ދިވެހިރާއްޖޭގެ ޤައުމީ ޔުނިވަރސިޓީ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންޓަރ ފެކަލްޓީ ބެޑްމިންޓަން މުބާރާތް 2024ގެ ޗެމްޕިއަންކަމުގެ ޝަރަފު މިއަހަރުވެސް ފެކަލްޓީ އޮފް އެޑިއުކޭޝަން (އެފް.އީ) ޓީމުން ދަމަހައްޓައިފިއެވެ.
ވާދަވެރި ފައިނަލް މެޗުގައި ސެންޓަރ ފޯ ފައުންޑޭޝަން (ސީ.އެފް.އެސް)ގެ ޓީމު ބަލިކޮށް ޗެމްޕިއަން ތަށި އެފް.އީގެ ޓިމުން އުފުލާލީ 03-02ގެ ނަތީޖާއަކުން ކުރިހޯދައިގެންނެވެ.
ސެޕްޓެމްބަރ 28 ވަނަ ދުވަހުގެ ރޭ އެމް.އެމް.ޔޫ. އެފް.އީ ޕީ.އީ ހޯލުގައި ކުރިއަށްދިޔަ ވާދަވެރި ފައިނަލުގެ ފުރަތަމަ ކުޅެވިގެން ދިޔަ އަންހެން ޑަބަލްސް ޓައި ގައި ތިން ސެޓް ދެ ސެޓުން ކާމިޔާބު ކުރީ އެފް.އީގެ ޕެއާ މަރިޔަމް ނަބާހާ ނަސީމް އަދި މަލްދާ މުހަންމަދުއެވެ. އެފް.އީ އާއި ދެކޮޅަށް ކުޅުނު ސީ.އެފް.އެސްގެ ޓީމު ޕެއާ ގައި ހިމެނެނީ ފާތިމަތު މައާލް އައްޔޫބާއި ހަމްނާ އަހުމަދު ހަނީފްއެވެ.
އަދި ފިރިހެން ސިންގަލްސް ޓައި ގައި ސީ.އެފް.އެސްގެ އަލީ ނަވީހް އަދި އެފް.އީގެ ރުބަން ސިންގ ބައްދަލުކި ޓައި ރުބަށް ސިންގ 0-2 އިން ކާމިޔާބުކުރިއިރު، ފިރިހެން ޑަބަލްސް ޓައި ކާމިޔާބު ކޮށްފައިވަނީ ޗީ.އެފް.އެސްގެ ޓީމުންނެވެ. މި ޓައިގައި ބައްދަލުކުރި ސީ.އެފް.އެސްގެ ކުޅުންތެރިންނަކީ އަހުމަދު މުޒްލިފް އާއި ޒައިން އަބްދުލް ޖަމީލްއެވެ. އަދި އެފް.އީގެ ފަރާތުން ވާދަކޮށްފައިވަނީ އަހުމަދު އަލީ އަދި ރައުހާން ރިއްފަތުއެވެ.
އަންހެން ސިންގަލްގައި ސީ.އެފް.އެސްގެ އައިޝަތު ނައުރީން އެއް ސެޓް ކާމިޔާބުކޮށްފައި ވަނިކޮށް އެފް.އީގެ މަރިޔަމް ނޫރައިން ވަނީ ދެވަނަ ސެޓް ދޫކޮށްލުމުން ސީ.އެފް.އެސް އަށް ޓައި ލިބިފައެވެ.
ނަތީޖާ ކަނޑައެޅުމަށް ކުޅެވުނު މިކްސް ޑަބަލްސްގެ ޓައި އެފް.އީގެ ޓިމުން ސީ.އެފް.އެސްގެ މައްޗަށް ކުރި ހޯދީ 2-1 ގެ ނަތީޖާއަކުންނެވެ. މި ޓައިގައި ސީ.އެފް.އެސްގެ ފަރާތުން ކުޅުނީ ހުޒާމް އަބުދުއްރަހީމް އާއި އައިޝަތު ޝާހާ ނަސީރުއެވެ. އެފް.އީގެ ފަރާތުން ކުޅުނީ މުހައްމަދު އަސްލަހު އަޝްރަފް އަދި އައިޝަތު ޝަދާ އަބްދުލް ގަނީ އެވެ.
ފޯރިގަދަ ފައިނަލަށް މެޗަށްފަހު ބޭއްވިގެންދިޔަ މުބާރާތުގެ ނިންމުމުގެ ރަސްމިއްޔާތު ޝަރަފުވެރި ކޮށްދެއްވީ ދިވެހިރާއްޖޭގެ ހައްޖު ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރ މުހައްމަދު ޝިހާބެވެ. އަދި މިރަސްމިއްޔާތުގައި އެމް.އެން.ޔޫގެ ވީ.ސީ ޑރ އައިޝަތު ޝެހެނާޒް އާދަމާއި، ޑީ.ވީ.ސީ ޑރ ފަވާޒް ޝަރީފް ވަނީ ބައިވެރިވެ ވަޑައިގަންނަވާފައެވެ.
މި މުބާރާތުގެ ތިންވަނަ ހޯދާފައިވަނީ ސްކޫލް އޮފް ނާރސިން (އެސް.އެން) އަދި އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް)އެވެ.
ޗެމްޕިއަން އަދި ރަނަރަޕް ޓީމް ސީ.އެފް.އެސްގެ ޓީމަށް ޓްރޮފީ އަދި މެޑަލް ވަނީ ހަވާލުކުރެވިފައެވެ.
ދަރިވަރުންގެ ޔޫނިއަނުން ފާއިތުވި އަހަރު މުޅިން އަލަށް ކުރިއަށްގެންދިޔަ އިންޓަރ ފެކަލްޓީ ބެޑްމިންޓަން މުބާރާތުގެ ދެވަނަ މުބާރާތް މިއަހަރު ކާމިޔާބުކަމާއެކު ނިންމާލެވިފައިވާއިރު، މި މުބާރާތުން ހުނަރުވެރި މޮޅު ބެޑްމިންޓަން ކުޅުންތެރިންތަކެއް މިވަނީ ފާހަގަވެގެން ގޮސްފައެވެ.
