ގުރުޒުގެ މިއަހަރުގެ ތިންވަނަ މޫވީ ނައިޓް ކާމިޔާބު ކަމާއެކު ނިންމާލައިފިއެވެ. މިދިޔަ ބުދަ ދުވަހުގެ ރޭ ބޭއްވި މި ހަރަކާތް ކުރިއަށް ގެންގޮސްފައިވަނީ ދިވެހިރާއްޖޭގެ ގައުމީ އުނިވާސިޓީގެ ކުޅުދުއްފުށީ ކެމްޕަހުގެ ކްލާސްރޫމް ހަތެއްގައެވެ.
މިފަހަރުގެ މޫވީ ނައިޓްގައި ގުރުޒުން އަޅުވާފައިވަނީ ”ނައިޓް އޮފް ދަ ރީޕާ“ ކިޔާ ފިލްމެކެވެ. މި ފިލްމަކީ ގޮތް ނޭނގޭ މަރުތަކެއްގެ ސިއްރު، ޕޮލިހަކަށް ހާމަވެގެން ދިޔަގޮތް ދައްކުވައިދޭ ބިރުވެރި ފިލްމެކެވެ.
އެހެން ފަހަރުތަކެކޭވެސް އެއްފަދައިން މި މޫވީ ނައިޓްގައިވެސް ގުރުޒުންވަނީ ކެންޓީނެއް ހިންގާފައެވެ. އެގޮތުން މިފަހަރުގެ ކެންޓީނުގައި ޕޮޕްކޯނާއި ޗިކެން ސްޓިކް ފަދަ ތަފާތު ވައްތަރުގެ ކާނާ ވިއްކިއެވެ. މީގެ ތެރެއިން ކުދިންގެ އެންމެ މަގުބޫލުވީ ޕޮޕްކޯނެވެ.
މި ހަރަކާތަށް ދަރިވަރުންގެ ބޮޑު ތަރުހީބެއް ލިބުނެވެ. އެގޮތުން މި މޫވީ ނައިޓްގައި 22 ޓިކެޓަށް ވުރެ ގިނައިން ވިކިފައިވެއެވެ. މި ހަރަކާތައް އައި ކުދިން ބުނެފައިވަނީ މިފަހަރު އެޅުވި ފިލްމަކީ ކުރިން އެޅުވި ފިލްމްތަކާއި ތަފާތު ފިލްމެއްކަމެއް ކަމަށެވެ. އަދި މިފަދަ މޫވީ ނައިޓްތައް ގިނައިން ބޭއްވުމަށްވެސް ގިނަ ކުދިންތަކެއް އެދިފައިވެފައިވެއެވެ.
