ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ އެމް.އެން.ޔޫ.އެސް.ޔޫ ބަހުސް މުބާރާތް 2024ގެ ތިންވަނަ ދުވަހުގެ ފުރަތަމަ ބަހުސް ސްކޫލް އޮފް މެޑިސިން (އެސް.އެމް)އިން ކާމިޔާބުކޮށް ސެމީ އިން ޖާގަ ވަށަވަރު ކުރިއިރު، ދެވަނަ ބަހުސް ފެކަލްޓީ އޮފް ޓޫރިޒަމްސްޓަޑީޒް (އެފް.އެޗް.ޓީ.އެސް) އިން ދޫކޮށްލުމުގެ ސަބަބުން ފެކަލްޓީ އޮފް އެޑިއުކޭޝަން (އެފް.އީ) މޮޅުވެއްޖެއެވެ.
މެއި 19 ވީ އާދިއްތަ ދުވަހުގެރޭ އެމް.އެން.ޔޫ ސެންޓްރަލް އެޑްމިނިސްޓްރޭޝަން އޮޑިޓޯރިއަމްގައި ކުރިއަށްދިޔަ މި ބަހުސްތަކުގެ ތެރެއިން ފުރަތަމަ ބަހުސް އަކީ ޖަޖުން ފާހަގަކުރެއްވި ގޮތުގައި މި މުބާރާތުގައި މިހާތަނަށް ފެނިގެންދިޔަ އެންމެ ވާދަވެރި ބަހުސްއެވެ. ފާއިތުވި އަހަރު ފައިނަލުގައި ބައްދަލުކުރި ދެ ޓީމުކަމަށްވާ ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އަދި އެސް.އެމް ބައްދަލުކުރި ފޯރިގަދަ މި ބަހުސްގެ މައުޟޫއަކީ ”މަސްވެރިކަމުގެ ސިނާއަތް ތަރައްޤީ ކުރުމަށް އެންމެ މުހިންމީ ފަސޭހައިން މަސްކިރޭނެ ވަސީލަތްތައް ޤާއިމުކުރުމެވެ.“ މި މުއުޟޫއާއި އެއްކޮޅަށް ބަހުސްކުރި އެސް.އެމްގެ ޓީމުން އެފް.އެސް.އެލްގެ މައްޗަށް ކުރިހޯދާ ބަހުސް ކާމިޔާބުކޮށްފައިވަނީ 906-780 ނަތީޖާއަކުންނެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެސް.އެމްގެ އަހުމަދު ޝާބިންއެވެ.
މިރޭގެ ދެވަނަ ބަހުސް އެފް.އެޗް.ޓީ.އެސް އިން ދޫކޮށްލާފައިވަނީ ބަހުސަށް މެންބަރުން ހަމަ ނުވުމުގެ ސަބަބުންނެވެ.
ފަހު ބަހުސްގައި ބައްދަލުކުރީ ފެކަލްޓީ އޮފް ހެލްތު ސައިންސަސް (އެފް.އެޗް.އެސް) އަދި ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް)އެވެ. މި ބަހުސް އެފް.އެޗް.އެސް އިން ކާމިޔާބުކުރީ 640 – 418ގެ ނަތީޖާއަކުންނެވެ. މި ބަހުސްގެ އެންމެ މޮޅު ބަހުސްކުރުންތެރިޔަކީ އެފް.އެޗް.އެސްގެ ހަސީނާ މަލްދާ ކަމަށްވާއިރު، މި ބަހުސްގެ މައުޟޫ އަކީ މީހުން ދިރިއުޅޭ ރަށްރަށުގައި ގެސްޓްހައުސްތައް ހިންގުމުގެ ސަބަބުން ދިވެހިންގެ އިޖްތިމާޢީ ފޭރާމަށް ނުރަނގަޅު އަސަރުކުރެއެވެ.“ އެވެ. މި ބަހުސްގައި އެފް.އެޗް.އެސް އިން ބަހުސްކުރީ މައުޟޫއާ އެއްކޮޅަށެވެ.
މި މުބާރާތުގެ ގުރޫޕް ސްޓޭޖުގެ ފަހު ބަހުސްތައް 20 އަދި 21 މެއި ވަނަ ދުވަހަށް ތާވަލުކުރެވިފައިވާއިރު، މިބަހުސްތަކުގެ ނަތީޖާއިން ސެމީ ފަނިލަށް ދަތުރުކުރާ ޓީމުތައް ކަނޑައެޅިގެންދާނެއެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދަރިވަރުންގެ ޔޫނިއަންގެ ފަރާތުން ބާއްވާ އެއްމެ ބޮޑު އެއް އިލްމީ ހަރަކާތެވެ. މިއަހަރު މި ބޭއްވެނީ 2013 ވަނަ އަހަރުން ފަށައިގެން ސިލްސިލާގޮތެއްގައި މެދުކެނޑުމެއްނެތި ބާއްވަމުން އަންނަ މި މުބާރާތުގެ 11 ވަނަ މުބާރާތެވެ.
