އެމް.އެން.ޔޫ.އެސް.ޔޫ ބަހުސް މުބާރާތުގެ ސެމީފައިނަލްގެ ފުރަތަމަ މެޗުގައި ސެންޓަރ ފޮރ ފައުންޑޭޝަން ސްޓަޑީސް (ސީ.އެފް.އެސް) ކައިރިން ކުރި ހޯދައި އެމް އެން ޔޫ ބިޒްނަސް ސްކޫލް (އެމް.އެން.ޔޫ.ބީ.އެސް) މިބާރާތުގެ ފައިނަލަށް ދަތުރުކޮށްފައިވާއިރު ސެމީފައިނަލްގެ ދެވަނަ މެޗުގައި ވިލާ ކޮލެޖް ކައިރިން ކުރި ހޯދައި ފެކަލްޓީ އޮފް ޝަރީއާ އެންޑް ލޯ (އެފް.އެސް.އެލް) އިން ވަނީ މުބާރާތުގެ ފައިނަލްގެ ދެވަނަ ޖާގަ ކަށަވަރު ކޮށްފައެވެ.
3 ނޮވެންބަރު ވީ ބުދަ ދުވަހުގެ ހަވީރު ބޭއްވުނު ބަހުސް މުބާރާތުގެ ސެމީފައިނަލްގެ ފުރަތަމަ މެޗުގައި ސީ.އެފް.އެސް އަދި އެމް.އެން.ޔޫ.ބީ.އެސް ބައްދަލުކޮށް 796 – 793 ގެ ނަތީޖާ އަކުން އެމް.އެން.ޔޫ.ބީ.އެސް ވަނީ ކުރި ހޯދާފައެވެ. މި ބަހުސްގެ މައުޟޫ އަކީ ”ދިވެހި އިޤްތިޞާދަށް މިވަގުތު އެންމެ މުހިންމު ކަމަކީ އެންމެ ކުޑަ އުޖޫރަ ކަނޑައެޅުމެވެ “ މިއެވެ. ސީ.އެފް.އެސް އިން މައުޟޫއާއި އެއްކޮޅަށް ބަހުސް ކުރިއިރު އެމް.އެން.ޔޫ.ބީއެސް އިން ބަހުސްކުރީ މައުޟޫއާއި ދެކޮޅަށެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ ސީ.އެފް.އެސް ގެ މުހައްމަދު ނާއިލް ހަފީޒެވެ. މި ނަތީޖާއާއެކު އެމް.އެން.ޔޫ.ބީ.އެސް ވަނީ ފައިނަލަށް ދަތުރުކޮށްފައެވެ.
މީގެއިތުރުން 3 ނޮވެންބަރު ވީ ބުދަ ދުވަހުގެ ރޭ ބޭއްވުނު ބަހުސް މުބާރާތުގެ ސެމީފައިނަލްގެ ދެވަނަ މެޗުގައި ވިލާކޮލެޖް އަދި އެފް.އެސް.އެލް ބައްދަލުކޮށް 1023 – 727 ގެ ނަތީޖާ އަކުން އެފް.އެސް.އެލް ވަނީ ކުރި ހޯދާފައެވެ. މި ބަހުސްގެ މައުޟޫ އަކީ ” ކްރިޕްޓޯ ކަރަންސީ ރާއްޖޭގެ ލީގަލްޓެންޑަރގެ ގޮތުގައި ހިމެނުމުން ލިބޭނީ ފައިދާއެވެ“ މިއެވެ. ވިލާ ކޮލެޖް އިން މައުޟޫއާއި އެއްކޮޅަށް ބަހުސް ކުރިއިރު އެފް.އެސް.އެލް އިން ބަހުސްކުރީ މައުޟޫއާއި ދެކޮޅަށެވެ. މި ބަހުސްގެ އެންމެ މޮޅު ބަހުސްކުރުންތެރިޔަކަށް ހޮވިފައިވަނީ އެފް.އެސް.އެލްގެ އާމިނަތު ނަސޫހާއެވެ. މި ނަތީޖާއާއެކު 2019 ވަނަ އަހަރުގެ ޗެމްޕިއަންކަން ނެދި އެފް.އެސް.އެލް ވަނީ ފައިނަލަށް ދަތުރުކޮށްފައެވެ.
ފައިނަލް ބަހުސް އޮންނާނީ 05 ނޮވެންބަރު 2021 ވާ ހުކުރުދުވަހުގެރެޔެވެ. ފައިނަލް ބަހުސްގެ މައުޟޫ އަކީ ”ދިވެހިރާއްޖެ އަށް އެންމެ އެކަށީގެންވާ ވެރިކަމުގެ ނިޒާމަކީ ރިޔާސީ ނިޒާމެވެ.“ ކަމަށްވާއިރު، މި މައުޟޫއާ އެއްކޮޅަށް ވާހަކަ ދައްކާނީ އެފް.އެސް.އެލް އެވެ. އަދި މައުޟޫއާ ދެކޮޅަށް ވާހަކަ ދައްކާނީ އެމް.އެން.ޔޫ.ބީ.އެސް އެވެ.
