ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އާއި އެޑްވެންޗަރއަޕް ގުޅިގެން ޓީމް ބިލްޑިން އިވެންޓެއް ކުރިއަށް ގެންގޮސްފިއެވެ.
އެމް.އެން.ޔޫގެ ދަރިވަރުންނަށް އަމާޒުކޮށްގެން މިއަދު އެމް.އެން.ޔޫ އެފް.އީ.ޕީ.އީ ހޯލުގައި ކުރިއަށް ގެންދެވުނު މިހަރަކާތުގެ ތެރެއިން ދަރިވަރުންނަށް ޓީމް ބިލްޑިންއާ ގުޅޭ ގިނަ ކަންތައްތަކެއް ވަނީ ދަސްކޮށްދެވިފައެވެ. މިހަރަކާތުގައި އެމް.އެން.ޔޫ ގެ 40އަށް ވުރެ ގިނަ ދަރިވަރުން ވަނީ ބައިވެރިވެފައެވެ.
އެޑްވެންޗަރއަޕް އަކީ މިހާރު ރާއްޖޭގައި، އަދި ހާއްސަކޮށް ޒުވާނުންގެ މަދުގައި މަޤްބޫލުކަން ހޯދަމުން އަންނަ ކުންފުންޏެކެވެ. އެޑްވެންޗަރއަޕްގެ މައިގަނޑު މަޤްސަދަކީ ބޭރުގެ ގައުމުތަކުގައި ހުންނަ އެމިއުޒްމަންޓް ޕާކުތަކުގައި ކުޅެވޭ ފަދަ ކުޅިވަރުތައް ކުޅެ އެތަންތަނުގެ ތަޖުރިބާ ކޮށްލުމުގެ ފުރުސަތު ދިވެހިންނަށް ފަހިކޮށްދިނުމެވެ. އަދި މީގެ ތެރެއިން ޒުވާންނުންނަށް ޓީމް ބިލްޑިން ފަދަ ހުނަރުތައް ތަރަށްޤީ ކުރުމަށް ހަރަކާތްތައް ހިންގުމެވެ.
ކުރިއަށް އޮތްތަނުގައިވެސް އެޑްވެންޗަރއަޕް އާއި އެމް.އެން.ޔޫ.އެސް.ޔޫ ގުޅިގެން އިތުރު ހަރަކާތްތަކެއް ކުރިއަށް ގެންދިއުމަށް ވަނީ މަޝްވަރާކުރެވިފައެވެ.
އެމް.އެން.ޔޫ.އެސް.ޔޫ އަކީ އަބަދުވެސް ދަރިވަރުންގެ ކުރިއެރުމަށް ގިނަ މަސައްކަތްތަކެއް ކުރަމުން އަންނަ ޖަމިއްޔާއެކެވެ. އެގޮތުން އެކި އެކި ފަރާތްތަކާ ގުޅިގެން މީގެ ކުރިންވެސް ދަރިވަރުންނަށް ވަނީ ތަފާތު ފުރުސަތުތައް ފަހި ކޮށްދެވިފައެވެ.
