަކާއެކު ރަނގަޅު ލީޑެއް ނަގާ، 25-17 ގެ ނަތީޖާއަކުން ސެޓު ކާމިޔާބު ކުރިއެވެ.
ދެވަނަ ސެޓުގައި އެސް.އެން ލީޑް ނަގާފައި ވަނިކޮށް، ނަތީޖާ 11-11 ގައި، އެފް.އެޗް.އެސް ފުރަތަމަ ސެޓަށް ވުރެއް ކުޅުން އިތުރަށް ރަނގަޅުކޮށް، ގިނަ ޕޮއިންޓުތަކެއް ކައިރިކައިރިން ހޯދާ ފަހަތުން އަރައިވަނީ ރަނގަޅު ލީޑެއް ނަގާފައެވެ. އަދި މި ސެޓު 19-25 ގެ ނަތީޖާއަކުން ކާމިޔާބުކުރިއެވެ.
ފަހު ދެ ސެޓުގައި ހަމަހަމަކުޅުމެއް ފުރަތަމަ ފެނިގެންދިޔަ ނަމަވެސް، ދެ ސެޓުވެސް ފަހުން ލީޑުނަގާ ކާމިޔާބު ކުރީ 25-21 ގެ ނަތީޖާއަކުން އެސް.އެންއިންއެވެ. އަދި މިއާއެކު އެސް.އެން އިން ވަނީ ފިރިހެން ޑިވިޝަންގެ ތަށި ފުރަތަމަ ފަހަރަށް ކާމިޔާބުކޮށް، މުބާރާތުގެ ދެ ޑިވިޝަންގެ ތަށިވެސް ހާސިލްކޮށްފައެވެ.
ފައިނަލް މެޗުގައި އެފް.އެޗް.އެސްގެ މައްޗަށް ތަފާތު މޮޅު ކުޅުމަކާއިއެކު ކުރިހޯދުމަށްފަހު މުޅި މެޗުގެ އެންމެ މޮޅު ކުޅުންތެރިޔާކަން ސްކޫލް އޮފް ނާރސިންގ އިން، ޖާޒީ ނަންބަރު 45 ނެވިން ޖޭ. ވަނީ ހޯދާފައެވެ. މިއަހަރުގެ މުބާރާތަކީ އެސް.އެންއަށް ވަރަށް ކާމިޔާބު މުބާރާތެކެވެ. އެސް.އެންގެ ފިރިހެން އަދި އަންހެން ޓީމުންވެސް މުބާރާތުގައި ވަނީ މޮޅު ކުޅުމެއް ދައްކާ، ދެ ޑިވިޝަނުގެ ޗެމްޕިއަންކަން ހޯދާފައެވެ.
ވޭތުވެދިޔަ މާރިޗު މަހުގެ 26 އިން މި މަހު 2ގެ ނިޔަލަށް ކުރިއަށްގެންދިޔަ މި މުބާރާތުގައި ޖުމުލަ 18 ޓީމު ވަނީ ބައިވެރިވެފައެވެ. މި މުބާރާތުގެ ހުރިހާ މެޗެއްވެސް ކުޅެފައިވަނީ އެމް.އެން.ޔޫ ޕީ.އީ ހޯލުގައެވެ. މި އަހަރުގެ މުބާރާތުގެ މެއިން ސްޕޮންސަރަކީ ވެސްޓްރޭޑެވެ. މީގެ އިތުރުން ޑިޖިޓަލް ސްޕޮންސަރުގެ ގޮތުގައި ދިރާގު ހިމެނެއެވެ.
