އެންޖިނިއަރިންގ، ސައިންސް އެންޑް ޓެކްނޮލޮޖީ (އެސްޓާ)ގެ ފަރާތުން ބޭއްވި ”އާތުއަވާ“ ހަރަކާތް ކާމިޔާބު ކަމާއެކު ނިންމާލައިފިއެވެ. މި ހަރަކާތް ބޭއްވުނީ މޯލްޑިވްސް ސްޕޭސްރިސާޗް އޯގަނައިޒޭޝަން(މެސްރޯ)،ކުރޮސްރޯޑު އަދި ކަޅުއޮޑި ރެސްޓޯރެންޓާ ގުޅިގެންނެވެ.
މި ހަރަކާތުގައި ގާތްގަނޑަކަށް 60 ދަރިވަރުން ބައިވެރިވިއެވެ. މީގެ ތެރޭގައި ދަރިވަރުންގެ ޔޫނިއަންގެ ހިންގާ ކޮމިޓީ މެމްބަރުންގެ އިތުރުން އެކިއެކި ގޮފިތަކުގެ ހިންގާ ކޮމިޓީގެ މެމްބަރުންވެސް ހިމެނެއެވެ. މި ހަފްލާގައި ކުރިއަށްގެންދެވުނު ހަރަކާތްތަކުގެ ތެރޭގައި އުށްބައްތި ދިއްލުމުގެ އިތުރުން މޯލްޑިވްސް ސްޕޭސް ރިސާޗް އޯގަނައިޒޭޝަން އިން ޖައްވުބެލުމުގެ ޕުރޮގްރާމެއްވެސް ކުރިއަށް ދިޔައެވެ.
”އާތުއަވާ“ ފާހަގަކުރުމަކީ އެސްޓާއިން ކޮންމެ އަހަރަކުވެސް އިސްނަގައިގެން ކުރިއަށް ގެންދާ ހަރަކާތެކެވެ. ”އާތުއަވާ“ އަކީ މޫސުމަށް އަންނަ ބަދަލުތަކާއި ތިމާވެށީގެ މައްސަލަތަކަށް ހޭލުންތެރިކަން އިތުރުކުރުމަށް މާރިޗު މަހުގެ ފަހު ހޮނިހިރު ދުވަހު އެއްގަޑިއިރު (ރޭގަނޑު 08:30 ން 09:30 އަށް) ކޮންމެހެން ބޭނުންނުވާ ލައިޓުތައް ނިއްވާލުމަށް ވޯލްޑު ވައިލްޑްލައިފް ފަންޑު (ޑަބްލިޔު.ޑަބްލިޔު.އެފް) އިން ކޮންމެ އަހަރަކު އިންތިޒާމުކުރާ ބައިނަލްއަޤުވާމީ ހަރަކާތެކެވެ.
