ދިވެހިރާއްޖޭގެ ޤައުމީ ޔުނިވަރސިޓީ ދަރިވަރުންގެ ޔޫނިއަންގެ އިންޓަރ ފެކަލްޓީ ވޮލީބޯޅަ މުބާރާތުގެ ފައިނަލުގައި އެމް.އެން.ޔޫ ބިޒުނަސް ސްކޫލް (އެމް.އެން.ޔޫ ބީ.އެސް) އާއި ބައްދަލުކޮށް ސްކޫލް އޮފް ނާރސިން (އެސް.އެން) އިން މެޗު ކާމިޔާބުކޮށް މުބާރާތުގެ ތަށި މިލްކުކޮށްފިއެވެ.
މި ފޯރިގަދަ މެޗު އެސް.އެން ޓީމުން ކާމިޔާބުކޮށްފައިވަނީ ތިން ސެޓް އެއް ސެޓުންނެވެ. މެޗުގެ ފުރަތަމަ ދެ ސެޓު އެސް.އެން އިން ގެންދިޔައީ 25-19 އިންނެވެ. ދެވަނަ ސެޓު ބީ.އެސް އިން 23-25 ގެންދިޔުމާއެކު މެޗުގެ ފޯރި އިތުރަށް ގަދަވެގެންދިޔައެވެ. ތިންވަނަ ސެޓުގައި ދެ ޓީމުގެ ފަރާތުންވެސް ވަރަށް ހަމަހަމަ ކުޅުމެއް ފެނިގެންދިޔައިރު ތިން ވަނަ ސެޓު ފެށިގެންދިޔައީ ދެ ޓީމަށްވެސް ބޮޑު ޕްރެޝަރަކާއެކުއެވެ. މުބާރާތުގެ ތަށި ދިފާއުކުރުމަށް ބީ.އެސްގެ ޓީމަށް މި ސެޓު މުހިންމުވި އިރު، އެސް.އެން އިން މެޗު ކާމިޔާބުކޮށް ތަށި މިލްކުކުރުމަށް މި ސެޓު ހޯދުން މުހިންމެވެ.
ތިންވަނަ ސެޓުގައި ފުރަތަމަ ލީޑު ނަގައިގެން ކުޅެމުންދިޔައީ ބީ.އެސްގެ ޓީމުންނެވެ. ނަމަވެސް އެސް.އެންގެ ޓީމުގެ ކުޅުން ރަނގަޅުކޮށް ފަހަތުން އަރައި ވަނީ ރަގަޅު ލީޑެއް ނަގާފައެވެ. ދެންވެސް ފެނިގެންދިޔައީ ބީ.އެސް ގެ ޓީމުން ގިނަ ޕޮއިންޓުތަކެއް ކައިރިކައިރިން ހޯދާ އެސް.އެންގެ މައްޗަށް ކުރި ހޯދިތަނެވެ. ނަތީޖާ 16-16 ގައި ނާސިންގ ޓީމުން އަނެއްކާވެސް ހަމަހަމަކުރިއެވެ. ކައިރި ކައިރިން ދެ ޓީމުންވެސް ޕޮއިންޓް ހޯދަމުންގޮސް މި ސެޓު 25-22 ކާމިޔާބުކޮށް ޖެހިޖެހިގެން ތިން ވަނަ ފަހަރަށް މުބާރާތުގެ ތަށި އުފުލާލީ ސްކޫލް އޮފް ނާރސިންގގެ ޓީމުންނެވެ. މިމެޗުގެ މޮޅު ކުޅުންތެރިޔަކަށް ހޮވިފައިވަނީ އެސް.އެން ޓީމުގެ ޖާޒީ ނަމްބަރ 05 މަރިޔަމް ޝަހާއެވެ.
އެސް.އެންގެ ޓީމުން މުބާރާތުގެ ފައިނަލާއި ހަމައަށް ދަތުރުކޮށްފައިވަނީ ކުޅުނު ހުރިހާ މެޗެއް ކާމިޔާބުކޮށް 100 އިންސަންތަ މޮޅުވުމުގެ ރިކޯޑާއެކުއެވެ. އެސް.އެންގެ ޓީމަކީ މި މުބާރާތުގެ ތާރީހަށް ބަލާލާއިރު ކާމިޔާބު ޓީމެކެވެ. މިއީ ޖެހިޖެހިގެން އެސް.އެންގެ ޓީމު ފައިނަލުގައި ކުޅުނު ފަސް ވަނަ އަހަރެވެ. އަދި ފާއިތުވެ ދެ އަހަރު ޗެންޕިއަންކަން ހޯދާ މިއަހަރު މުބާރާތުގެ ތަށި 100 އިންސަންތަ މޮޅުވުމުގެ ރިކޯޑާއެކު މިލްކުކުރުން މީއީ ހަގީގަތުގައިވެސް އެސް.އެންއަށް ފަޙުރުވެރިވުން ހައްގު ކާމިޔާބީއެކެވެ.
މި މުބާރާތުގެ ފިރިހެން ޑިވިޝަނުގެ ފައިނަލުގައި ބައްދަލުކުރާނީ އެމް.އެން.ޔޫ ބިޒްނަސް ސްކޫލާއި ފެކަލްޓީ އޮފް އެޑިއުކޭޝަންގެ ޓީމެވެ. މި ދެ ޓީމަކީވެސް މުބާރާތުގެ ތާރީހަށް ބަލާލާއިރު، ކާމިޔާބު ދެ ޓީމުކަން ފާހަގަކޮށްލެވެއެވެ.
އެގޮތުން އެފް.އީގެ ޓީމު ވަނީ މި މުބާރާތުގެ 2017 ވަނަ އަހަރު ޗެމްޕިއަންކަން ހޯދާފައެވެ. ބީ.އެސްގެ ޓީމަށް އަދި ވޮލީގެ މި ފަޙުރުވެރި ވަނަ ހާސިލް ކުރެވިފައި ނުވިނަމަވެސް މިއީ ބީއެސްގެ ޓީމު ފައިނަލުގައި ކުޅޭ ދެވަނަ އަހަރެވެ. އެންމެ ފުރަތަމަ ބީ.އެސް ގެ ފިރިހެން ޓީމު ފައިނަލަށް ދަތުރުކޮށްފައިވަނީ 2020 އަހަރުއެވެ. އެއަހަރުގެ ޗެމްޕިއަނުންނަކީ ސެންޓަރ ފޯ ފައުންޑޭޝަން ސްޓަޑީޒެވެ.
