މިއަހަރުގެ ދުނިޔޭގެ ޞިއްޙަތުގެ ދުވަސް ފާހަގަކުރުމުގެ ގޮތުން ”އެމް.އެން.ޔޫ.އެސް.ޔޫ ދުޅަހެޔޮ އީދު“ ގެ ނަމުގައި އާންމުންނަށް ހުޅުވައިލައިގެން ހިންގި ޚާއްޞަ ހަރަކާތް ކާމިޔާބު ކަމާއެކު ނިންމާލައިފިއެވެ.
މި ހަރަކާތް އިންތިޒާމުކޮށްފައިވަނީ އެމް.އެން.ޔޫ.އެސް.ޔޫ ގެ 3 ގޮތްޕެއް ކަމުގައިވާ މެޑިކޯސް، ހީލަރސް އަދި ނިއަރެސް އިންނެވެ. މިހަރަކާތް ކުރިއަށް ގެންގޮސްފައި ވަނި މިދިޔަ ހޮނިހިރު ދުވަހު މާލޭ އާޓިފިޝަލް ބީޗުގައި ހަވީރު 4:00 ން 06:00 އަށެވެ. މި ހަވީރުގައި ކުޑަކުދިންނަށް ޚާއްސަ ސްޓޯލްތަކާއި އެކި ބާވަތުގެ ޞިއްޙީ ސްކްރީނިން ސްޓޯލްތައް ވަނީ ކުރިއަށް ގެންގޮސްފައެވެ. އެގޮތުން މި ހަރަކާތުގެ ތެރެއިން ގިނަ އަދަދެއްގެ މީހުންނަށް ވަނީ ބަރުދަނާއި އިސްކޮޅު ބެލުމާއި، ލޭގެ ޕްރެޝަރ އަދި ހަކުރު ހުރި މިންވަރު ބެލުން ފަދަ ޚިދުމަތްތައް ފޯރުކޮށްދީފައެވެ.
މީގެ އިތުރުން، ކުޑަކުދިންނަށް ޚާއްސަ ކުޅިވަރުގެ ސްޓޯލްތަކާއި ހަދިޔާ ލިބޭ ކަހަލަ ގޭމާއި އެކި ހުށަހެޅުންތައްވެސް އިންތިޒާމުކޮށްފައިވެއެވެ. މި ސްޓޯލްތައް އިންތިޒާމުކޮށްފައިވަނީ އެމް.އެން.ޔޫ.އެސް.ޔޫގެ ގޮފިތަކުގެ ތެރެއިން މެޑިކޯސް، ނިއަރެސް، ހީލާސް އަދި ތަރަހައިންނެވެ. މީގެ އިތުރުން އެމް.އެން.ޔޫ.އެސް.ޔޫ ޑާންސް ގްރޫޕްގެ ހުށަހެޅުމެއް މި ހަރަކާތުގައި ކުރިއަށް ގެންގޮސްފައިވެއެވެ. އަދި ކެންސަރ ސޮސައިޓީ އޮފް މޯލްޑިވްސްއިން ވެސް މި ހަރަކާތުގައި ބައިވެރިވެ، އާންމުންނަށް މަޢުލޫމާތު ދިނުމުގެ ސެޝަނެއް ކުރިއަށް ގެންގޮސްފައިވާއިރު، އެމް.އެން.ޑީ.އެފްގެ ފަރާތުންވެސް ކުޑަކުދިންނަށް ހާއްސަ ހަރަކާތެއް ހިންގާފައިވެއެވެ. މީގެ އިތުރުން މި ހަރަކާތް ކާމިޔާބުކަމާއެކު ކުރިއަށް ގެންދިއުމަށް މާލެ ސިޓީ ކައުންސިލްގެ ފުރިހަމަ އެއްބާރުލުންވެސް ލިބިފައިވާކަން ފާހަގަކުރަމެވެ.
މިފަދަ ހަރަކާތެއް ފާއިތުވެދިޔަ އަހަރުވެސް މި 3 ގޮފިން ގުޅިގެންވަނީ ކުރިއަށް ގެންގޮސްފައެވެ.
