އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީބޯޅަ މުބާރާތުގައި މިރޭ އަންހެން ޑިވިޝަނުގައި އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް) އާއި ފެކަލްޓީ އޮފް އެޑިއުކޭޝަން (އެފް.އީ)ގެ ޓީމު ބައްދަލުކުރި މެޗު ކާމިޔާބުކޮށް ބީ.އެސްގެ ޓީމުން ވަނީ ސެމީ އަށް ދަތުރުކޮށްފައެވެ.
މި މެޗު ބީ.އެސް އިން ކާމިޔާބިކޮށްފައިވަނީ ސީދާ ދެ ސެޓުން 25-20 އަދ 25-23 ގެ ނަތީޖާއަކުންނެވެ. ވާދަވެރި ކުޅުމެއް ދެ ޓީމުގެ ފަރާތުން ފެނިގެންދިޔަ މި މެޗުގައި އެފް.އީގެ ޓީމުން ދެ ވަނަ ސެޓުގައިވަނީ ކުޅުން ރަނގަޅުކޮށް ވަރަށް އެއްވަރަށް ޕޮއިންޓުތައް ހޯދަމުންގޮސް 10 ވަނަ ޕޮއިންޓާއި ހަމައިން މެޗުގެ ލީޑުނަގާފައެވެ. ނަމަވެސް ބީ.އެސް އިން ފަހަތުން އަރާ ވަނީ މި ސެޓް ގެންގޮސްފައެވެ. މި މެޗުގެ މޮޅު ކުޅުންތެރިޔާއަކީ ބީ.އެސް ޓީމުގެ މުހިންމު ކުޅުންތެރިއެއް ކަމަށްވާ ޖާޒީ ނަމްބަރ 19 މާޔާ ހުސައިން ސޮލާހުއެވެ. މާޔާ އަންނަނީ މި މުބާރާތުގައި ތަފާތު ކުޅުމެއް ދައްކަމުންނެވެ. މާޔާގެ ޝޮޓު ތަކަކީ ބާރު އަދި ރީތި ޝޮޓުތަކެކެވެ.
ގުރޫޕް ބީގެ އަންހެން ޑިވިޝަނުގައި ދެން ކުޅެވިގެންދިޔައީ ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އާއި ސްކޫލް އޮފް މެޑިސިން (އެސް.އެމް) ބައްދަލުކުރި މެޗެވެ. މި މެޗު ފަސޭހަކަމާއެކު އެފް.އެޗް.އެސް އިން ކާމިޔާބުކޮށް ވަނީ މި މުބާރާތުގެ އެ ޓީމުގެ ފުރަތަމަ މޮޅު ހޯދާފައެވެ. އެފް.އެޗް.އެސް އިން ސެޓުތައް ގެންގޮސަފައިވަނީ 25-17 އަދި 25-12 އިންނެވެ. މެޗުގެ މޮޅު ކުޅުންތެރިޔާ އަށް ހޮވިފައިވަނީ އެފް.އެޗް.އެސްގެ ޖާޒީ ނަމްބަރ 10 ފާތިމަތު މާޔާއެވެ.
މުބާރާތް ނިމުމަކާ ގާތްވެފައި ވާއިރު މިހާރު ކުޅެވެމުން މިދަނީ ގުރޫޕް ސްޓޭޖުގެ ފަހު މެޗުތަކެވެ. އެގޮތުން މާދަމާ ރޭ ކުޅުމަށް ތާވަލުކުރެވިފައިވަނީ ގުރޫޕް އޭ ގެ މެޗުތަކެވެ.
ކުރިއަށްމިދާ ފޯރިގަދަ ވޮލީ މުބާރާތަކީ ދަރިވަރުންގެ ޔޫނިއަނުން ބާއްވަމުން އަންނަ މީގެ 10 ވަނަ މުބާރާތެވެ. މިއަހަރުގެ މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ މެއި 11 ވަނަ ދުވަހުއެވެ.
