ދިވެހިރާއްޖޭގެ ޤައުމީ ޔުނިވަރސިޓީގެ ފެކަލްޓީތަކުގެ މެދުގައި ކޮންމެ އަހަރަކު ބާއްވާ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތް ފަށައިފިއެވެ.
މި މުބާރާތް ފެށުމަށް އެމް.އެން.ޔޫ ޕީއީ ހޯލުގައި ހުކުރު ދުވަހުގެރޭ 20:00 ގައި ބޭއްވި ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ސްޓޭޓް ފޯރ ހޯމް އެފެއަރޒް މުޙައްމަދު މާހިރު ޢީސާއެވެ. މީގެ އިތުރުން އެމް.އެން.ޔޫ އާއި އެމް.އެން.ޔޫ.އެސް.ޔޫގެ އިސްވެރިން މި ރަސްމިއްޔާތުގައި ބައިވެރިވެވަޑައިގަތެވެ.
ރަސްމިއްޔާތު ފެށުނީ މިދިޔަ އަހަރުގެ މުބާރާތް ކާމިޔާބުކުރި އަންހެން އަދި ފިރިހެން ޓީމުގެ ކެޕްޓަނުން މުބާރާތުގެ ތަށި ހަވާލުކުރުމުންނެވެ. އެމް.އެން.ޔޫ.އެސް.ޔޫ ބޮޑުބެރު ގްރޫޕުގެ ސަގާފީ ހަރަކާތަކާއެކު ރަސްމީ އިއްޒަތުގައި މުބާރާތުގެ ތަށި ގެނެސްދިނީ ބިޒްނަސް ސްކޫލް ސްޓޫޑެންޓްސް އެސީސިއޭޝަންގެ މިދިޔަ އަހަރުގެ އަންހެން ޓީމުގެ ކެޕްޓަން ޝަމްހާ ރިޔާޒާއި ސެންޓަރ ފޯ ފައުންޑޭޝަން ސްޓަޑީޒްގެ މިދިޔަ އަހަރުގެ ފިރިހެން ޓީމުގެ ކެޕްޓަން ޢަލީ ނިމާލެވެ.
އަންހެން އަދި ފިރިހެން ޑިވިޝަނަށް ބަހާލައިގެން ކުރިއަށް ގެންދާ މި މުބާރާތުގައި ޖުމްލަ 10 ފެކަލްޓީއަކުން މިއަހަރު ވަނީ ބައިވެރިވެފައެވެ. އޭގެ ތެރޭގައި ހިމެނެނީ ކޮންމެ ޑިވިޝަނަކުން ވެސް 8 ޓީމެވެ. އަދި މިއަހަރަކީ ސްކޫލް އޮފް މެޑިސިން އިން އަލަށް އަންހެން ޓީމެއް އަދި ސެންޓަރ ފޯ މެރިޓައިމް ސްޓަޑީޒުން އަލަށް ފިރިހެން ޓީމެއް ނެރުނު އަހަރެވެ.
މިދިޔަ އަހަރެކޭވެސް އެއްގޮތަށް މިއަހަރުގެ މުބާރާތުގައިވެސް ގްރޫޕް ސްޓޭޖުގެ މެޗުތައް ކުޅޭނީ ތިން ސެޓަށެވެ. ސެމީ އާއި ފައިނަލް މެޗު ކުޅުމަށް ހަމަޖެހިފައިވަނީ ފަސް ސެޓަށެވެ.
ދަރިވަރުންގެ މެދުގައި ބާއްވާ ދެވަނައަށް އެންމެ ބޮޑު މުބާރާތުގެ ފުރަތަމަ މެޗުގައި ބައްދަލުކުރީ ފެކަލްޓީ އޮފް ޝަރީއާ އިން ލޯ (އެފް.އެސް.އެލް) އާއި ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް) ގެ ފިރިހެން ޓީމެވެ. މި މެޗު ސީދާ ދެ ސެޓުން ކާމިޔާބު ކުރީ އެފް.އެޗް.ޓީ.އެސްގެ ޓީމުންނެވެ. ފުރަތަމަ ސެޓު 25-09 ގެ ތަފާތު ބޮޑު ނަތީޖާއަކުން އެފްއެޗްޓީއެސް ކާމިޔާބުކުރިއިރު، އެޓީމުން ދެވަނަ ސެޓު ހޯދީ 25-14 އިންނެވެ.
މި މެޗުގެ މޮޅު ކުޅުންތެރިއަކަށް ހޮވިފައިވަނީ މިދިޔަ އަހަރުގެ މުބާރާތުގައި ފިރިހެން ޑިވިޝަނުގެ އެންމެ މޮޅު 6 ކުޅުންތެރިންގެ ތެރޭގައި ހިމެނުނު އެފްއެޗްޓީއެސްގެ ޖާޒީ ނަންބަރު 12، އަލީ އާރިފްއެވެ. އެ މުބާރާތުގައި އާރިފް ކުޅުނީ ސެންޓަރ ފޯރ ފައުންޑޭޝަން ސްޓަޑީޒްގެ ޓީމަށެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތަކީ 2015 ވަނަ އަހަރުން ފެށިގެން ސިލްސިލާގޮތެއްގައި މެދުކެނޑުމެއްނެތި ކޮންމެ އަހަރަކު ބާއްވަމުން އަންނަ މުބާރާތެކެވެ. މިއަހަރު މި ބޭއްވެނީ މިފަދަ 8 ވަނަ މުބާރާތެވެ. މިއަހަރުގެ މުބާރާތުގެ ސްޕޮންސަރުންގެ ތެރޭގައި އީސްޓޭޓް ކޮންސްޓްރަކްޝަން ސޮލިއުޝަންސް، އެންޒީ، އޭވް އަދި އޮއޭސެސް ހިމެނެއެވެ. މުބާރާތުގެ ޕްރިންޓިންގ ޕާޓްނަރ އަކީ ކުލަ މޯލްޑިވްސް އެވެ. އަދި އޮންލައިން މީޑިއާ ޕާޓްނަރ އަކީ ސަން މީޑިއާ ގްރޫޕެވެ.
