ދިވެހިރާއްޖޭގެ ޤައުމީ ޔުނިވަރސިޓީ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ)ގެ 12 ވަނަ އަހަރީ ދުވަސް ފާހަގަކޮށްފިއެވެ.
އަހަރީ ދުވަސް ފާހަގަކުރުމުގެ ގޮތުން ކުރިއަށް ގެންދިޔަ ކޭކު ފެޅުމުގެ ހަރަކާތް ކުރިއަށް ގެންގޮސްފައިވަނީ ނޮވެންބަރު 6 ވީ ބުދަދުވަހުގެ ހަވީރެވެ.
މިހަރަކާތުގައި އެމް.އެން.ޔޫ މެނޭޖްމެންޓްގެ ބޭފުޅުންނާއި، ޔޫނިއަންގެ ކުރީގެ ދައުރުތަކުގެ ހިންގާ ކޮމެޓީގެ މެމްބަރުންގެ އިތުރުން ގިނަ އަދަދެއްގެ ލީޑަރުންވަނީ ބައިވެރިވެފައެވެ.
މިރަސްމިއްޔާތުގައި ޑީންސް އޮފް ސްޓޫޑެންޓް ލީލާ މިސް ވަނީ ޔޫނިއަންގެ މަސައްކަތްތައް ފާހަގަ ކުރަށްވާ، ޔޫނިއަން އިން ކުރަމުން އަންނަ މަސައްކަތްތަކާއި މެދު ފަޙުރުވެރިވާ ކަމަށް ވިދާޅުވެ، ހުރިހާ ދަރިވަރުން ގުޅިގެން ދަރިވަރުންނަށްޓަކައި ކޮށްދޭ މި މުހިންމު މަސައްކަތުގައި ކުރިއަށް ދިޔުމަށް ނަސޭހަތްތެރިވެފައެވެ.
މީގެއިތުރުން ޔޫނިއަންގެ އެކި ދައުރުތަކުގެ ހިންގާކޮމެޓީގައި ހަރަކާތްތެރިވި މެމްބަރުންވެސް ވަނީ ވާހަކަފުޅު ދައްކަވާފައެވެ.
ދަރިވަރުންގެ ޔޫނިއަންގެ އަހަރީ ދުވަސް ފާހަގަކުރުމުގެ ގޮތުން އެމް.އެން.ޔޫ.އެސް.ޔޫ ޕްރެޒެންޓްސް ދަ ނެކްސްޓް ލެވެލް“ގެ ނަމުގައި ބާއްވާ ޓެލެންޓް ޝޯވ މިމަހުގެ 22 ވަނަ ދުވަހު ބޭއްވުމަށްވަނީ ހަމަޖެހިފައެވެ.
އެމް.އެން.ޔޫ.އެސް.ޔޫގެ އަހަރީ ދުވަހުގެ ގޮތުގައި ފާހަގަކުރެވެނީ ކޮންމެ އަހަރެއްގެ ވެސް ނޮވެންބަރު 6 ވަނަ ދުވަހެވެ. އެމް.އެން.ޔޫ.އެސް.ޔޫ ވުޖޫދުވެފައިވަނީ 2012 ވަނަ އަހަރުއެވެ.
