ފެކަލްޓީ އޮފް ހެލްތް ސައިންސަސް (އެފް.އެޗް.އެސް)ގެ އައު ޑީން ޑރ. އައިޝަތު ޝަނޫރާ އާއި ހީލަރސްގެ ހިންގާ ކޮމެޓީގެ މެމްބަރުން ބައްދަލު ކޮށްފިއެވެ.
އެފް.އެޗް.އެސް.ގެ މީޓިންގ ރޫމުގައި އޮގަސްޓު 16 ވީ ބުރާސްފަތި ދުވަހު ބޭއްވުނު މި ބައްދަލުވުމުގައި ހީލަރސްއިން ވަނީ މި ސެމިސްޓަރގައި ކުރިއަށް ރޭވިފައި ހުރި ހަރަކާތްތަކުގެ ތަފްސީލު ޑީންއާ ހިއްސާކޮށްފައެވެ. މީގެ އިތުރުން މި ބައްދަލުވުމުގައި މިއަހަރު ފާހަގަކުރަން ހުރި މުހިންމު ދުވަސްތައް ފާހަގަކުރުމަށް ހަރަކާތްތައް ބޭއްވުމާއި މެދުވެސް ވަނީ މަޝްވަރާކުރެވިފައެވެ.
މި ބައްދަލުވުމުގައި ވާހަކަ ދައްކަވަމުން ޑީން ޝަނޫރާ ވަނީ ވީހާވެސް ގިނަ ދަރިވަރުން ބައިވެރިކޮށްގެން ހަރަކާތްތައް ރޭވުމަށާއި، މީގެ ކުރިން ބާއްވާ ހަރަކާތްތަކާއި ތަފާތު ހަރަކާތްތައް ރޭވުމަށް ސަމާލުކަން ދިނުމަށް އެދިވަޑައިގަންނަވާފައެވެ.
މީގެ އިތުރުން ޑީން ވަނީ މިއަހަރު ހީލަރސްއިން ހިންގަން ހުރި ހަރަކާތްތަކަށް އެފް.އެޗް.އެސް މެނޭޖުމަންޓުގެ ފުރިހަމަ އެއްބާރުލުން ލިބިގެންދާނެކަމުގެ ޔަގީންކަން ދެއްވާފައެވެ.
އެފް.އެޗް.އެސް ގެ ކުރީގެ ޑީން ޑރ. ފަޒީލާ ވަހީދަކީ ވެސް ހީލަރސް އާއި ވަރަށް ގާތް ގުޅުމެއް ބާއްވައި، ހީލަރސްގެ ފަރާތުން ކުރިއަށް ގެންދާ ކޮންމެ ހަރަކާތަކަށްވެސް ވަރަށް ފުރިހަމަ އެއްބާރުލުމެއް ދެއްވި ފަރާތެކެވެ. ހީލަރސްގެ މި ދައުރުގެ ހިނަގާ ކޮމެޓީ މެމްބަރުންގެ އުންމީދަކީ މި ސެމިސްޓަރުގައި އައު ޑީން ޑރ އައިޝަތު ޝަނޫރާ އާއެކުވެސް ކާމިޔާބު ދައުރެއް ނިންމާލުމެވެ.
ހީލަރސްގެ ފަރާތުން އަބަދުވެސް އެފް.އެޗް.އެސްގެ މެނޭޖްމެންޓްގެ ފަރާތުން ލިބެމުންދާ އެހީތެރިކަމާއި އެއްބާރުލުމަށް ޝުކުރުވެރިވެއެވެ.
