ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ މާލޭ ކެމްޕަހުގެ ގޮފިތަކުގެ ތެރެއިން އިންތިޚާބަށް ގޮސްފައިވާ ގޮފިތަކުގެ ވޯޓުލުން މިއަދު (22 ފެބުރުވަރީ 2024)ގެ ހެނދުނުން ފެށިގެން ކުރިއަށް އެބަދެއެވެ.
ޖުމްލަ 3 ގޮތްޕެއް އިންތިޚާބަށް ގޮސްފައިވާއިރު، އެއީ އެ 3 ގޮފިން ވެސް އެންމެ މަޤާމެކެވެ.
ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގައި ޤާއިމް ކޮށްފައިވާ ގޮފި (އެސް.އެސް.އެލް)އިން އިންތިހާބަށް ގޮސްފައިވާ މަޤާމަކީ ސެކްރެޓަރީގެ މަގާމެވެ. އަދި ފެކަލްޓީ އޮފް ހެލްތް ސައިންސަސްގެ ގޮފި (ހީލާރސް) އިން ހަޒާންދާރުގެ މަޤާމާއި، ސެންޓަރ ފޯރ ފައުންޑޭޝަންގެ ގޮފި (ތަރަހަ)އިގެ ނައިބު ރައީސް (އިތުރު ހަރަކާތް) މަޤާމެވެ.
މި އިންތިޚާބުގައި ޖުމްލަ 3 ވޯޓު ފޮށި ބެހެއްޓިފައިވާއިރު، ވޯޓުލުން ކުރިއަށް ދަނީ ފެކަލްޓީ އޮފް ހެލްތް ސައިންސަަސް (އެފް.އެޗް.އެސް)ގަ އާއި އެމް.އެން.ޔޫ ސެންޓަރަލްގައެވެ.
އެގޮތުން އެމް.އެން.ޔޫ ސެންޓަރަލްގައި ބެހެއްޓިފައިވާ 2 ވޯޓު ފޮށްޓަށް ވޯޓު ލުމުގެ ހައްގު ލިބިފައިވަނީ ސެންޓަރ ފޯ ފައުންޑޭޝަންގެ ދަރިވަރުންނާއި އަދި ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގެ ދަރިވަރުންނަށެވެ. އެފް.އެޗް.އެސްގައި ބެހެއްޓިފައިވާ ފޮށްޓަށް ވޯޓުލުމުގެ ހައްގު ލިބިފައިވަނީ ފެކަލްޓީ އޮފް ހެލްތް ސައިންސަސްގެ ދަރިވަރުންނަށެވެ.
އެމް.އެން.ޔޫ ސެންޓަރަލްގައި ބެހެއްޓިފައިވާ ފޮށިތަކަށް ވޯޓުލުން މިއަދު ހެދުނު 10 ޖެހިއިރު ފެށިފައިވާއިރު، އެފް.އެޗް.އެސް.ގެ ފޮށްޓަށް ވޯޓުލުން ފެށިފައިވަނީ 11 ޖެހިއިރުއެވެ.
ކުރިޔަށް މިދާ އެމް.އެން.ޔޫ.އެސް.ޔޫ މާލެ ކެމްޕަހުގެ ގޮފިތަކުގެ އިންތިހާބުގައި ޖުމްލަ 800 ވުރެ ގިނަ ދަރިވަރުން ވަނީ ވޯޓު ލެވޭ ލިސްޓުގައި ރަޖިސްޓރ ވެފައެވެ. ސެންޓަރ ފޯ ފައުންޑޭޝަންގެ ދަރިވަރުންނާއި އަދި ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގެ ދަރިވަރުންގެ ވޯޓު ފޮށި މިއަދު ހަވީރު 16:00 މިނެޓުގައި ބައްދުކުރުމަށް ހަމަޖެހިފައި ވާއިރު، ފެކަލްޓީ އޮފް ހެލްތް ސައިންސަސްގެ ދަރިވަރުން ވޯޓުލުމުގެ ސުންގަޑިއަކީ މިއަދު ހަވީރު 17:00އެވެ.
މި އިންތިހާބުގައި ވޯޓުލުމަށް ހާޒިރުވާއިރު، އެމް.އެން.ޔޫގެ ސްޓޫޑެންޓް އައިޑީ ކާޑު ހިފައިގެން ހާޒިރުވުމަށް އެމް.އެން.ޔޫ.އެސް.ޔޫއިން އިލްތިމާސް ކުރެއެވެ. އަދި ސްޓޫޑެންޓް އައިޑީ ކާޑު ނެތްނަމަ، ވޯޓަރސް ގެރެންޓީ ސްލިޕްކޮޅާއެކު ދިވެހި ރައްޔިތެއްކަން އަންގައިދޭ ކާޑު ގެނައުމަށް އިލްތިމާސް ކުރެއެވެ..
