އަންހެން ޑިވިޝަނުގެ ގްރޫޕް ސްޓޭޖް މެޗުތައް ނިމިއްޖެ

ލ. އަތޮޅުގެ މުއައްސަސާތަކަށް ހުޅުވާލައިގެން ކުރިއަށްދާ އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތުގެ އަންހެން ޑިވިޝަނުގެ ގްރޫޕް ސްޓޭޖް މެޗުތައް ކުޅެ ނިމިއްޖެއެވެ.
ބުރާސްފަތި ދުވަހުގެ ރެޔަށް ތާވަލު ކުރެވިފައިވި މި މެޗުތައް އެރޭ މޫސުން ތަން ނުދިނުމުގެ ސަބަބުން ކުޅެވުނީ ހުކުރު ދުވަހުގެ ހެނދުނެވެ.
އެދުވަހު ހެނދުނު 06.00ގައި ކުޅެވުނު ފުރަތަމަ މެޗު އިހައްދޫ ސްކޫލުން 4-2ގެ ނަތީޖާއަކުން ގަން ރީޖަނަލް ހޮސްޕިޓަލް ބަލިކުރިއިރު، މި މެޗުގެ މޮޅު ކުޅުންތެރިޔަކަށް ހޮވިފައިވަނީ އިހައްދޫ ސްކޫލުގެ ޖާރޒީ ނަންބަރ 08 ފާތިމަތު ރިޝްފާ އެވެ.
މޯލްޑިވިއަން އަދި ފެނަކަ ބައްދަލުކުރި ފޯރިގަދަ މެޗު 8-7ގެ ނަތީޖާއަކުން ކާމިޔާބުކުރީ މޯލްޑިވިއަން އެވެ. މި މެޗުގެ މޮޅު ކުޅުންތެރިޔަކަށް ހޮވުނީ މޯލްޑިވިއަންގެ ޖާރޒީ ނަންބަރ 12 ފާތިމަތު ޝަރުމީލާ އެވެ.

ތިންވަނަ މެޗުގައި އިސްކަންދަރު އެއަރ ބޭސް އިން 10-4ގެ ނަތީޖާއަކުން ލ. އަތޮޅު ތައުލީމީ މަރުކަޒުގެ މައްޗަށް ކުރި ހޯދިއިރު، މި މެޗުގެ މޮޅު ކުޅުންތެރިޔަކަށް ހޮވުނީ އިސްކަންދަރު އެއަރބޭސްގެ ޖާރޒީ ނަންބަރ 05 މައީޝާ އަބްދުލްހަންނާނެވެ.
އެދުވަހު ހެނދުނު ކުޅެވުނު ފަހު މެޗުގައި ލާމު ބްލޫސްއިން ދިރާގުގެ މައްޗަށް ކުރިހޯދީ 5-2ގެ ނަތީޖާއަކުންނެވެ. މެޗުގެ މޮޅު ކުޅުންތެރިޔަކަށް ހޮވުނީ ލާމު ބްލޫސްގެ ޖާރޒީ ނަންބަރ 30 ޢާއިޝަތު ޒީނާ އެވެ.
މި މެޗުތައް ނިމުމާއެކު އެއް ޓީމު ފިޔަވައި މި ޑިވިޝަނުގެ ކްއާޓަރ ފައިނަލަށް ހޮވުނު ޓީމުތައް ވަނީ ޔަގީންވެފައެވެ.
މިގޮތުން ގްރޫޕް ބީގެ އެއްވަނަ ޓީމު އިސްކަންދަރު އެއަރބޭސް ބައްދަލުކުރާނީ ގްރޫޕް އޭގެ ތިންވަނަ ޓީމު އިހައްދޫ ސްކޫލާއެވެ. ގްރޫޕް ސީގެ އެއްވަނަ ޓީމު ލާމު ބްލޫސް ބައްދަލުކުރާނީ ގްރޫޕް އޭގެ ދެވަނަ ޓީމު ފެނަކަ އާއެވެ. ގްރޫޕް ބީގެ ދެވަނަ ޓީމު ލ. އަތޮޅު ތައުލީމީ މަރުކަޒު ބައްދަލުކުރާނީ ގްރޫޕް ސީގެ ދެވަނަ ޓީމު ލާމު ގަން ކައުންސިލާއެވެ. އަދި ގްރޫޕް އޭގެ އެއްވަނަ ޓީމު މޯލްޑިވިއަން އާ ބައްދަލުކުރާނީ ގްރޫޕް ބީގެ ތިންވަނަ ޓީމު މުންޑޫ ކައުންސިލް އަދި ގްރޫޕް ސީގެ ތިންވަނަ ޓީމު ދިރާގު ބައްދަލުކުރާ ޕްލޭ އޮފް މެޗު ކާމިޔާބު ކުރާ ޓީމާއެވެ.

މުބާރާތުގެ ފިރިހެން ޑިވިޝަނުގައި ޖުމްލަ 4 ޓީމެއް ވާދަކުރާއިރު އަންހެން ޑިވިޝަނުގައި ޖުމްލަ 10 ޓީމެއް ވާދަކުރެއެވެ. މި މުބާރާތަކީ ލ. އަތޮޅުގެ މުއައްސަސާތަކަށް ހުޅުވާލައިގެން ބާއްވާ މުބާރާތަކަށްވާއިރު، މުބާރާތް ކުރިއަށްދާނީ އޮކްޓޯބަރ 01ން 06 އަށެވެ. މި މުބާރާތް ރާވާ އިންތިޒާމު ކުރަނީ ލ. ގަމު ކެމްޕަހުގައި ޤާއިމުކުރެވިފައިވާ އެމް.އެން.ޔޫ.އެސް.ޔޫގެ ގޮފި އަހުރައިންނެވެ. މިފަހަރުގެ މުބާރާތުގައި އެމް.އެން.ޔޫ.އެސް.ޔޫއިން ދަނީ މުބާރާތް އިންތިޒާމުކުރުމުގައި އަމަލީގޮތުން ހަރަކާތްތެރިވަމުންނެވެ.

މިއީ 2017 ވަނަ އަހަރުން ފެށިގެން ސިލްސިލާގޮތެއްގައި ބާއްވާ މިފަދަ 3 ވަނަ މުބާރާތެވެ. މިއަހަރުގެ މުބާރާތުގެ އެކަމޮޑޭޝާން ޕާޓްނަރ އަކީ “ނިރުވާނާ އިން ލާމު” އެވެ. ސްޕޮންސަރުންގެ ތެރޭގައި “ލ. ގަމު ކައުންސިލް”، “ލ. ގަން ޕޮލިސް ސްޓޭޝަން”، “ދިރާގު”، “އައިލެންޑާސް އެސޯސިއޭޝަން” އަދި “އަމީގޯސް ސްޕޯޓްސް ކްލަބް” ހިމެނެއެވެ. އަދި ހަމަ އެހެންމެ އެމް.އެން.ޔޫގެ ލ. ގަން ކެމްޕަހުން ދެއްވާ ފުރިހަމަ އެއްބާރުލުމާއި އެހީތެރިކަން ފާހަގަކުރެވެއެވެ.

ލިޔުނީ: އާމިނަތު ސަމާ މުހައްމަދު،

މީޑިއާ ކޯޑިނޭޓަރ، އެމް.އެން.ޔޫ.އެސް.ޔޫ