އެމް.އެން.ޔޫ.އެސް.ޔޫ-މެޑިކޯސް ’ހިދާޔަތު‘ ދަރުސް ޕްރޮގްރާމް 1445 ގެ ފުރަތަމަ ދަރުސް ކާމިޔާބުކަމާއެކު ނިންމާލައިފިއެވެ.
މި ޕްރޮގްރާމަކީ 1445 ވަނަ އަހަރުގެ ރަމަޟާން މަހާ ދިމާކޮށް މެޑިކޯސްއިން އިސް ނަގައިގެން، ދަރިވަރުންގެ ޔޫނިއަން އާއި ގުޅިގެން ކުރިޔަށްގެންދާ ހަރަކާތެކެވެ.
ހުކުރު ދުވަހުގެ ރޭ އޮތް، މި ޕްރޮގްރާމުގެ ފުރަތަމަ ދަރުސް ކުރިޔަށް ގެންދެވިފައިވަނީ ”ޙައްޤު ހޯދުމަށް ކުރި ދަތުރު“ މި މައުޟޫޢަށެވެ. މި މަޢުޟޫއަށް އިންސާފު ކޮށްދެއްވާފައިވަނީ އައްޝައިޚް މުޙައްމަދު ޣާލިބް ޝާހިދުއެވެ. މައުޟޫޢަށް އިންސާފުކޮށްދެއްވުމަށްފަހު ދަރިވަރުންގެ ސުވާލުތަކަށް ޖަވާބުދެއްވުމަށްޓަކާ ޝައިޚް ވަނީ ވަގުތުކޮޅެއް ހުސްކޮށްދެއްވާފައެވެ. ރޭގެ ދަރުހުގައި އެކި ފެކަލްޓީތަކުގެ ދަރިވަރުން ބައިވެރިވެފައިވެއެވެ.
މި ހަރަކާތް ރަމަޟާން މަހުގެ ކޮންމެ ހަފުތާއެއްގައި ވެސް ކުރިޔަށް ގެންދިޔުމަށް ވަނީ ހަމަޖެހިފައެވެ. މި ފެށޭ ހަފުތާގެ ދަރުސް ބޭއްވުމަށް ހަމަޖެހިފައިވަނީ އަންނަ ހުކުރު ދުވަހުގެ ރޭ އެމް.އެން.ޔޫ ބިޒްނަސް ސްކޫލުގެ އޮޑިޓޯރިއަމްގައެވެ.
