ދިވެހިރާއްޖޭގެ ޤައުމީ ޔުނިވާރސިޓީގެ ދަރިވަރުންގެ ޔޫނިއަންގެ ގޮފި މެޑޮކޯސް އާއި ދިވެހިރާއްޖޭގެ ޤައުމީ ޔުނިވާރސިޓީގެ ދަރިވަރުންގެ ޔޫނިއަންގެ ކުޅުދުއްފުށީ ކެމްޕަހުގެ ގޮފިކަމުގައިވާ، ގުރުޒުން ގުޅިގެން ޚާއްސަ ”ސްޕޯޓްސް މީޓްސް“ އެއް ބާއްވައިފިއެވެ.
މި އިވެންޓު ބާއްވާފައިވަނީ 25 ސެޕްޓެމްބަރ ވީ ހުކުރު ދުވަހު ހަވީރު ކުޅުދުއްފުށީ ސިޓީގެ ރަށްމަތިފަންނު ސަރަހައްދުގައެވެ. މި އިވެންޓު ކުރިއަށް ގެންދެވިފައިވަނީ ކުޅުދުއްފުށީ ކެމްޕަހުގެ ދަރިވަރުންނާއި މެޑިކޯސްގެ ދަރިވަރުން ވާދަކޮށެވެ. ”ސްޕޯޓްސް މީޓް“ ގައި އެކި ވައްތަރުގެ ކުޅިވަރުތައް ކުޅިފައިވެއެވެ. އެގޮތުން، ފަތްކޯޅި ރޭސް، ”ވޯޓާރ ޕާސް“، ލުނބޯ ރޭސް އަދި މިނޫންވެސް އެތައް ކުޅިވަރެއް ކުޅިފައިވެއެވެ. މި އިވެންޓު ނިންމާލެވިފައިވަނީ މޮޅުވި ޓީމުތަކަށް މެޑަލް، ސެޓިފިކެޓު، އަދި ޓްރޮފީ ހަވާލުކޮށްގެންނެވެ.
މި އިވެންޓުގެ މައިގަނޑު މަޤުޞަދަކީ މެޑިކޯސްގެ ދަރިވަރުންނާއި ކުޅުދުއްފުށީ ކެމްޕަހުގެ ދަރިވަރުންގެ ދެމެދު ގުޅުން ބަދަހިކުރުމާއި މާޖާކޮށްލުމެވެ.
މި ”ސްޕޯޓްސް މީޓް“ ނިންމާލާފައިވަނީ ވަރަށް ފޯރިއާއި ކާމިޔާބުކަމާއެކު ރިފްރެޝްމެންޓަކުންނެވެ.
