ދިވެހިރާއްޖޭގެ ޤައުމީ ޔުނިވަރސިޓީ ދަރިވަރުން ޔޫނިއަނުން މިހާރު ކުރިއަށްގެންދާ އެމް.އެން.ޔޫ.އެސް.ޔޫ އިންޓަރ ފެކަލްޓީ ބެޑްމިންޓަން މުބާރާތުގެ ސެމީ ފައިނަލް ގައި ކުޅޭ ޓީމުތައް ކަނޑައެޅިގެން ދިޔައިރު ވާދަވެރި ޓީމުތަކެއްވަނީ ސެމީ އިން ޖާގަހޯދާފައެވެ.
ފެކަލްޓީ އޮފް އެޑިއުކޭޝަން (އެފް.އީ) އަދި ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނިލަޖީ (ފެސްޓް)ގެ މެޗު ވާދަވެރި ކުޅުމަކަށްފަހު އެފް.އީގެ ޓީމު ކާމިޔާބުކޮށްފައިވަނީ 03-02ގެ ނަތީޖާ އަކުންނެވެ. ދެ ޓީމުގެ ފަރާތުންވެސް މޮޅު ކުޅުމެއް ފެނިގެންދިޔަ މި މެޗުގައި އެފް.އީގެ ޓީމުން ވަނީ އަންހެން ސިންގަލްސް އަދި މިކްސް ޑަބަލްސް ފިޔަވައި އެހެން ގޭމުތައް ކާމިޔާބުކޮށްފައެވެ. މި ގުރޫޕުގެ އެއް ވަނަ ޓީމުގެ ގޮތުގައި އެފް.އީގެ ޓީމު ވަނީ ސެމީ ފައިނަލުގެ ފުރަތަމަ ޖާގަ ކަށަވަރުކޮށްފައެވެ.
ސްކޫލް އޮފް ނަރސިންގ (އެސް.އެން) އާއި ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް) ބައްދަލު ކުރި މެޗު އެސް.އެންގެ ޓީމުން ވަނީ 05-00ގެ ނަތީޖާއަކުން އެފް.އެޗް.ޓީ.އެސްގެ މައްޗަށްކުރި ހޯދާފައެވެ. އެސް.އެންގެ ޓީމު މުބާރާތުގައި ފާހަގަ ވެގެން ގޮސްފައިވަނީ ވާދަވެރި ޓީމެއްގެ ގޮތުގައެވެ. މިރޭގެ މޮޅާއެކު އެސް.އެންގެ ޓީމުން 30 ޕޮއިންޓާއެކު ސެމީ ފައިނަލަށް ދަތުރުކޮށްފައި ވަނީ ގުރޫޕް އޭ ގެ ދެވަނަ ޓީމުގެ ގޮތުގައެވެ.
ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އާއި ސްކޫލް އޮފް މެޑިސިންގ (އެސް.އެމް) ބައްދަލުކުރި މެޗު ސީ.އެފް.އެސްގެ ޓީމުން ވަނީ ފަސޭހަކަމާއެކު 05-00 ގެ ނަތީޖާ އަކުން ކާމިޔާބުކޮށްފައެވެ. ސީ.އެފް.އެސްގެ ޓީމުން ގުރޫޕް ބީ ގެ އެއްވަނަ ޓީމުގެ ގޮތުގައި ސެމީ ފައިނަލުން ޖާގަ ކަށަވަރުކުރިއިރު، އަދި މި މުބާރާތުގެ ސީ.އެފް.އެސްގެ ޓީމުން ކުޅުނު ހުރިހާ މެޗަކުން ވަނީ މޮޅުވެފައެވެ.
އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް) އަދި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) ބައްދަލުކުރި މެޗުން ބީ.އެސްގެ ޓީމުން ވަނީ އެފް.އެސް.އެލްގެ މައްޗަށް ކުރިހޯދާފައެވެ. މި މެޗުގެ ނަތީޖާ އަކީ 04-01 އެވެ. މި މެޗުން އެފް.އެސް.އެލްގެ ޓީމަށް ކާމިޔާބުކުރެވިފައި ވަނީ މިކްސް ޑަބަލްސް ގޭމު އެކަންޏެވެ. ބީ.އެސްގެ ޓީމުން މި ނަތީޖާ އާއެކު ސެމީ ފައިނަލުގެ ފަހު ޖާގަ ކަށަވަރުކުރީ ޖުމުލަ 29 ޕޮއިންޓާއެކުއެވެ.
27 ސެޕްޓެމްބަރ 2024 ވާ ހުކުރު ދުވަހުގެ ރޭ މި މުބާރާތުގެ ސެމީ ފައިނަލުގެ މެޗުތައް އެމް.އެން.ޔޫ އެފް.އީ ޕީ.އީ ހޯލުގައި އޮންނާނެއެވެ. ސެމީ ފައިނަލުގެ ފުރަތަމަ މެޗުގައި ބައްދަލުކުރާނީ އެފް.އީ އާއި އެމް.އެން.ޔޫ ބީ.އެސް އެވެ އަދި ދެވަނަ މެޗުގައި ބައްދަލަކުރާނީ އެސް.އެން އަދި ސީ.އެފް.އެސްގެ ޓީމެވެ. މުބާރާތުގެ ފައިނަލް މެޗް އަންނަ ހޮނިހިރު ދުވަހު ކުޅުމަށްވަނީ ހަމަޖެހިފައެވެ.
