ރަމަޟާން މަހާ ދިމާކޮށް ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ)އާއި އެމް.އެން.ޔޫ.އެސް.ޔޫގެ ގޮފި ސްޓޫޑެންޓްސް އިނިއޭޓިވް އޮފް އާރޓްސް (ސިއާ) ގުޅިގެން ބާއްވާ މަދަހަ މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.
ދިވެހިރާއްޖޭގެ ޤައުމީ ޔުނިވަރސިޓީގެ ހުރިހާ ދަރިވަރުންނަށް ހުޅުވާލައިގެން ކުރިއަށް ގެންދިޔުމަށް ނިންމާފައިވާ މި މުބާރާތުގައި ބައިވެރިވުމުގެ ސުންގަޑިއަކީ 10 މާރޗް 2022އެވެ. މުބާރާތުގައި ބައިވެރިވުމަށް އެދޭ ފޯމު ސިއާގެ ފޭސްބުކް ޕޭޖުން ލިބޭނެއެވެ.
މި މުބާރާތާ ބެހޭގޮތުން ސިއާގެ ރައީސް ޢާލިމް އަބްދުއްލަތީފް ވިދާޅުވީ އުންމީދަކީ މިދިޔަ އަހަރެކޭ އެއްފަދައިން ވަރަށް ފޯރިގަދަ، ކާމިޔާބު މުބާރަތަކަށް މި މުބާރާތް ވެސް ވުންކަމަށެވެ. އަދި ދާއިރާގެ ފުންނާބު އުސް ޖަޖުންތަކެއް ބައިވެރިވެ، އަގު ހުރި އިނާމުތަކާއެކު މުބާރާތްބޭއްވޭނެކަމުގެ އުފާވެރި ޚަބަރު ޢާލިމް ދެއްވިއެވެ.
ފެކަލްޓީތަކުގެ މެދުގައި ފޯރި އިތުރުކުރުމަށާއި ފެކަލްޓީތަކުގެ ބައިވެރިވުން އިތުރު ކުރުމަށް މި އަހަރުގެ މަދަހަ މުބާރާތުގައި އިންޓަރ ފެކަލްޓީ ގްރޫޕް މަދަހަ ކިޔުން ހިމެނިފައިވާ ކަމުގެ އުފާވެރި ޚަބަރު ސިއާގެ ނައިބު ރައީސް (އަމަލީ) އަޙްމަދު އިޒްމީމް ވަނީ ދެއްވާފައެވެ. އަދި ވަނަތަކަށް ދާ ދަރިވަރުންނަށް ލިބޭ އިނާމްތަށް މިއަހަރު ފުރިހަމަވާނެކަމަށް ވެސް އިޒްމީމް ފާހަގަކުރެއްވިއެވެ.
ސިއާއިން ރާވާ ހިންގާ މަދަހަ މުބާރާތް ބާއްވާ މިއީ ދެވަނަ ފަހަރެވެ. މިދިޔަ އަހަރު ބޭއްވުނު މަދަހަ މުބާރާތުގެ އެއްވަނަ ހާސިލް ކުރީ ސްކޫލް އޮފް ނާސިންގެ ދަރިވަރު އައިޝަތު ނަދާއެވެ.
