އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތުގެ ގުރުއަތުލުން ބާއްވައިފި!

ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން އާއި ޔޫނިއަންގެ އަހުރަ ގޮތްޕާ ގުޅިގެން ބާއްވާ ” ގަމު ކައުންސިލް އެމް.އެން.ޔޫ.އެސް.ޔޫ އަހުރަ ހޭންޑްބޯޅަ މުބާރާތް 2024“ ގެ ގުރުއަތުލުން ބާއްވައިފިއެވެ.

މިމުބާރާތުގެ ގުރުއަތު ނެގުމުގެ  ރަސްމިއްޔާތު ކުރިއަށް ގެންގޮސްފައިވަނީ 27 އޮގަސްޓް ވީ އަންގާރަ ދުވަހު އެމް.އެން.ޔޫ ގަމު ކެމްޕަހުގައެވެ. މި މުބާރާތުގައި ޖުމުލަ 11 ޓީމު ބައިވެރިވެފައިވާއިރު، މީގެ ތެރެއިން ފިރިހެން ޑިވިޝަނުގައި ހިމެނެނީ 4 ޓީމެވެ. އަދި އަންހެން ޑިވިޝަނުގައި 7 ޓީމެއް ވާދަކުރާނެއެވެ.

މިއަންނަ ހޮނިހިރު ދުވަހު ފެށުމަށް ހަމަޖެހިފައިވާ މިމުބާރާތުގެ ފުރަތަމަ މެޗުގައި ބައްދަލުކުރާނީ އަންހެން ޑިވިޝަނުގެ ގޯޅި އެސްސީ އަދި އަމިގޯސް އެވެ. މުބާރާތުގެ ފެށުމުގެ ރަސްމިއްޔާތު އެދުވަހުގެ ރޭ ބޭއްވުމަށްވަނީ ހަމަޖެހިފައެވެ. އަދި އެއަށްފަހު ފިރިހެން ޑިވިޝަނުގެ ފުރަތަމަ މެޗު ކުޅެވިގެންދާނެއެވެ. މި މެޗުގައި ބައްދަލުކުރާނީ ވައްޓަފާޅި އަދި ގޯޅިއެވެ.

މުބާރާތް ރޭވިފައިވާ ގޮތުން އަންހެން ޑިވިޝަން ކުރިއަށްދާނީ އެންމެ ގިނަ ޕޮއިންޓް ހޯދާ ދެ ޓީމު ސެމީ ފައިނަލަށް ދަތުރުކުރާގޮތަށެވެ. އެގޮތުން ސެމީ ފައިނލުގައި ގުރޫޕް އޭގެ އެއްވަނަ ޓީމު ނިކުންނާނީ ގުރޫޕް ބީގެ ދެވަނަ ޓީމާ ދެކޮޅަށެވެ. އަދި ގުރޫޕް ބީގެ އެއްވަނަ ޓީމު ބައްދަލުކުރާނީ ގުރޫޕް އޭގެ ދެވަނަ ޓީމާއެވެ.

ނަމަވެސް ފިރިހެން ޑިވިޝަނުގެ މެޗުތައް ކުޅެވިގެންދާނީ ލީގު އުސޫލުންނެވެ. އެންމެ ގިނަ ޕޮއިންޓް ހޯދާ ޓީމަށް ފައިނަލުން ޖާގަ ކަށަވަރުވެގެންދާއިރު، ފައިނަލުން ދެން ޖާގަ ލިބޭ ޓީމެއް ކަނޑައެޅުމަށްޓަކައި، ދެވަނަ އަދި ތިން ވަނަ އަށް ދާ ދެ ޓީމުގެ މެދުގައި ސެމީ ފައިނަލް މެޗެއް ކުޅެވިގެންދާނެއެވެ.

މި ހިނގާ އޮގަސްޓް މަހުގެ 31 ން ސެޕްޓެމްބަރ 6 ވަނަ ދުވަހުގެ ނިޔަލަށް މަތިމަރަދޫ ފުޓްސަލް ދަނޑުގައި ކުރިއަށްދާ މިމުބާރާތުގެ ޗެމްޕިއަށް ޓީމަށް 20،000.00 ރުފިޔާގެ ފައިސާގެ އިނާމެއް ކަނޑައެޅިފައިވާއިރު، ރަނަރަޕް ޓީމަށް 7،000.00 ރުފިޔާގެ ފައިސާގެ އިނާމެއް ދިނުމަށް ވަނީ ނިންމާފައެވެ.

4 އަހަރުގެ މެދުކެނޑުމަކަށްފަހު މި މުބާރާތް ބޭއްވިގެންދާއިރު، މުބާރާތުގެ އިންތިޒާމުތައް އެންމެ ފުރިހަމައަށް ހަމަޖެއްސުމަށްޓަކައި ވާން ޖެހޭ އެންމެ ފަހުގެ ތައްޔާރީތައް ވަމުން ދާކަމަށް މުބާރާތުގެ ޗެއަރ އަދި އެމް.އެން.ޔޫ.އެސް.ޔޫގެ ރައީސް ޖައިޝް އަލީ ވަހީދު މައުލޫމާތުދެއެވެ.

އެމް.އެން.ޔޫ.އެސް.ޔޫ އަހުރަ ހޭންޑް ބޯޅަ މުބާރާތަކީ ދަރިވަރުންގެ ޔޫނިއަނުން އަތޮޅުތެރޭގައި ބާއްވާ އެންމެ ބޮޑު ހަރަކާތެވެ. އެންމެ ފުރަތަމަ މި މުބާރާތް ބޭއްވީ 2017 ވަނަ އަހަރެވެ. 2018 އަދި 2019 ގައި ވެސް ކާމިޔާބުކަމާއެކު މުބާރާތް ކުރިއަށްދިޔައިރު، އޭގެ ފަހުން ކޮވިޑް-19ގެ ޢާލަމީ ވަބާއާއެކު މި މުބާރާތް އޮތީ 4 އަހަރަށް މެދުކެނޑިފައެވެ. އެހެންކަމުން މިއަހަރު މި ބޭއްވެނީ 4 ވަނަ ހޭންޑްބޯޅަ މުބާރާތެވެ.