ބީ.އެމް.އެލް އެމް.އެން.ޔޫ.އެސް.ޔޫ ފުޓްސަލް ފިއެސްޓާ 2024 ގައި މިރޭ ކުޅެވުނު އަންހެން ޑިވިޝަނުގެ މެޗުތައް ކާމިޔާބުކޮށް ވިލާ ކޮލެޖު، އެމް.އެން.ޔޫ ބިޒްނަސް ސްކޫލް (އެމް.އެން.ޔޫ ބީ.އެސް) އަދި ފެކަލްޓީ އޮފް އެޑިއުކޭޝަން (އެފް.އީ) އިން ކުއާޓާރ ފައިނަލުން ޖާގަ ކަށަވަރުކޮށްފިއެވެ.
ހުޅުމާލެ ރެހެނދި ދަނޑުގެ ގުރައުންޑް އެކެއްގައި ކުޅުވުނު މެޗުގައި ވިލާ ކޮލެޖާއި ފެކަލްޓީ އޮފް ޝަރީޢާ އެންޑް ލޯ (އެފް.އެސް.އެލް) ބައްދަލު ކުރި މެޗު ވިލާއިން ވަނީ ބޮޑު ތަފާތަކުން ކުރިހޯދާފައެވެ. މި މެޗުގައި ވިލާ އިން ވަނީ އެފް.އެސް.އެލް ކޮޅަށް 8 ގޯލު ޖަހާފައެވެ. އެފް.އެސް.އެލްގެ ޓީމަށް ލަނޑެއް ނުޖެހި، މެޗު ވަނީ 08-00 ގެ ނަތީޖާއަކުން ނިމިފައެވެ. ވިލާ ކޮލެޖުގެ ޖާޒީ ނަމްބަރ 22 އައިޝަތު ހަނާން ޝަރީފްގެ ގިނަ ގޯލު ތަކެއް ފެނިގެންދިޔަ މި މެޗުގެ މޮޅު ކުޅުންތެރިޔާގެ މަގާމުވެސް ހަނާން ވަނީ ހާސިލްކޮށްފައެވެ.
މިރޭގެ ދެވަނަ މެޗުގައި އިސްލާމިކް ޔުނިވާރސިޓީ އޮފް ދި މޯލްޑިވްސް (އައި.ޔޫ.އެމް) އަދި ބީ.އެސް ބައްދަލުކުރި މެޗު 00-11 ގެ ނަތީޖާއަކުން ބީ.އެސް އިން ވަނީ މެޗު ކާމިޔާބުކޮށްފައެވެ. ބީ.އެސް ޓީމުގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ މޮޅު ކުޅުންތެރިޔަކަށް ހޮވިފައިވަނީ އެ ޓީމުގެ ޖާޒީ ނަމްބަރ 17 އައިޝަތު ނަސްމާ އަހުމަދުއެވެ.
މިރޭ ކުޅުމަށް ތާވަލު ކޮށްފައިވާ ގުރޫޕް ސީ ގެ ފުރަތަމަ މެޗު ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް (އެފް.އެޗް.ޓީ.އެސް) އިން ދޫކޮށްލުމުގެ ސަބަބުން އެފް.އީ އިށް ވަނީ 05 ޕޮއިންޓާއެކު މޮޅުވެފައެވެ. މި ގުރޫޕުގެ ދެވަނަ މެޗުގައި އެމް.އައި ކޮލެޖާއި ފެކަލްޓީ އޮފް އާރޓްސް (އެފް.އޭ) ބައްދަލުކުރި މެޗު އެމް.އައި ކޮލެޖުން 05-00 ގެ ނަތީޖާއަކުން ވަނީ ކާމިޔާބުކޮށްފައެވެ. އެފް.އޭގެ ޓީމަށް ފުރަތަމަ ހާފުގައި ވަނީ ގޯލު ޖަހާނެ ފުރުސަތުތައް ލިބިފައެވެ. މި މެޗުގެ މޮޅު ކުޅުންތެރިޔަކީ އެމް.އައި ކޮލެޖުގެ ޖާޒީ ނަމްބަރ 77 އައިޝަތު އިނާސާ އިބްރާހިމްއެވެ.
މުބާރާތުގެ ގުރޫޕް ސްޓޭޖުގެ މެޗުތައް ނިމުމަކާއި ހަމައަށް އައިސްފައިވާއިރު، އެންމެ ފަހު މެޗުތައް މާދަމާ އަދި ހުކުރު ދުވަހު ކުޅުމަށްވަނީ ހަމަޖެހިފައެވެ. ދަރިވަރުންގެ ޔޫނިއަނުން ސިލްސިލާކޮށް ބާއްވަމުން މިއަންނަ ފުޓްސަލް މުބާރާތަކީ ޔޫނިއަންގެ އެންމެ ޝަރަފުވެރި މުބާރާތެވެ.
