ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިނގިރޭސި ބަހުސް މުބާރާތުގެ ސެމީ ފައިނަލުގެ ބަހުސްތަކުން މޮޅުވެ ފައިނަލުގެ ޖާގަ ފެކަލްޓީ އޮފް އެޑިއުކޭޝަން (އެފް.އީ) އަދި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) ހޯދައިފިއެވެ.
11 ޖޫން ވީ އަންގާރަ ދުވަހުގެ ރޭ ކުރިއަށްދިޔަ ސެމީ ފައިނަލް ބަހުސްތަކުގެ ތެރެއިން ފުރަތަމަ ސެމީގައި ބައްދަލުކުރީ ސްކޫލް އޮފް މެޑިސިން (އެސް.އެމް) އަދި އެފް.އީ އެވެ. މި ބަހުސް އެފް.އީ އިން 1375 ޕޮއިންޓާއެކު ބަހުސް ކާމޮޔާބު ކޮށްފައިވާއިރު، މި ބަހުސްގެ އެންމެ މޮޅު ބަހުސްކުރުންތެރިޔާ އަށް ހޮވިފައިވަނީ މި ޓީމުގެ އައިޝަތު ދިފްލާ އިބްރާހިމްއެވެ. އެސް.އެމްގެ ޓީމަށް ލިބިފައިވަނީ 1186 ޕޮއިންޓެވެ.
ދެވަނަ ސެމީގައި ބައްދަލުކުރީ ސެންޓަރ ފޮ ފައުންޑޭޝަން ސްޓަޑީސް (ސީ.އެފް.އެސް) އަދި އެފް.އެސް.އެލްގެ ޓީމެވެ. މި ބަހުސް އެފް.އެސް.އެލްގެ ޓިމުން ސީ.އެފް.އެސްގެ މައްޗަށް ކުރިހޯދާފައިވަނީ 1452 ޕޮއިންޓް ހޯދައިގެންނެވެ. ސީ.އެފް.އެސްގެ ޓީމަށް 1106 ލިބިފައިވާއިރު، އެންމެ މޮޅު ބަހުސް ކުރުންތެރިޔާގެ މަގާމު ހާސިލްކޮށްފައިވަނީ އެފް.އެސް.އެލް ޓީމުގެ ޝަމަން އަލީއެވެ. މި މޮޅާއެކު އެފް.އެސް.އެލް ޓީމު ވެގެން ގޮސްފައިވަނީ މުބާރާތުގެ ސައްތަ އިންސައްތަ މޮޅުވުމުގެ ރިކޯޑާއެކު ފައިނަލަށް ދަތުރު ކުރި ހަމައެކަނި ޓީމަށެވެ.
މި މުބާރާތުގެ ފައިނަލް ބަހުސް އަދި ނިންމުމުގެ ރަސްމިއްޔާތު 13 ޖޫން ވާ ބުރާސްފަތި ދުވަހުގެ ރޭ އެމް.އެން.ޔޫ ސެންޓަރަލް އޮޑިޓޯރިއަމްގައި ކުރިއަށްގެންދިޔުމަށްވަނީ ހަމަޖެހިފައެވެ.
ދަރިވަރުންގެ ޔޫނިއަނުން ކުރިއަށްމިގެންދެވޭ އިނގިރޭސި ބަހުސް މުބާރާތަކީ އިނގިރޭސިބަހަށް ފަރިތަ، މިފަންނަށް ޝައުޤުވެރިވާ ދަރިވަރުންނަށް، ޢިލްމީ ފެންވަރެއްގައި އުފެއްދުންތެރި ގޮތުގައި ޚިޔާލު ފާޅުކުރުމުގެ ފުރުޞަތު ފަހިކޮށްދީ، ދޫފަރިތަ، ކުޅަދާނަ ވާހަކަދެއްކުންތެރިންތަކެއް އުފެއްދުމުގެ މަޤްޞަދުގައި ކުރިއަށްގެންދެވޭ މުބާރާތެކެވެ
