ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން އިންތިޒާމުކޮށްގެން ބާއްވާ އެމް.އެން.ޔޫ.އެސް.ޔޫ ބަހުސް މުބާރާތް 2024ގެ ގުރޫޕް ސްޓޭޖުގެ ފަހު ބަހުސްތަކުގައި އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް) އަދި ސެންޓަރ ފޯ ފައުންޑޭޝަން (ސީ.އެފް.އެސް) ބައްދަލުކުރި ބަހުސް އައި.ޔޫ.އެމް އިން ކާމިޔާބުކޮށް މޮޅަކާއެކު މުބާރާތް ނިންމާލިއިރު، ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް )އާއި ފެކަލްޓީ އޮފް އާޓްސް (އެފް.އޭ)ގެ ޓީމުން ވާދަކުރުމަށް ހަމަޖެހިފައިވާ ބަހުސް އެފް.އެޗް.ޓީ.އެސް ޓީމުން ދޫކޮށްލުމުން އެފް.އޭ އަށް ލިބުނު މޮޅާއެކުވަނީ ސެމީ ފައިނަލުގެ ފަހު ޖާގަ ކަށަވަރުކޮށްފައެވެ.
މެއި 21 ވީ އަންގާރަ ދުވަހުގެ ރޭ ކުރިއަށްދިޔަ މި ބަހުސްތަކުގައި ފުރަތަމަ ބައްދަލުކުރީ އައި.ޔޫ.އެމް އަދި ސީ.އެފް.އެސް.އެވެ. މި ބަހުސް 540 – 478 ކާމިޔާބުކޮށްފައި ވަނީ މައުޟޫ އާއި އެއްކޮޅަށް ބަހުސްކުރި އައި.ޔޫ.އެމްގެ ޓީމެވެ. އަދި އެންމެ މޮޅު ބަހުސްކުރުންތެރިޔަކަށް ވެސް ހޮވިފައިވަނީ ހަމަ މިޓީމުގެ އާމިނަތު ހިދާ ޙުސައިންނެވެ. މި ބަހުސްގެ މައުޟޫއަކީ ”ދިވެހި ޤައުމިއްޔަތު ރައްކާތެރިކޮށް ދިރުވުމަށް އެންމެ ބޮޑު މަސައްކަތެއް ކުރެވޭނީ މަދަރުސާތަކަށެވެ.“އެވެ.
މިރޭގެ ދެވަނަ ބަހުސްގައި ވާދަކޮށްފައިވަނީ ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އަދި ފެކަލްޓީ އޮފް ހެލްތު ސައިންސަސް (އެފް.އެޗް.އެސް)އެވެ. ”ޗެޓްޖީޕީޓީ ފަދަ ވަސީލަތްތަކުން ތައުލީމީ ނިޒާމު ހަރުދަނާކުރުމަށް އެހިވެދޭ“ ، ބުނެ މައުޟޫއާއި އެއްކޮޅަށް ބަހުސްކޮށް އެފް.އެޗް.އެސްގެ ޓީމަށް ލިބިފައިވަނީ 451 ޕޮއިންޓެވެ. މި ބަހުސް އެފް.އެސް.އެލް އިން ކާމިޔާބުކޮށްފައިވަނީ 651 ޕޮއިންޓު ހޯދައިގެންނެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެފް.އެސް.އެލް ޓީމުގެ އިސްމާއިލް ރަޒީން އިމްރާނެވެ.
ފަހު ބަހުސްގައި އެފް.އޭ އަދި އެފް.އެޗް.ޓީ.އެސް ވާދަކުރުމަށް ހަމަޖެހިފައިވަނިކޮށް، އެފް.އެޗް.އެސް.ޓީގެ ބައިވެރިންނަށް ބަހުސަށް ހާޒިރުވެވެން ނެތުމުގެ ސަބަބުން، ބަހުސް ދޫކޮށްލުމުން އެފް.އޭގެ ޓީމު ވަނީ މޮޅުވެފައެވެ. މި މޮޅާއެކު އެފް.އޭގެ ޓީމު މިވަނީ މި މުބާރާތުގެ ސެމީ ފައިނަލަށް ދަތުރުކޮށްފައެވެ.
ފޯރިގަދަ ބަހުސްތަކެއް ފެނިގެންމިދާ މި މުބާރާތުގެ ސެމީ ފައިނަލުގެ ބަހުސްތައް އޮންނާނީ 23 މެއި ވާ ބުރާސްފަތި ފުވަހުގެ ރޭ އެމް.އެން.ޔޫ ސެންޓްރަލް އޮޑިޓޯރިއަމްގައެވެ.
ފުރަތަމަ ބަހުސްގައި ބައްދަލުކުރާނީ ގްރޫޕް އޭގެ އެއްވަނަ ޓީމުގެ ގޮތުގައި 100 އިންސަންތަ މޮޅާއެކު ސެމީ ފައިނަލުން އެންމެ ފުރަތަމަ ޖާގަ ކަށަވަރުކޮށްފައިވާ ސްކޫލް އޮފް މެޑިސިންގ (އެސް.އެމް)ގެ ޓީމެވެ. އެސް.އެމް އާއި އެކު ބައްދަލުކުރާނީ ގުރޫޕް ބީގެ ދެވަނައިގައި އޮތް އެފް.އޭގެ ޓީމެވެ. ސެމީފައިނަލުގެ 2 ވަނަ ބަހުސްގައި އެއްކޮޅުން ބައްދަލުކުރާނީ ގުރޫޕް ބީ ގެ އެއްވަނަ ޓީމް ފެކަލްޓީ އޮފް އެޑިއުކޭޝަން އެވެ. މި ޓީމާއި ވާދަކުރާނީ ގުރޫޕް އޭގެ ދެވަނަ ހޯދާފައިވާ އެފް.އެސް.އެލްގެ ޓީމެވެ.
މި މުބާރާތުގެ ފައިނަލް ބަހުސް އަދި ނިންމުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މެއި 25 ވަނަ ދުވަހުއެވެ. ފައިނަލުގެ ގުރުލުން ސެމީ ފައިނަލުގެ ބަހުސްތަކަށްފަހު އޮންނާނެއެވެ.
އެމް.އެން.ޔޫ.އެސް.ޔޫ ބަހުސް މުބާރާތަކީ ދަރިވަރުންގެ ޔޫނިއަންގެ ފަރާތުން ބާއްވާ އެއްމެ ބޮޑު އެއް އިލްމީ ހަރަކާތެވެ. މިއަހަރު މި ބޭއްވެނީ 2013 ވަނަ އަހަރުން ފަށައިގެން ސިލްސިލާގޮތެއްގައި މެދުކެނޑުމެއްނެތި ބާއްވަމުން އަންނަ މި މުބާރާތުގެ 11 ވަނަ މުބާރާތެވެ.
