އެމް.ސީ.ޓީ.ސީ.އޯ.ގެ ފަރާތުން ޗައިނާ ބެލްޓް އެންޑް ރޯޑް އިނީޝިއޭޓިވްގެ 2 ވަނަ ބައްދަލުވުން ބާއްވައިފިއެވެ. ދިވެހިރާއްޖޭގެ ޤައުމީ ޔުނިވަރސިޓީގެ ސާޅީހަށް ވުރެ ގިނަ ދަރިވަރުން ބައިވެރިވި މި ފޯރަމް ބާއްވާފައިވަނީ 14 އޭޕްރިލް 2018 ވީ ހޮނިހިރު ދުވަހުގެ ހެނދުނު 09:00އިން ހަވީރު 05:00އަށް ޣިޔާސުއްދީން އިންޓަރނޭޝަނަލް ސްކޫލްގައެވެ. މި ފޯރަމް ފެށުމުގެ ރަސްމިއްޔާތުގެ ޝަރަފުވެރި މެހެމާނަކީ މިނިސްޓަރ އޮފް އިކޮނޮމިކް ޑިވެލޮޕްމަންޓް ޑރ. މުޙައްމަދު ސަޢީދެވެ. މި ފޯރަމް ފެށުމުގެ ރަސްމިއްޔާތުގައި ފޯރަމްއާ ބެހޭގޮތުން ކުޑަ ތަޢާރަފެއް ދެއްވީ އެމް.ސީ.ޓީ.ސީ.އޯގެ ޖެނެރަލް ސެކްރެޓަރީ އަބްދުﷲ ރިފާޢުއެވެ. ރިފާޢުގެ ވާހަކަފުޅުގައި، ފޯރަމްގެ ބައިވެރިންނަށް، ޗައިނާ މޯލްޑިވްސް ފްރެންޑްޝިޕް ބްރިޖަށް ޒިޔާރަތްކުރުމުގެ ފުރުސަތު ދެވޭނެ ވާހަކަ ވިދާޅުވެފައިވެއެވެ. އަބްދުﷲ ރިފާޢުގެ ވާހަކަފުޅަށްފަހު، ޗައިނާއާއި ރާއްޖޭގެ ގުޅުމުގެ މައްޗަށް ބިނާކޮށް ތައްޔާރުކޮށްފައިވާ ވީޑިއޯ ޕްރެޒެންޓޭޝަންއެއް ދައްކާލާފައިވެއެވެ. ޕްރެޒެންޓޭޝަންއަށްފަހު، ފޯރަމްގެ ބައިވެރިންނާ މުޙާތަބުކޮށް ވާހަކަފުޅު ދައްކާފައިވަނީ ޗައިނާގެ އެމްބެސެޑަރ H.E Zhang LiZhong އެވެ. މި ރަސްމިއްޔާތުގައި ދެން ވާހަކަފުޅު ދައްކާފައިވަނީ ރަސްމިއްޔާތުގެ ޝަރަފުވެރި މެހެމާނު މިނިސްޓަރ އޮފް އިކޮނޮމިކް ޑިވެލޮޕްމަންޓް ޑރ. މުޙައްމަދު ސަޢީދެވެ. މިނިސްޓަރ ގެ ވާހަކަފުޅުގައި، ވީޑިއޯ ޕްރެޒެންޓޭޝަންއިން އިބުރަތްތެރި އެތައް ކަމެއް ފެނިގެންދިޔަކަން ފާހަގަކޮށްލާފައިވެއެވެ. މިނިސްޓަރގެ ވާހަކަފުޅަށްފަހު މި ފޯރަމް ފެށުމުގެ ރަސްމިއްޔާތުވަނީ ނިންމާލާފައެވެ.
2 ސެޝަންއަކަށް ބަހާލައިގެން ކުރިޔަށް ގެންދިޔަ މި ފޯރަމްގެ ފުރަތަމަ ސެޝަން ފަށާފައިވަނީ ފޯރަމްގެ ބައިވެރިންނަށް ތައްޔާރުކޮށްފައިވާ ހާއްސަ ސައިފޮދަކަށްފަހުއެވެ. މި ފޯރަމްގެ ހެނދުނު ސެޝަންގައި ބައިވެރިންނަށް އެންމެ ފުރަތަމަ މައުލޫމާތު ދެއްވާފައިވަނީ ހެޑް އޮފް އިކޮނޮމިކް އެންޑް ކޮމާޝިއަލް ކައުންސެލަރސް އޮފީސް އޮފް ޗައިނީޒް އެމްބަސީ
Mr. Xia Xiaowei އެވެ. Mr. Xia Xiaowei ވަނީ ދެ ގައުމުގެ ގުޅުމުގެ މައްޗަށް އަލިއަޅުވާލާ ތައްޔާރުކޮށްފައިވާ ޕްރެޒެންޓޭޝަންއެއް ހުށައަޅާދީފައެވެ. އެއައްފަހު، ޗައިނާ މޯލްޑިވްސް ފްރީ ޓްރޭޑް އެގްރީމެންޓް (ސީ.އެމް.އެފް.ޓީ.އޭ) އާއި ބެހޭ މައުލޫމާތު ދެއްވާފައިވަނީ އިކޮނޮމިކް މިނިސްޓަރ އަލްފާޞިލާ މަރިޔަމް ވިސާމްއެވެ. މިނިސްޓަރވަނީ ފްރީ ޓްރޭޑް އެގްރީމެންޓަކީ ކޮބާކަމާއި ލިބޭ ފައިދާތަކާ ބެހޭގޮތުން މައުލޫމާތު ދެއްވާފައެވެ.
މެންދުރު ނަމާދު ވަގުތަށް މެދުކަނޑާލުމަށްފަހު މެންދުރު ފަހުގެ ސެޝަން ފަށާފައިވަނީ 02:15ގައެވެ. ސެޝަން ފެށުމުގެ ކުރިން ފޯރަމްގެ ބައިވެރިންނަށްވަނީ މެންދުރުގެ ޚާއްސަ ފަރިއްކޮޅެއް ދެއްވާފައެވެ.
މެންދުރު ސެޝަންގައި މޯލްޑިވްސް ޗައިނާ ޓްރޭޑް އެންޑް ކަލްޗަރަލް އޯގަނައިޒޭޝަންގެ ފަރާތުން މައުލޫމާތު ދެއްވާފައިވަނީ ނައިބުރައީސް އަލްފާޟިލް މިދުއާމް ސުޢާދެވެ. މިދުއާމް ސުޢާދުވަނީ ބެލްޓް އެންޑް ރޯޑް އިނީޝިއޭޓިވްއާއި ބެހޭ މައުލޫމާތު ފޯރަމްގެ ބައިވެރިންނަށް ދެއްވާފައެވެ. ބެލްޓް އެންޑް ރޯޑް އިނީޝިއޭޓިވްއަކީ ކޮބައިކަމާ، ޗައިނާގެ ބެލްޓް އެންޑް ރޯޑް އިންގެން ޖެހޭ ސަބަބަކީ ކޮބައިކަން މިދުއާމްވަނީ ކިޔައިދެއްވާފައެވެ. މިދުއާމްގެ ވާހަކަފުޅަށްފަހު ފޯރަމްގެ ބައިވެރިންނަށް ސުވާލުކުރުމުގެ ފުރުސަތު ހުޅުވާލިއެވެ. ބައިވެރިންގެ ސުވާލުތަކަށް ޖަވާބު ދެއްވާފައިވަނީ އިކޮނޮމިކް މިނިސްޓަރ އަލްފާޟިލާ މަރިޔަމް ވިސާމް އަދި މޯލްޑިވްސް ޗައިނާ ޓްރޭޑް އެންޑް ކަލްޗަރަލް އޯގަނައިޒޭޝަންގެ ނައިބުރައީސް އަލްފާޟިލް މިދުއާމް ސުޢާދެވެ.
ޔުނާން އާއި ބެހޭ އަސާސީ މަޢުލޫމާތު، ޑިރެކްޓަރ Mr. XiaoBiao Yao ވަނީ ބައިވެރިންނަށް ދެއްވާ، ވީޑިއޯ ރިޕޯޓެއް ދައްކާލާފައެވެ. އަދި Mr. Hunag Long (އެސިސްޓަންޓް މެނޭޖަރ ސީ.ސީ.ސީ.ސީ.ސީ) ޗައިނާ މޯލްޑިވްސް ފްރެންޑްޝިޕް ބްރިޖް (ސީ.އެމް.އެފް.ބީ) ޕްރޮޖެކްޓުގެ ތައާރަފެއް އަދި މިޕްރޮޖެކްޓާއި ބެހޭ ވަރަށް ގިނަ މައުލޫމާތު ދެއްވާފައެވެ. ހަމަ އެފަދައިން ކޮމާޝިއަލް މެނޭޖަރ Mr. Shen Chao ވަނީ ވައިގެ ބަނދަރާ ބެހޭގޮތުން ތައްޔާރުކޮށްފައިވާ ވީޑިއޯ ރިޕޯޓެއް ފޯރަމްގެ ބައިވެރިންނަށް ދައްކާލާފައެވެ.
Mr. Shen Chao ގެ ވީޑިއޯ ރިޕޯޓަށްފަހު މި ފޯރަމް ވަނީ ނިންމާލާފައެވެ. ފޯރަމް ނިންމާލުމުގެ ކުރިން އެމް.ސީ.ސީ.އޯ.ޓީގެ ޖެނެރަލް ސެކްރެޓަރީ އަބްދުﷲ ރިފާޢުވަނީ މި ފޯރަމް ނިންމުމުގެ ރަސްމިއްޔާތުގައި، ފޯރަމްގެ ބައިވެރިންގެ މެދުގައި ނެގޭ ގުރުއަތުލުމަކުން ހޮވޭ ބައިވެރިންނަށް، ޗައިނާ ދަތުރެއް ދިނުމަށް ހަމަޖެހިފައިވާކަމަށް ވިދާޅުވެފައެވެ.
