ދިވެހިރާއްޖޭގެ ޤައުމީ ޔުނިވަރސިޓީ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންޓަރ ފެކަލްޓީ ބެޑްމިންޓަން މުބާރާތް 2024ގެ ފައިނަލް މެޗުގައި މިދިޔައަހަރުގެ ރިޕީޓެއް ކަމުގައިވާ ފެކަލްޓީ އޮފް އެޑިއުކޭޝަން (އެފް.އީ) އަދި ސެންޓަރ ފޯ ފައުންޑޭޝަން (ސީ.އެފް.އެސް)ގެ ކުރިމަތިލުމަކަށް ދާއިރު، މާދަމާ ރޭގެ ފައިނަލަކީ ދެ ޓީމަށް ވެސް މުހިންމު މެޗަކަށްވާނެއެވެ.
ހާއްސަކޮށް މިދިޔަ އަހަރުގެ ޗެންޕިއަން އެފް.އީގެ ޓީމު ބަލިކޮށް މުބާރާތުގެ ތަށި ކާމިޔާބުކުރުމަށް، ސީ.އެފް.އެސްގެ ޓީމު ނިކުންނާނީ ކަށިން ހިންވަރު ނެރެގެން ވިއަސް މެޗުން މޮޅުވުމުގެ ވަރުގަދަ އަޒުމުގައިކަން ޔަގީނެވެ. ހަމައެހެންމެ އެފް.އީގެ ޓީމަށް ލިބިފައިވާ މި މުބާރާތުގެ ފަޙުރާއި ޝަރަފުވެރި ކާމިޔާބު ދަމަހައްޓުމަށް، ސީ.އެފް.އެސްގެ ޓީމަށް އިންޗި އެއްގެ މިންވަރުވެސް ދޫ ނުދީ ޓީމުގެ އެންމެ ފުރިހަމަ ކުޅުން ދައްކާނެކަން އެއީ ޝައްކެއްވެސް އޮތްކަމެއް ނޫނެވެ.
ރޭ ކުޅެވިގެން ދިޔަ ފޯރިގަދަ ސެމީ ފައިނަލުގެ މެޗުތަކުގައި ފުރަތަމަ ބައްދަލުކުރީ ފެކަލްޓީ އޮފް އެޑިއުކޭޝަން (އެފް.އީ) އަދި އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް)އެވެ. އެފް.އީގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި ފުރަތަމަ ތިން ޓައި އެފް.އީން ކާމިޔާބުކުރުމުން މެޗުގެ ފަހު ދެ ޓައި ނުކުޅެ އެފް.އީ އަށް ވަނީ މެޗު ލިބިފައެވެ.
ފައިނަލުގެ ފަހު ޖާގަ ކަށަވަރުކުމަށް ސްކޫލް އޮފް ނަރސިންގ (އެސް.އެން) އަދި ސީ.އެފް.އެސް ބައްދަލުކުރި މެޗުގައި އަންހެން ޑަބަލްސްގެ ފުރަތަމަ ޓައި ކާމިޔާބު ކޮށްފައިވަނީ އެސް.އެންގެ ޓީމެވެ. ނަމަވެސް ސީ.އެފް.އެސްގެ ޓީމުން މި މެޗު ކާމިޔާބުކޮށްފައި ވަނީ ދެން ކުޅެވުނު ތިން ޓައި ކާމިޔާބުކޮށްގެންނެވެ. އެހެންކަމުން މިކްސް ޑަބަލްސް ނުކުޅެ މެޗް ވަނީ ސީ.އެފް.އެސް އަށް ލިބިފައެވެ. ހުނަރުވެރި ކުޅުންތެރިން ތަކެއް ހިމެނޭ މި ދެ ޓީމުގެ ފަރާތުންވެސް ވަނީ މޮޅު ކުޅުމެއް ފެނިގެންގޮސްފައެވެ.
އެމް.އެން.ޔޫ.އެސް.ޔޫ އިންޓަރ ފެކަލްޓީ ބެޑްމިންޓަން މުބާރާތުގެ ތަށި ކާމިޔާބުކުރާނެ ޓީމެއް ކަނޑައެޅިގެންދާ މާދަމާ ރޭގެ ފައިނަލް މެޗަށްފަހު މުބާރާތުގެ ނިންމުމުގެ ރަސްމިއްޔާތު އޮންނާނެއެވެ. ނިމިދިޔަ އަހަރު މުޅިން އަލަށް ދަރިވަރުންގެ ޔޫނިއަނުން ބޭއްވި ބެޑްމިންޓަން މުބާރާތުގެ ތާރީޙީ ތަށި ސީ.އެފް.އެސްގެ މައަޗަށް ކުރި ހޯދާ އެފް.އީ އިން ކާމިޔާބުކުރީ، ވަރަށް ވާދަވެރިކޮށް ޓައިތައް ކާމިޔާބުކޮށްގެންނެވެ.
