ދިވެހި ރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ ފަރާތުން ރާއްޖޭގައި ހުންނަ ޗައިނާ އެމްބަސީގެ އިސްބޭފުޅުންނާ ބައްދަލުކުރައްވައިފިއެވެ.
މިއަދު މެންދުރު ޗައިނާ އެމްބަސީގައި ކުރިއަށްދިޔަ މި ބައްދަލުވުމުގައި ދަރިވަރުންގެ ޔޫނިއަންގެ ހިންގާ ކޮމެޓީގެ މެމްބަރުންނާއި ޗައިނާ އެމްބަސީގެ އިސްބޭފުޅުންނާއެކު ވަނީ ގިނަ މަޝްވަރާތަކެއް ކުރެވިފައެވެ. އެގޮތުން ދެފަރާތުން ކުރިއަށް ރޭވިފައި ހުރި ހަރަކާތްތަކާއި، ކުރިއަށް އޮތްތަނުގައި އެމްބަސީ އާއި ޔޫނިއަން ގުޅިގެން އެކުގައި މަސައްކަތްކުރެވޭނެ ދާއިރާތަކާއި ގުޅޭގޮތުން ދެ ފަރާތުގެ ހިޔާލު ބަދަލުކުރެވުނެވެ.
މީގެއިތުރުން ޗައިނާ އެމްބަސީގެ ފަރާތުން ބައިވެރިވެ ވަޑައިގެންނެވި ބޭފުޅުންވަނީ ޗައިނާއިން ރާއްޖޭގެ ޒުވާނުންނަށް ފަހިކޮށްދެވިފައިވާ ގިނަ ސްކޮލަޝިޕްތަކާއި ގުޅޭ މައުލޫމާތުތައް ހިއްސާކުރައްވާފައެވެ. އަދި ޗައިނާގެ ކޮލެޖް ޔުނިވަރސިޓީތަކާއި، ދިވެހި ރާއްޖޭގެ ޤައުމީ ޔުނިވަރސިޓީއާއި ގުޅިގެން ސްޓޫޑެންޓްސް އެކްސްޗޭންޖް ޕްރޮގްރާމްތައް މިއަހަރުތެރޭ ހަމަޖެއްސުމަށް މަސައްކަތް ކުރައްވާނެކަމަށް ވެސް ވަނީ ވިދާޅުވެފައެވެ. އެބޭފުޅުން ފާހަގަ ކުރެއްވި ގޮތުގައި ދެ ޤައުމުގެ ބަދަހި ގުޅުން ދެމެހެއްޓުމަށްޓަކައި ޒުވާނުންގެ މެދުގައި މިފަދަ ޕްރޮގްރާމްތައް ތައާރަފްކުރެވި އެއްބަޔަކު އަނެއް ބައެއްގެ ސަގާފަތާއި ތާރީޚީ ކަންތައްތަކަށް އެގި ފަރިތަވުމަކީ މުހިންމުކަމެކެވެ.
އަދި ހަމައެހެންމެ އެމްބަސީގެ ހަރަކާތްތަކުގައި ދަރިވަރުންގެ ޔޫނިއަށްގެ އިސްވާރުންނަށް ފުރުސަތުތައް ފަހިކޮށްދެއްވާނެ ކަމަށް އެބޭފުޅުން ވަނީ ވިދާޅުވެފައެވެ. ޔޫނިއަންގެ ފަރާތުން ވަނީ ޗައިނާ އެމްބަސީއިން އެދިލައްވާ ކަންކަމުގައި ޔޫނިއަންގެ ފުރިހަމަ އެއްބާރުލުން އަބަދުވެސް ދެއްވާނެ ކަމުގެ ޔަޤީންކަން އެބޭފުޅުންނަށް އަރުވާފައެވެ.
ދަރިވަރުންގެ ޔޫނިއަންއަކީ އަބަދުވެސް ދަރިވަރުންގެ ލާބައާއި ކުރިއެރުމަށް ގިނަ މަސައްކަތްތަކެއް ކުރަމުން އަންނަ، މިވަގުތު ރާއްޖޭގައި އޮތް އެންމެ ބޮޑު މަދަނީ ޖަމިއްޔާކަން މިފުރުސަތުގައި ފާހަގަ ކޮށްލަންޖެހެއެވެ.
