އެމް.އެން.ޔޫ.އެސް.ޔޫ ބެޑްމިންޓަން މުބާރާތުގައި މިރޭ ސްކޫލް އޮފް މެޑިސިން (އެސް.އެމް) އަދި ފެކަލްޓީ އޮފް އިންޖިނިއަރިންގ ސައިންސް އެންޑް ޓެކްނޮލަޖީ (ފެސްޓް) ކުޅުން މެޗުތައް ކާމިޔާބުކޮށްފިއެވެ.
ސެންޓަރ ފޯ ފައުންޑޭޝަން ސްޓަޑީޒް (ސީ.އެފް.އެސް) އަދި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) ބައްދަލުކުރި މެޗު ފަސޭހަކަމާއެކު ސީ.އެފް.އެސް އިން ވަނީ ކާމިޔާބުކޮށްފައެވެ. މި މެޗުގައި އެފް.އެސް.އެލްގެ ޓީމަށް ކާމިޔާބުކުރެވިފައިވަނީ ފިރިހެން ޑަބަލްސް މެޗު އެކަންޏެވެ. މި މެޗު ސީ.އެފް.އެސް އިން ކާމިޔާބުކޮށްފައިވަނީ 04-01ގެ ނަތީޖާއަކުންނެވެ.
ފެކަލްޓި އޮފް ހެސްތު ސައިންސަސް (އެފް.އެޗް.އެސް)ގެ ޓީމުން މި މުބާރާތުގެ ފަހު މެޗުގައި އެސް.އެމް އާއި ވާދަކޮށް، އެސް.އެމްގެ ޓީމުން ވަނީ މި މެޗު ކާމިޔާބުކޮށްފައެވެ. އެފް.އެޗް.އެސްގެ ޓީމުން ވެސް ވަނީ މި މެޗުގައި މޮޅު ކުޅުމެއްދައްކައި، ފިރިހެން ޑަބަލްސް އަދި އަންހެން ސިންގަލްސް ގޭމުން އެސް.އެމްގެ މައްޗަށް ކުރިހޯދާފައެވެ. މި މެޗުގެ ނަތީޖާއަކީ 03-02އެވެ. މިރޭގެ މެޗުން ލިބުނު ކާމިޔާބީ އާއެކު އެސް.އެމްގެ ޓީމަށް މިވަނީ ސެމީ ފައިނަލުން ޖާގަ ހޯދުމަށް ފުރުސަތު ތަނަވަސްވެފައެވެ.
ފެކަލްޓީ އޮފް އެޑިއުކޭޝަން (އެފް.އީ) އަދި ސްކޫލް އޮފް ނާރސިންގ (އެސް.އެން) ބައްދަލުކުރި މެޗު ވާދަވެރި ކުޅުމަކަށްފަހު އެފް.އީ ގެ ޓީމުން ވަނީ ކާމިޔާބުކޮށްފައެވެ. މި މެޗުގައި ދެ ޓީމުގެ ފަރާތުންވެސް ވަނީ މޮޅު ކުޅުމެއް ފެނިގެން ގޮސްފައއެވެ. އެފް.އީގެ ޓީމުން 3 ޓައި ކާމިޔާބުކޮށްފައި ވަނިކޮށް އެސް.އެންގެ ޓީމުން ވަނީ ފަހު ދެ ޓައި ކާމިޔާބުކޮށްފައެވެ. މެޗުގެ ނަތީޖާ އަކީ 03-02އެވެ.
މި ރޭގެ ފަހު މެޗުގައި ފެސްޓްގެ ޓީމުން ފެކަލްޓީ އޮފް އާޓްސް (އެފް.އޭ)ގެ މައްޗަށް 03-02ގެ ނަތީޖާއަކުން ކުރި ހޯދާ މިވަނީ މުބާރާތުގައި ކުރިއަށް ދިޔުމުގެ އުންމީދު އާކޮށްފައެވެ. ދެ ޓީމުގެ ފަރާތުންވެސް ފޯރިގަދަ ކުޅުމެއް ފެނިގެންދިޔަ މި މެޗަކީ ދެ ޓީމަށްވެސް މުބާރާތުގައި ކުރިއަށް ދިޔުމަށް ވަރަށް މުހިންމު މެޗެކެވެ. އެފް.އޭގެ ޓިމުން ފިރިހެން ޑަބަލް އަދި އަންހެން ސިންގަލް ގޭމު ކާމިޔާބު ކޮށްފައިވަނިކޮށް ފެސްޓްގެ ޓީމުން ވަނީ އަންހެން ސިންގަލްސް، ޑަބަލްސް އަދި މިކްސް ޑަބަލްސް ގޭމުން ކުރިހޯދައި މިމެޗު ކާމިޔާބުކޮށްފައެވެ.
މި މުބާރާތުގެ ގުރޫޕް ސްޓޭޖުގެ ފަހު މެޗުތައް މާދަމާ ކުޅުމަށް ހަމަޖެހިފައިވާއިރު، މާދަމާގެ މެޗުތަކަށްފަހު ސެމީ ފައިނަލްގެ ޖާގަތައް ކަށަވަރު ވެގެންދާނެއެވެ. މާދަމާ ރޭގެ މެޗުތައް ފެށުމަށް ހަމަޖެހިފައިވަނީ 20:00 މިނެޓުގައި އެމް.އެން.ޔޫ. އެފް.އީ ޕީ.އީ ހޯލުގައެވެ.
