ދިވެހިރާއްޖޭގެ ޤައުމީ ޔުނިވަރސިޓީ ދަރިވަރުންގެ ޔޫނިއަން (އެމް.އެންޔޫ.އެސް.ޔޫ) އިންޓަރ ފެކަލްޓީ ބެޑްމިންޓަން މުބާރާތުގައި ރޭ ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އަދި ފެކެލްޓީ އޮފް އެޑިއުކޭޝަން (އެފް.އީ) ކުޅުނު މެޗުތަކުން މޮޅުވެ ސެމީ ފައިނަލާއި ގާތަށް ޖެހިލައިފިއެވެ. .
ރޭގެ ފުރަތަމަ މެޗުގައި ސްކޫލް އޮފް ނާރސިންގ (އެސް.އެން) އާއި ފެކަލްޓީ އޮފް އާޓްސް (އެފް.އޭ) ބައްދަލުކުރި މެޗު 04-01ގެ ނަތީޖާއަކުން އެސް.އެން ވަނީ ކާމިޔާބުކޮށްފައެވެ. މި ގޭމުގައި އެފް.އޭގެ ޓީމަށް ކާމިޔާބުކުރެވިފައިވަނީ ފިރިހެން ސިންގަލްސްގައި އެފް.އޭ ޓީމުގެ އިބުރާހިމް ހުޝާމް އަދި އެސް.އެން ޓީމުގެ ނެވިން ޖޯއެލް މަރަތަންކަލް ބައްދަލުކުރި މެޗެވެ.
ދެވަނަ މެޗުގައި ބައްދަލުކުރީ އެފް.އީ އަދި ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީސް (އެފް.އެޗް.ޓީ.އެސް)އެވެ. 04-01ގެ ނަތީޖާއަކުން އެފް.އީގެ ޓީމުން ވަނީ އެފް.އޭ އަތުން ފަސޭހަކަމާއެކު މޮޅުވެފައެވެ. ނަމަވެސް މިކްސް ޑަބަލްސް ގޭމުގައި އެފް.އެޗް.ޓީ.އެސްގެ ކުޅުންތެރިންވަނީ ވާދަވެރި ކުޅުމެއްދައްކައި 2-1 އެފް.އީގެ މައްޗަށް ކުރިހޯދާފައެވެ. މި މުބާރާތުގެ މިހާތަނަށް ކުޅުނު ހުރިހާ މެޗެއް ކާމިޔާބުކޮށް އެފް.އީގެ ޓީމު މިވަނީ ގުރޫޕް އޭގެ އެއްވަނަ ހޯދާފައެވެ.
ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) އަދި ފެކަލްޓީ އޮފް ހެލްތު ސައިންސަސް (އެފް.އެޗް.އެސް) ވާދަކުރި މެޗު އެފް.އެޗް.އެސްގެ ޓީމުން ކާމިޔާބުކޮށް މިވަނީ މި މުބާރާތުގެ ފުރަތަމަ މޮޅު ހޯދާފައެވެ. އެފް.އެޗް.އެސްގެ ކުޅުންތެރިންގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި އެފް.އެސް.އެލްގެ ޓީމަށް ކާމިޔާބުކުރެވިފައި ވަނީ އަންހެން ސިންގަލްގެ މެޗެވެ. މި މެޗު އެ ޓީމުން ކާމިޔާބުކުރީ 2-1 ސެޓުންނެވެ.
މި މުބާރާތުގައި މިހާތަނަށް ފެނިގެންދިޔަ އެންމެ ފޯރިގަދަ އެއް މެޗުކަމުގައިވާ އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް) އަދި ސީ.އެފް.އެސް ބައްދަލުކުރި މެޗު ވާދަވެރި ކުޅުމަކަށްފަހު ސީ.އެފް.އެސް އިން 03-02ގެ ނަތީޖާއަކުން ކާމިޔާބުކޮށް މިވަނީ ގުރޫޕް ބީގެ އެއްވަނަ ހޯދާފައެވެ. މި މެޗުގައި ބީ.އެސްގެ ޓީމުންވަނީ އަންހެން އަދި ފިރިހެން ސިންގަލްސް މެޗުން މޮޅުވެފައެވެ. އަދި ސީ.އެފް.އެސް އިން އަންހެން، ފިރިހެން ޑަބަލްސް ގޭމުތަކުން މޮޅުވެފައި ވަނިކޮށް ގުރޫޕުގެ އެއްވަނައިގެ ގޮތުގައި ސެމީއިން ޖާގަ ކަށަވަރުކުރުމަށް މިކްސް ޑަބަލްސް ގޭމު ކާމިޔާބުކުރުމަށް ދެ ޓީމުންވެސް މި ގޭމު ފެށީ ވަރަށް ޕްރެޝަރގައެވެ. މި ގޭމު 2-1 ގެ ނަތީޖާއަކުން ސީ.އެފް.އެސްގެ ޓީމުން ވަނީ ބީ.އެސް ޓީމުގެ މައްޗަށް ކުރިހޯދާފައެވެ.
މުބާރާތުގެ ގުރޫޕް ސްޓޭޖުގެ ފަހު މެޗުތައް މިރޭ އަދި މާދަމާ ރޭ އަށްވަނީ ތާވަލުކުރެވިފައެވެ. މުބާރާތުގެ ފައިނަލު މެޗު އޮންނާނީ މިމަހުގެ 28 ވަނަ ދުވަހުއެވެ. މުބާރާތުގެ ހުރިހާ މެޗެއްވެސް ކުޅެވިގެންދާނީ އެމް.އެން.ޔޫ އެފް.އީ ޕީ.އީ ހޯލުގައެވެ.
