ދިވެހިބަހުގެ އެކަޑަމީގެ ފަރާތުން އިންތިޒާމުކޮށްގެން، އަލްއުސްތާޛް އިބްރާހީމް ޝިހާބުގެ ވާދައިގެ ތަށްޓަށް ބާއްވާ ވާހަކަދެއްކުމުގެ 37 ވަނަ ޤައުމީ މުބާރާތް (ބަހުސް ކެޓަގަރީ)ގައި އޭ.ސީ.ސީ.އާރު.ސީ އަތުން އެމް.އެން.ޔޫ.އެސް.ޔޫގެ ޓީމު މޮޅުވެއްޖެއެވެ.
19 ފެބރުވަރީ ވީ ހޯމަ ދުވަހުގެ ރޭ އައި.ޔޫ.އެމް ހޯލުގައި ކުރިއަށްދިޔަ ފޯރިގަދަ މި ބަހުސްގެ މަޢުޟޫއަކީ “ ރާއްޖެ ތަރައްޤީ ކުރުމަށް ބޮޑަށް ބޭނުންވަނީ ލާމަރުކަޒީ ނިޒާމު އިތުރަށް ތަރައްޤީކުރުމެވެ.“ ޔޫނިއަންގެ ޓީމުން ވަކާލާތު ކުރީ މަޢުލޫއާއި އެއްކޮޅަށެވެ. މިއީ މި މުބާރާތުގައި ޔޫނިއަންގެ ފުރަތަމަ ބަހުސް އެވެ.
އެމް.އެން.ޔޫ.އެސް.ޔޫގެ ކުރީގެ ރައީސް އަލްއުސްތާޛް އަލީ ރަޝީދުގެ ފުރިހަމަ ލަފަޔާއި އިރުޝާދުގެ ދަށުން ތަމްރީނުވަމުން އަންނަ މިފަހަރުގެ ޔޫނިއަން ތަމްސީލުކުރާ ޓީމުގައި ހިމެނެނީ އިސްމާއިލް ރަޒީން އިމްރާނާއި، މުހައްމަދު އައިޝް މުސްތަފާއާއި، މުހައްމަދު އަޔާޝް އަލީ އަދި އަބްދުﷲ އަނޫފްގެ އިތުރުން އަހުމަދު ޝާބިންއެވެ.
މި ބަހުސްގައި ޔޫނިއަންގެ ޓީމަށް 967.50 ޕޮއިންޓް ލިބުނުއިރު އޭ.ސީ.ސީ.އާރު.ސީ ޓީމަށް ލިބުނީ 878.50 ޕޮއިންޓެވެ. ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެމް.އެން.ޔޫ.އެސް.ޔޫ ޓީމުގެ މުހައްމަދު އައިޝް މުސްތަފާއެވެ.
އެމް.އެން.ޔޫ.އެސް.ޔޫގެ ބަހުސެއް ދެން އޮންނާނީ އަންނަ ބުރާސްފަތިދުވަހުގެރެޔެވެ. މި ބަހުސްގައި އެމް.އެން.ޔޫ.އެސް.ޔޫ އިން ބައްދަލުކުރާނީ އެމް.ޓީ.ސީ.ސީގެ ޓީމާއި ދެކޮޅަށެވެ.
މި މުބާރާތަކީ އަލްއުސްތާޛް އިބްރާހީމް ޝިހާބުގެ ވާދައިގެ ތައްޓަށް ބާއްވާ ވާހަކަދެއްކުމުގެ ޤައުމީ މުބާރާތުގައި ހިމެނޭ އޮފީސް/ކްލަބް/ޖަމިއްޔާ/ޖަމާއަތްތަކުގެ ބަހުސް ކެޓަގަރީއެވެ. މި ބަހުސް މުބާރާތުގައި ޖުމްލަ 3 ޓީމަކުން ވަނީ ބައިވެރިވެފައެވެ.
މިދިޔަ އަހަރުގެ މުބާރާތުގައި ދަރިވަރުންގެ ޔޫނިއަނުން ވަނީ ރަނަރއަޕްކަން ހޯދާފައެވެ. އަދި މި އަހަރުގެ އަމާޒަކީ ޗެމްޕިއަން ތަށި ހޯދުންކަމަށް ބަހުސް ޓީމުން ބުނެއެވެ.
