ސްޓޫޑެންޓްސް އިނީޝިއޭޓިވް އޮފް އާރޓްސް (ސިއާ)އާއި ދިވެހިބަހުގެ އެކެޑަމީއާ ގުޅިިގެން 2022ވަނަ އަހަރުގެ ބައިނަލްއަޤުވާމީ މާދަރީބަހުގެ ދުވަހުގެ ރަސްމީ ޖަލްސާ ބާއްވައިފިއެވެ.
މި ޖަލްސާ ބާއްވައިފައިވަނީ 2022 ފެބްރުވަރީ 21ވަނަ ދުވަހުގެ ރޭ ސީއޭ އޮޑިޓޯރިއަމްގައެވެ.
މި ޖަލްސާގައި ޝަރަފްވެރި މެހެމާނެއްގެ ހައިސިއްޔަތުން، ފަންނާއި ސަގާފަތާއި ތަރިކައިގެ ވުޒާރާގެ ވަޒީރު ޔުމްނާ މައުމޫން ބައިވެރިވެ ވަޑައިގެންނެވިއެވެ. އަދި ދިވެހިބަހުގެ އެކެޑަމީގެ ރައީސް ޑރ. އަޝްރަފް އަބްދުއްރަހީމާއި އެ އެކެޑަމީގެ ކުރީގެ ރައީސް އަޝްރަފް ޢަލީ ވެސް ބައިވެރިވެ ވަޑައިގެންނެވިއެވެ.
މީގެ އިތުރުން، މި ޖަލްސާގައި ގައުމީ ޔުނިވާސިޓީގެ ޗާންސެލަރު ޑރ. ހަަސަން ހަމީދާއި ވައިސް ޗާންސެލަރު ޑރ. މުހައްމަދު ޝަރީފް ވެސް ބައިވެރިވެވަޑައިގެންނެވިއެވެ. އަދި ޔުނިވާސިޓީގެ އިތުރު ވެރިން ވެސް މި ޖަލްސާގައި ބައިވެރިވެ ވަޑައިގެންނެވިއެވެ.
އެ ޖަލްސާގައި ވާހަކަ ދައްކަވަމުން މިނިސްޓަރު ޔުމްނާ ވިދާޅުވީ މިހާރަށް ވުރެ ބޮޑަށް ޓެކްނޮލޮޖީ އާއި ދިވެހިބަސް ރައްޓެހިވާން ޖެހޭ ކަމަށެވެ.
ދިވެހި ބަސް މިހާރަށްވުރެ ބޮޑަށް ޓެކްނޮލޮޖީއާ ރައްޓެހިކުރުވަން ކުރަންޖެހޭ މަސައްކަތްތައް ކޮށްދިނުމަށް މިނިސްޓަރު ޔުމްނާ ދިވެހި ބަހުގެ އެކެޑަމީގެ ކިބައިން އެދިވަޑައިގަތެވެ.
ވެހި ބަހަށް ހުރި ގޮންޖެހުންތަކުގެ ވާހަކަ ދައްކަވަމުން މިނިސްޓަރު ވިދާޅުވީ, ކުޑަކުދިންނާއި ޒުވާނުން ދިވެހި ބަހުން މުއާމަލާތް ކުރުން ހުއްޓާލައިފި ނަމަ އެއީ ވަރަށް ބޮޑު ގޮންޖެހުމަކަށް ވާނެ ކަމަށެވެ.
ބަސް ނެތިގެންދާ ވާހަކަ ދައްކާއިރު ބަހުރުވަ ނެތިގެންދާ ވާހަކަ ވެސް ދައްކަން ޖެހޭ ކަމަށް މިނިސްޓަރު ވިދާޅުވިއެވެ. ދިވެހި ބަހުގައި ވެސް ތަފާތު މުއްސަނދި ބަހުރުވަތައް ހުރިކަން ފާހަގަކުރައްވައި މިނިސްޓަރު ވިދާޅުވީ, އެކަން ހުއްޓުވުމަށް ކުރެވެން ހުރި ކަންކަމާ މެދު ފުންކޮށް ވިސްނައި އެ މައްސަލައަށް ހައްލު ހޯދަން ޖެހޭ ކަމަށެވެ.
”އެބައެއްގެ އަމިއްލަވަންތަކަމާއެކު އެ ބައެއްގެ ބަހާއި ސަގާފަތާއި ތަރިކައާ އެކު ގެނެވޭ ތަރައްގީއަކީ ހަގީގީ ތަރައްގީ. އެއީ ދެމެހެއްޓެނިވި ތަރައްގީ,“ މިިނިސްޓަރު ޔުމްނާ ވިދާޅުވިއެވެ.
މި ޖަލްސާގައި ފެކަލްޓީ އޮފް އަރޓްސްގެ ނޫސް މަޖައްލާ ”ފަންނު“ ވަނީ ނެރިފައެވެ. އެ ނޫސް މަޖައްލާ ނެރިދެއްވީ މިނިސްޓަރ ޔުމްނާއެވެ.
މި ޖަލްސާގައި ފެކަލްޓީ އޮފް އަރޓްސްގެ ލެކްޗަރާ އަންވަރު އިބްރާހިމާއި އެސްއެސްއެލްގެ މީޑިއާ ކޯޑިނޭޓަރު ރަޒީން ވާހަކަ ދެއްކެވިއެވެ.
އިތުރަށް މި ޖަލްސާގައި އޮތީ، ޅެންވެރީންގެ ޅެން ބަހުސެވެ. ފޯރިގަދަކަމާއެކު ކުރިއަށްދިޔަ ޅެންބަހުސް ބަލަން ޖަލްސާގެ ހާޒިރީން ތިބީ ޝައުގުވެރިވަކަމާއެކުއެވެ.
