ދިވެހިރާއްޖޭގެ ގައުމީ ޔުނިވާސިޓީގެ ދަރިވަރުންގެ ޔޫނިއަންގެ ފުރަތަމަ އިނގިރޭސި ބަހުން މުބާރާތް ފަށައިފި އެވެ.
07 ޖޫން ވީ ހުކުރު ދުވަހުގެ ރޭ އެމް.އެން.ޔޫ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައި މި މުބާރާތް ފެށުމަށްޓަކައި ބޭއްވުނު ރަސްމިއްޔާތު ޝަރަފްވެރިކޮށްދެއްވީ އެމް.އެން.ޔޫގެ ޗާންސެލަރ ޑރ. މަހުމޫދު ޝައުޤީއެވެ. އަދި ގެސްޓް އޮފް އޮނަރ އެއްގެ ގޮތުން އެމް.އެން.އެސް.ޔޫގެ ފުރަތަމަ ރައީސް އައްޝައިޙް ޙާތިމް ޔޫސުފްވަނީ ބައިވެރިވެ ވަޑައިގެންފައެވެ. މީގެއިތުރުން ޔޫނިއަންގެ ހިންގާ ކޮމެޓީގެ މެމްބަރުންނާއި އެޑްވައިޒަރީ ބޯޑުގެ މެމްބަރުންވަނީ ބައިވެރިވެފައެވެ.
މި ރަސްމިއްޔާތުގައި ވާހަކަފުޅު ދައްކަވަމުން ޗާންސެލަރ ވަނީ ދަރިވަރުންގެ ޔޫނިއަނުން ދަރިވަރުންނަށްޓަކައި ކުރިއަށްގެންދާ ހަރަކާތްތަށް ފާހަގަކޮށް ޔޫނިއަންގެ ހިންގާ ކޮމެޓީގެ މެމްބަރުންނާއި، އިސްވާރުންކުރާ ބުރަ މަސައްކަތްތަކަށް ޝުކުރު އަދާކުރައްވާފައެވެ. މީގެ އިތުރުން ޔޫނިއަންގެ ފުރަތަމަ ދައުރުގެ ރައީސް އައްޝައިޙް ޙާތިމްގެ ވާހަކަފުޅުގައި ބަހުސްކުރަމުން ދާއިރު، ބަހުސް ކުރުންތެރިން ހަދާނުގައި ބެހެއްޓުން މުހިންމު ނުކުތާތައްވަނީ ފާހަގަ ކުރައްވާފައެވެ.
މި ރަސްމިއްޔާތުގައި މުބާރާތުގެ އިސް ފަނޑިޔާރު އައިޝަތު ޔޫލިއާ ހަލީމް ވެސް ވަނީ ވާހަކަފުޅު ދައްކަވާފައެވެ. ފަނޑިޔާރުގެ ވާހަކަ ފުޅުގައި ވަނީ ބަހުސް ކުރުންތެރިން ސަމާލު ވާންވީ ކަންކަމަށް އަލިއަޅުވާލާފައެވެ.
ފެށުމުގެ ރަސްމިއްޔާތަށްފަހު މުބާރާތުގެ ފުރަތަމަ ބަހުސް ކުރިއަށްދިޔައިރު، މި ބަހުސްގައި ބައްދަލުކޮށްފައިވަނީ ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އާއި ފެކަލްޓީ އޮފް އެންޖިނިއަރިންގ ސައިންސް އެންޑް ޓެކްނޮލޮޖީ (ފެސްޓް)އެވެ.
މި މެޗު ފެކަލްޓީ އޮފް ޝަރީޢާ އެންޑް ލޯ އިން ކާމިޔާބުކޮށްފައިވާއިރު، މެޗުގެ ބެސްޓް ޑިބޭޓާކަން ހޯދާފައިވަނީ ފެކަލްޓީ އޮފް ޝަރީޢާ އެންޑް ލޯގެ ޝަމަން ޢަލީ އެވެ.
އެމް.އެން.ޔޫ.އެސް.ޔޫ އިން އަންނަނީ ސިލްސިލާކޮށް ދިވެހި ބަހުސް މުބާރާތެއް ބާއްވަމުންނެވެ. އެގޮތުން މިފަހަރު ކުރިއަށްމިގެންދެވޭ މި މުބާރާތަކީ ވެސް އިނގިރޭސިބަހަށް ފަރިތަ، މިފަންނަށް ޝައުޤުވެރިވާ ދަރިވަރުންނަށް، ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ކުރިއަށްގެންދެވޭ މުބާރާތެކެވެ.
