ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަންގެ މާލޭ ކެމްޕަހުގެ ގޮފިތަކުގެ ތެރެއިން އިންތިޚާބަށް ގޮސްފައިވާ ގޮފިތަކުގެ ވޯޓުލުން މިއަދު (04 މާރިޗް 2021)ގެ ހެނދުނު ފެށިގެން ކުރިޔަށް އެބަދެއެވެ.
ޖުމްލަ 03 ގޮތްޕެއްގެ 08 މަޤާމެއް އިންތިޚާބަކަށް ގޮސްފައިވާއިރު، މި އިންތިޚާބުގައި 16 ކެނޑިޑޭޓުންވާދަކުރެއެވެ. އިންތިޚާބަށް ގޮސްފައިވަނީ އެމް.އެން.ޔޫ ބިޒްނަސް ސްކޫލްގައި ޤާއިމް ކޮށްފައިވާ ގޮފި (ބީ.އެސް.އެސް.އޭ)ގެ ސެކްރެޓާރީގެ މަޤާމާއި، ފެކަލްޓީ އޮފް ހެލްތް ސައިންސަސްގައި ޤާއިމްކޮށްފައިވާ ގޮފި (ހީލާރސް)ގެ ނައިބުރައީސް އިތުރުހަރަކާތުގެ މަޤާމުގެ އިތުރުން، އެމް.އެން.ޔޫ ސްކޫލް އޮފް މެޑިސިންގައި ޤާއިމްކޮށްފައިވާ ގޮފި މެޑިކޯސްގެ މަޤާމުތަކެވެ.
ސްކޫލް އޮފް މެޑިސިންގެ ގޮފި މެޑިކޯސް އިން އިންތިހާބަށް ގޮސްފައިވާ މަޤާމްތައް:
- ރައީސް
- ނައިބު ރައީސް(ޢިލްމީ)
- ނައިބު ރައީސް (އިތުރުހަރަކާތް)
- ޙަޒާންދާރު
- މީޑިއާ ކޯޑިނޭޓަރ
- ސެކްރެޓަރީ
ކޮވިޑްގެ 19 ގެ ސަބަބުން ވޯޓްލުން ޓެލެގްރާމް މެދުވެރިކޮށް އޮންލައިންކޮށް ކުރިޔަށް ގެންދިޔުމަށްޓަކައި ކެނޑިޑޭޓުންނާއި މަޝްވަރާކުރެވި، ވޯޓަށް ގޮސްފައިވާ ފެކަލްޓީތަކުގެ ދަރިވަރުން ވޯޓުލުމަށް ރެޖިސްޓާރ ކުރުމުގެ ފުރުސަތު ވަނީ ހުޅުވާލެވިފައެވެ. އަދި ރެޖިސްޓާރ ވުމަށް ހުޅުވާލި ފުރުސަތުގައި 200 އަށް ވުރެ ގިނަ ދަރިވަރުން ވަނީ ރެޒިސްޓާރވެފައެވެ.
އިންތިޚާބުގެ ވޯޓުލުން މިއަދު ހެނދުނު 10:00 ގައި ފަށާފައިވާއިރު ވޯޓުލުމުގެ ސުންގަޑިއަކީ މިރޭގެ 08:00 އެވެ. މިއީ ޔޫނިއަންގެ ތާރީޚުގައި އޮންލައިންކޮށް ކުރިޔަށް ގެންދެވޭ ދެވަނަ އިންތިޚާބެވެ.
