މިއަހަރުގެ ހޭންޑްބޯޅަ މުބާރާތުގެ ޓައިޓްލް ސްޕޮންސަރަކަށް ލ. ގަމު ކައުންސިލް!

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އާއި ޔޫނިއަންގެ އަހުރަ ގޮތްޕާ ގުޅިގެން ބާއްވާ ”އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތް 2024″ ގެ ޓައިޓްލް ސްޕޮސަރކަށް ހައްދުންމަތީ ލ.ގަމު ކައުންސިލް ހަމަޖައްސައިފިއެވެ.

ސްޕޮންސަރޝިޕް އެއްބަސްވުމުގައި ސޮއިކޮށްފައިވަނީ އެކަމަށް ޚާއްޞަކޮށް 04 އޮގަސްޓްވީ އާދިއްތަ ދުވަހުގެ މެންދުރު އެމް.އެން.ޔޫ.އެސް.ޔޫ އޮފީހުގައި ބޭއްވި ހަފްލާއެއްގައެވެ.

ލ. ގަމު ކައުންސިލްގެ ފަރާތުން މި އެއްބަސްވުމުގައި ސޮއި ކުރެއްވީ ގަމު ކައުންސިލްގެ ރައީސް އަޙްމަދު ޒަކީ އެވެ. އަދި އެމް.އެން.ޔޫ.އެސް.ޔޫގެ ފަރާތުން ސޮއި ކުރެއްވީ ޔޫނިއަންގެ ރައީސް ޖައިޝް އަލީ ވަހީދެވެ.

ޓައިޓްލް ސްޕޮންސަރ ހަމަޖެހުމާއެކު މިއަހަރުގެ ހޭންޑްބޯޅަ މުބާރާތް ބޭއްވޭނީ ”ގަމު ކައުންސިލް“ ނުވަތަ ގަމު ކައުންސިލުން ކަނޑައަޅާ ނަމެއް މުބާރާތުގެ ކުރިއަށް އިތުރުކޮށްގެންނެވެ. މި މުބާރާތުގައި ބައިވެރިވުމުގެ ފުރުޞަތު މިހާރު ހުޅުވާލެވިފައިވާއިރު، ބައިވެރިވުމަށް އެދޭ ފޯމު ހުށައެޅުމުގެ ސުންގަނޑިއަކީ މި މަހުގެ 10 ވަނަ ދުވަހެވެ.

ލާމު އަތޮޅުގެ މުއައްސަސާތަކާއި ޖަމިއްޔާތަކުގެ އިތުރުން ކުލަބުތަކަށް ހާއްސަކޮށްގެން ބާއްވާ މިމުބާރާތް މިއަންނަ ސެޕްޓެމްބަރު 01 ވަނަ ދުވަހު ފެށުމަށް ވަނީ ހަމަޖެހިފައެވެ.

2017 ވަނަ އަހަރު ފުރަތަމަ ބޭއްވުނު އަހުރަ ހޭންޑްބޯޅަ މުބާރާތަށްފަހު 2018 އަދި 2019 ވަނަ އަހަރުވެސް ވަނީ ކާމިޔާބުކަމާއެކު މި މުބާރާތް ކުރިއަށްގެންގޮސްފައެވެ. ކޮވިޑް 19 އާއި ގުޅިގެން ކުރިމަތިވި ގޮންޖެހުންތަކުގެ ސަބަބުން 4 އަހަރަށްފަހު، މިއަހަރު ބޭއްވިގެން މިދަނީ ޔޫނިއަންގެ 4 ވަނަ ހޭންޑްބޯޅަ މުބާރާތެވެ.

އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތަކީ ޔޫނިއަންގެ ފަރާތުން އަތޮޅުތެރޭގައި ބާއްވާ އެންމެ ބޮޑު ކުޅިވަރު ހަރަކާތެވެ.