”ނިއަރެސް މާހެފުން“ ބާއްވައިފި!

ސްކޫލް އޮފް ނާރސިންގ (އެސް.އެން)ގެ ދަރިވަރުންނަށް ހާއްސަ ކޮށްގެން ނިއަރެސް އިން މާހެފުމެއް ބާއްވައިފިއެވެ.

މިއީ ނިއަރެސް ގެ ހިންގާ ކޮމިޓީ ގެ މެމްބަރުންނާއި، ކުލާސް ތަކުގެ ރެޕްރެޒެންޓޭޓިވްސް އާއި، ދަރިވަރުން ގެ އެހީތެރިކަމާއެކު ކުރިއަށް ގެންދެވުނު މާހެފުމެކެވެ.

ނިއަރެސް އިން މި މާހެފުން ކުރިއަށް ގެންގޮސްފައިވަނީ 7 މާރިޗް ވީ ބުރާސްފަތި ދުވަހުގެ ރޭ އެސް.އެން ގެ ކުލާސް ރޫމެއްގައެވެ. މި މާހެފުމުގައި އެސް.އެންގެ ދަރިވަރުންނާއި، ނިއަރެސްގެ މިހާރު އަދި ކުރީގެ ހިންގާ ކޮމިޓީގެ މެމްބަރުންނާއި،  މެޑިކޯސްގެ ރައީސް އަދި ހީލާރސް ރައީސާގެ އިތުރުން އެސް.އެން ގައި ކިޔަވާދެއްވާ ބައެއް ދާރިސުން ވެސް ވަނީ ބައިވެރިވެފައެވެ.

މަޖާ އަދި އުފާވެރި މާހައުލެއްގައި ކުރިއަށް ދިޔަ، މި މާހެފުމުގައި ދަރިވަރުން ގްރޫޕް ތަކަށް ބަހާލެވިގެން ދީނީ ކުއިޒެއް ކުރިއަށް ގެންގޮސް މި ކުއިޒުން މޮޅުވި ގުރޫޕަށް ވަނީ އަގު ހުރި ހަދިޔާއެއް ވެސް ދީފައިއެވެ.

ނިއަރެސްއިން އަންނަނީ އެސް.އެން ގެ ދަރިވަރުންނަށް ހާއްސަ ކޮށްގެން ތަފާތު ގިނަ ހަރަކާތް ތަކެއް ރާވާ ހިންގަމުންނެވެ.