ކުރިއަށްމިދާ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އިންޓަރ ފެކަލްޓީ ވޮލީބޯޅަ މުބާރާތުގައި މިރޭ ކުޅެވުނު އަންހެން ޑިވިޝަނުގެ ގުރޫޕް އޭގެ މެޗެއްކަމުގައިވާ ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އަދި ފެކަލްޓީ އޮފް އާރޓްސް (އެފް.އޭ) ބައްދަލުކުރި މެޗު ސީ.އެފް.އެސް ކާމިޔާބުކޮށް މި ގުރޫޕުގެ ދެވަނަ ޓީމުގެ ގޮތުގައި ސެމީއިން ޖާގަ ހޯދައިފިއެވެ.
މި މެޗުގެ ދެ ސެޓުވެސް ފަސޭހަކަމާއެކު ސީ.އެފް.އެސް އިން ގެންގޮސްފައިވަނީ 25-03 އަދި 25-14 އިންނެވެ. ސީ.އެފް.އެސް ޓީމުގެ ޖާޒީ ނަމްބަރ 12 އައިސަތު ނައުރީން މެޗުގެ މޮޅު ކުޅުންތެރިޔާގެ މަގާމު ހާސިލްކޮށްފައިވާއިރު، ނައުރީން އަންނަނީ މި މުބާރާތުގައި ތަފާތު ކުޅުމެއްދައްކަމުންނެވެ.
މި ގުރޫޕްގެ އެއްވަނަ ޓީމުގެ ގޮތުގައި މިހާރުވެސް ސެމީ ފައިނަލުން ޖާގަ ހޯދާފައިވާ ސްކޫލް އޮފް ނާރސިންގ (އެސް.އެން) އާއި ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް) ބައްދަލު ކުރިމެޗުގައި އެސް.އެން އިން މެޗުގެ ދެ ސެޓް ވެސް ގެންގޮސްފައިވަނީ 20 ޕޮއިންޓަށް ވުރެ ބޮޑު ފަރަގަކާއެކުއެވެ. މި މެޗުގެ ނަތީޖާއަކީ 25-05 އަދި 25-03 އެވެ. އެންމެ މޮޅު ކުޅުންތެރިޔަކަށް ހޮވިފައިވަނީ މި މެޗުގައި ފެންވަރުގެ ސާރވިސް ތަކެއްކޮށް އެސް.އެންގެ ޓީމަށް ގިނަ ޕޮއިންޓުތަކެއް ހޯދައިދީފައިވާ ޖާޒީ ނަމްބަރ 19 މަނާލް އިސްމާއިލް ރާޝީދެވެ.
08 މެއި ވާ ބުދަ ދުވަހު މި ގުރޫޕުގެ އެންމެ ފަހު މެޗުތައް ކުޅުމަށް ވަނީ ހަމެޖެހިފައެވެ. އަދި ސެމީ ފައިނަލް މެޗުތައް ކުޅުމަށް ތާވަލުކުރެވިފައިވަނީ މެއި 9 އަދި 10 ވަނަ ދުވަހުގެ ރޭ އެފް.އީ ޕީ.އީ ހޯލުގައެވެ.
