ދިވެހިރާއްޖޭގެ ޤައުމީ ޔުނިވަރސިޓީ ދަރިވަރުން ޔޫނިއަންގެ މާލޭ ކެމްޕަހުގެ ގޮފިތަކުގެ ތެރެއިން އިންތިޚާބަށް ގޮސްފައިވާ ގޮފިތަކުގެ ވޯޓުލުން ނިމި ނަތީޖާ އިއުލާންކޮށްފިއެވެ.
ޖުމްލަ 3 ގޮތްޕެއް އިންތިޚާބަށް ގޮސްފައިވާއިރު، އެއީ ފެކަލްޓީ އޮފް ލޯ އެންޑް އިސްލާމިކް ސްޓަޑީޒްގައި ޤާއިމް ކޮށްފައިވާ ގޮފި (އެސް.އެސް.އެލް)އިން ސެކްރެޓަރީގެ މަގާމާއި، ފެކަލްޓީ އޮފް ހެލްތް ސައިންސަސްގެ ގޮފި (ހީލާރސް) އިން ހަޒާންދާރުގެ މަޤާމާއި އަދި ސެންޓަރ ފޯރ ފައުންޑޭޝަންގެ ގޮފި (ތަރަހަ)އިގެ ނައިބު ރައީސް (އިތުރު ހަރަކާތް) މަޤާމެވެ.
އެމް.އެން.ޔޫ ސެންޓަރަލްގައި ބެހެއްޓިފައިވާ ފޮށިތަކަށް ވޯޓުލުން ބުރާސްފަތު ދުވަހުގެ ހެދުނު 10 ޖެހިއިރު ފެށިފައިވާއިރު، އެފް.އެޗް.އެސް.ގެ ފޮށްޓަށް ވޯޓުލުން ފެށިފައިވަނީ 11 ޖެހިއިރުއެވެ. އެގޮތުން ސެންޓަރަލްގައި ބެހެއްޓިފައިވާ 2 ފޮށީގެ ވޯޓުލުން ހަވީރު 16:00 ށް އަދި ފެކަލްޓީ އޮފް ހެލްތް ސައިންސަސްގައި ބެހެއްޓިފައިވާ ފޮށީގެ ވޯޓުލުން 17:00 ނިންމުމަށް ހަމަޖެހިފައިވީ ނަމަވެސް ބައެއް ކެނޑިޑޭޓުންގެ އެދިލުމާއި، ގިނަ ދަރިވަރުންގެ ކުލާސްތައް ނިމޭ ގަޑިއަށް ބަލައި ދެ ފޮށީގެ ވޯޓުލުންވެސް ނިންމާލައިފައި ވަނީ އެދުވަހުގެ އޮރުއޮއްސި 18:00 ގައެވެ.
ވޮޓު ގުނުމުގެ ކަންކަން 19:00ގައި އެމް.އެން.ޔޫ އެފް.އީ ޕީ.އީ ހޯލުގައިވަނީ ކުރިއަށް ގެންގޮސްފައެވެ.
މިއިންތިހާބުގައި ޖުމުލަ 400 އަށް ވުރެ ގިނަ ދަރިވަރުން ވޯޓު ލާފައިވެއެވެ.
22 ފެބުރުވަރީ 2024 ވީ ބުރާސްފަތި ދުވަހު ބޭއްވި އިންތިހާބުގެ ނަތީޖާ ތިރީގައި އެވަނީއެވެ.
ހީލާރސް (ފެކަލްޓީ އޮފް ހެލްތު ސައިންސަސް):
01 ހަޒާންދާރު: ޝަރަފުﷲ ޝަރީފް، ވެސްޓްޔާރޑް / ގއ. މާމެންދޫ
އެސް.އެސް.އެލް (ފެކަލްޓީ އޮފް ޝަރީޢާ އެންޑް ލޯ):
01 ސެކްރަޓަރީ: އައިޝާތު މައިޝާ، ފިނިފެންމާގެ / ބ. ކެންދޫ
ތަރަހަ (ސެންޓަރ ފޯރ ފައުންޑޭޝަން ސްޓަޑީސް):
01 ނައިބު ރައީސް (އިތުރު ހަރަކާތް): ޒައިން އަބދުﷲ ޖަމީލް، ރިޔާޒް / ސ.ހިތަދޫ
ކެނޑިޑޭޓުންގެ ފޯރިގަދަ ކެމްޕެއިނަކަށް ފަހު މި އިންތިހާބު އަމާން ކަމާއެކު ނިންމާލުމުގައި ހުރިހާ ކެނޑިޑޭޓުންނާއި، މަންދޫބުން އަދި ގޮފި ތަކުން ލިބުނު އެއްބާރުލުން، އިންތިހާބުގެ އިލެކްޝަން ކޮމެޓީގެ ޗެއަރ ގާނިމް ފާހަގަ ކުރެއްވިއެވެ. އަދި ވަކިން ހާއްސަކޮށް ޔޫނިންއަންގެ އިސްވާރުންގެ މަސައްކަތާއި، ޔޫނިއަންގެ ހިންގާކޮމެޓީގެ ފަރާތުން ލިބުނު އެހީތެރިކަން ފާހަގަ ކުރެއްވިއެވެ.
އެމް.އެން.ޔޫ.އެސް.ޔޫ ގޮފިތަކުގެ ހިންގާ ކޮމެޓީތަކަށް އަލަށް އިންތިހާބުވި މެމްބަރުނަށް ބާއްވާ ގޮފިތަށް އިފްތިތާހުކުރުމުގެ ޖަލްސާ ބޭއްވުމަށް ހަމަޖެހިފައިވަނީ މި މަހުގެ 26 ވާ ހޯމަ ދުވަހުއެވެ.
