ދިވެހިރާއްޖޭގެ ޤައުމީ ޔުނިވަރސިޓީ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިން ބާއްވާ ”އެމް.އެން.ޔޫ.އެސް.ޔޫ އިންޓަރ ފެކަލްޓި ބެޑްމިންޓަން މުބާރާތް 2024“ ގެ ފުރަތަމަ ރޭ ކުޅެވުނު 4 މެޗުން ފެކަލްޓީ އޮފް އިންޖިނިއަރިން ސައިންސް އެންޑް ޓެކްނޮލަޖީ (ފެސްޓް)، ފެކަލްޓީ އޮފް އެޑިއުކޭޝަން (އެފް.އީ)، އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް) އަދި ސެންޓަރ ފޯ ފައުންޑޭޝަން ސްޓަޑީސް (ސީ.އެފް.އެސް) މޮޅުވެއްޖެއެވެ.
މުބާރާތުގެ ފެށުމުގެ ރަސްމިއްޔާތަށްފަހު ކުޅެވިގެން ދިޔަ ފުރަތަމަ ދެ މެޗުގައި ބައްދަލުކުރީ ފެސްޓް އަދި ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް) އާއި ފެކަލްޓީ އޮފް އާޓްސް (އެފް.އޭ) އަދި އެފް.އީގެ ޓީމެވެ. ފެސްޓްގެ ޓީމުން 03-02 ގެ ނަތީޖާ އަކުން އެފް.އެޗް.ޓީ.އެސްގެ މައްޗަށް ކުރި ހޯދާފައިވާއިރު، އެފް.އެޗް.ޓީ.އެސްގެ ޓީމުން ވަނީ އަންހެން ޑަބަލްސް އަދި ފިރިހެން ޑަބަލްސް ގޭމް ކާމިޔާބުކޮށްފައެވެ.
ދެނަވަ މެޗުގައި އެފް.އީގެ ޓީމުން ފަސޭހަކަމާއެކު އެފް.އޭގެ މައްޗަށް ކުރި ހޯދާފައިވަނީ 04-01 ގެ ނަތީޖާއިންނެވެ. މި މެޗުގައި މިކްސް ޑަބަލްސް ފިޔަވާ 4 ގޭމް އެފް.އީ އިން ވަނީ 0-2ން ކާމިޔާބުކޮށްފައެވެ. އެފް.އީ ގެ ޓީމަކީ ފާއިތުވި އަހަރުގެ މި މުބާރާތުގެ ޗެމްޕިއަންކަން ހޯދާފައިވާ ޓީމެވެ.
އެމް.އެން.ޔޫ ބީ.އެސް އަދި ސްކޫލް އޮފް މެޑިސިން (އެސް.އެމް) ވާދަކުރި މެޗު ބީ.އެސްގެ ޓީމުން ކުރި ހޯދާފައިވަނީ 01-04 ގެ ނަތީޖާއިންނެެވެ. މި މެޗުގައި އެސް.އެމްގެ ޓީމަށް ކާމިޔާބުކުރެވިފައިވަނީ އަންހެން ޑަބަލްސް ގޭމް އެކަންޏެވެ. އަންހެން އަދި ފިރިހެން ސިންގަލްގެ އިތުރުން މިކްސް ޑަބަލްސް ގެ ގޭމުތައް ބީ.އެސްގެ ޓިމުން ވަނީ ސީދާ ދެ ސެޓުން މޮޅުވެފައެވެ.
ރޭގެ ފަހު މެޗުގައި ބައްދަލުކުރި ސީ.އެފް.އެސް އަދި ފެކަލްޓީ އޮފް ހެލްތު ސައިންސަސް (އެފް.އެޗް.އެސް)ގެ ޓިމުން ވަނީ ވާދަވެރި ކުޅުމެއް ފެނިގެން ގޮސްފައެވެ. މި މެޗު ސީ.އެފް.އެސް އިން ކާމިޔާބުކޮށްފައިވަނީ 03-02 ގެ ނަތީޖާއިންނެވެ. މި މެޗުގެ ފިރިހެން ސިންގަލްސް ފިޔަވާއި ހުރިހާ ގޭމެއް ވަނީ 3 ސެޓް ކުޅެފައެވެ. އަންހެން އަދި ފިރިހެން ޑަބަލްސްގެ އިތުރުން ފިރިހެން ސިންގަލްސް މެޗު ސީ.އެފް.އެސް އިން ކާމިޔާބުކޮށްފައިވާއިރު، އެފް.އެޗް.އެސްގެ ޓީމުން ވަނީ އަންހެން ސިންގަލްސް އަދި މިިކްސް ޑަބަލްސް ގޭމު 1-2 އިން ކާކިޔާބުކޮށްފައެވެ.
މި މުބާރާތުގައި ކުޅުމަށް ހަމަޖެހިފައިވަނީ ހަމައެކަނި ޓީމު އިވެންޓްގެ މެޗުތަކެވެ. މުބާރާތުގެ ހުރިހާ މެޗެއް ކުޅުމަށް ހަމަޖެހިފައިވަނީ އެމް.އެން.ޔޫ ޕީ.އީ ހޯލުގައި ކަމަށްވާއިރު، މާދަމާ ވެސް 4 މެޗު ކުޅުމަށް ވަނީ ތާވަލް ކުރެވިފައެވެ. މެޗުތައް ފަށާނީ ރޭނގަޑު 20:00ގައެވެ.
